Read Sumi Naga ZAHKINIU 1 Bible Online

ZAHKINIU 1 - Sumi Naga bible

ZAHKINIU 1

¹Kaku hipaulo Muse no Israilmi putsakeu tsa anike, tiye panonguno Jordan kipela kudau asayeqhalo akelono ke. Panonguye Sup phivilo Jordan khilalo ake, Paran taun no tuxau ae eno Tofel, Laban, Hazerot eno Dizahab no tuxau akeu dolo ake.

²Sinai Toghi lono Kades Barnea kudau izuwuni kelo Edom lo naghuto la pulakeloye atsala chighi qhaqhi luchenike.

³Panonguno Ijip qhivekeu ampe lhobidi shi akelo aqhi chighi aqhaqhiulo atsala atughiulo AMPEU no pa vilo pilo pikeu kumtsu pesu Muse no timiqo vilo pike.

⁴Hipauye AMPEU no Amarimi kukau Sihon, Heshbon taunlo ayeh pechekeu ngo Bashan lo akukau Og khuuno Ashtarot ngo Edrei taunqo shou ayeh pechekeno panoqo toluve kethiuke.

⁵Timiqono Jordan kipela Kudau Muab ghakhulo aphi lono Muse no Alhou wu ayezahqo eno kutsukeu kishekulu pitsuke.

⁶Pano ishi pike, “Ninguno Sinai Toghilo akelo AMPEU ni Lhou no ningu vilo pike, ‘Nonguye hipau naghutolo ado kushuwa ngovae.

⁷Aghazu xavelo eno iqe wuvelo. Amarimi naghuto qhalo eno tokujo kumtsulo wulo-Jodan khilalo, naghutoqha kudau eno Mediteriya Zughi sukumxalo wulo. Kanan yeghilo eno Libanon naghutoqo hechesu aghoki kije Eufrati kutolo wulo.

⁸Aghakhu hipaqo kumtsu ni, AMPEU no nongu puasu Abraham, Isak ngo Jakob eno panongu polo kughukomi tsuni keu shi tushoqhivae. Wulo eno tipaulo ngolulo.’ ”

⁹Muse no timiqo vilo pike, “Ningu Sinai Toghilo aphi lono ino nongu vilo pikeuno, ‘Nongu sakipheu shinikeu makhoye ighenguno ihuloke, niye ilikhiye shimlake.

¹⁰AMPEU nongu Lhou no nongu pelo atsutsulo ayepuqo jejehi kutomo shivetsu ae.

¹¹AMPEU nongu puasu Lhou no pano tushoqhiveke toi ghuthu qhethonhe kutolo alau nongu kighishe pukutsu eno nongu pelo kinikulu shilupelo!

¹²Ikemu niye kishi puzu ilikhino nongu tsa kughakepu makho kimshi puluni kya?

¹³Alagha lakhi khi lono alokutsumi vethakulumi eno puju shijuvekemi khami kishephelo eno ino panoqo pelo nongu shou ampi shipenike.’

¹⁴Ike hitoi shikeu ye alokepi nonguno pulosuke.

¹⁵Tighenguno nolaghami gholono nonguno kishephe kemi alokutsumi eno sakiphemi ino saluke eno ino panoqo pesu nongu shou ampi shipeke. Khami timi qhethonhe, khamino aqhe eno khamino chighi ghenguno amakho puke. Ino alaghami kuchopulo kijemi kutami ghi susuke.

¹⁶“Tipa ghulokilo ino ishi panoqo kutsuke, ‘Nowu timiqo gholo atsa kugha ipeghikeu iniju tsulo. Atsa kughakepu kumtsu achipiu lono kughathalo, tiye nolikhi nowu timiqo dolo likhi shi aghina momu inaghami nongu gholo xuachekemi sasu shi aghi namu achipi lono kughathalo.

¹⁷Nonguno xathatsukeulo agi jukevilo; kumtsu shou aphiphi shi kughathalo, paye khuu khuu shi aghi namu. Khuumu musa kevilo kughengu nonguno xatha keuye Alhou launo ighike. Kugha kepu khipau nongu ghenguno ighono shisa keno ilau sughilo eno ino tipau xathatsu nanike.’

¹⁸Tipa gholono nonguye kutau ghi kishi shikepu keno ino akukutsu tsa nongu tsuvae.

¹⁹“AMPEU ni Lhou no ahza kiu nitsu keno ninguno tipau shike. Ninguno Sinai Toghi qhiveno aghaghi eno kumsa kimshipu sayeqha katha susu Amarimi naghuto la kudau wuke. Ninguno Kades Barnea tokelo,

²⁰ino pike,’Itehi nonguye Amarimi naghuto qhalo ighiluvae, tipauye AMPEU ningu Lhou, nipuasu Lhou no ningu tsu anike. Julo, hu anike. Pano ahza tsuveke toi wulo eno ngoluvelo. Izuicho kevilo momu msakevilo.’

²²“Ikemu nonguno ilau ighino pike, ‘Ayeghi pujuwu penike ningu zuuno timi puwuni nolo tishianguno khipala kudauno wukepu pavi nani keno eno tilau kiutoi keu phughi ani keno ningu vilo pitsulu nanike.’

²³“Tishi keuye alo kepu toi kumsuluke, tighenguno alagha lakhilo milakhi khi timi chighi kini ino kisheluke.

²⁴Panonguno naghuto toghiqhalo wuke Eskol Khila kutolo eno tipau muxu xujuke.

²⁵Panonguno ningu lau axathi tilau aghikeu hami sughi eno AMPEU no ningu tsu akeu yeghiye ighono aghuma kua yeghi kepi nipithitsu ke.

²⁶“Ikemu nonguno AMPEU nongu Lhou no ahza tsukeu hebideke eno nonguno ayeghi tipaulo ilomoveke.

²⁷Nonguno lakhino lakhi vilo nhenheshi pike: ‘AMPEU ye nijumthi cheni. Pano Ijip lono ningu saipeghiveno Amarimi hipaqo ulo suvetsuniye shi anike, tishianguno panonguno ningu heqhi peniyeke.

²⁸Ninguye kushiepi tilau wuni kya? Ninguye musa anike. Ninguno puwukemiqo no ningu vilo pikeuno tilau timi akeqoye ningu nguno akuchuquu eno akumtou kepi pike eno panonguye aphughi putukeuno atsutsu tonikeshi akeulo kughuna acheni. Panonguno timi subosughi tilau akeu ithuluke!’

²⁹“Ikemu ino pike, ‘Timi hupaqo jumsa kevilo.

³⁰AMPEU nongu Lhou no nongu sakipheu shinani eno Ijip lo ngo asayeqhalo Pano shikeu nonguno ithuluveke toi Pano nongu ghenguno aghu shi nanike.

³¹Apuno panu xapu keshi pano kishi nongu xaphe sasu hipa alo saghi keno ithuluvae.’

³²Ikemu nongu vilo pive kethiu ghi nonguye AMPEU pukhubemo ke.

³³Pano pulhapujulo nongu zuuno wupuzu nongu pelo aghazu shipenikeu-a phujutsu cheni keghi pa pukhubemoke. Alaghi nongu piyenike putholo ami tsukucho lakhi eno puchouno khungkusu tsukucho lakhi lono nongu zuu wuke.

³⁴“AMPEU ye nonguno muchhokeu chiluveno axuideveke ikehu pano tsaquino pikeuno,

³⁵‘Nongu alhoksa tiqhelimiqoye milakhimu ino nopuasu tsunikeu shi tushoqhive keu yeghi kivilo ilomla nani.

³⁶Jefune nu Kaleb likhino tipaulo ilolu nani. Paye ilau amikucho shi achenike eno ino pa lau eno pa polo kughukomi lau pano xujuve keu yeghi tsu nanike.’

³⁷Nongu ghenguno AMPEU ye ishou ghi axuideveno pike, ‘No, Muse ghi tipau yeghilo ilomo nani.

³⁸Ikemu okukuphuu Nun nu Joshua mlo shikumto tsulo. Pano Israil sakipheu shino tipa yeghilo ngolu nanike.’

³⁹“Tile AMPEU no ningu kumtsu vilo pike,’Ningu tianuli khunoqono ititunu kehu achipiu eno akumou mtha keno tipaqono tipa yeghilo ilolu nani, ti atianuli khipaqo noghumino kughaluve nani kepi nonguno piche keqono ilolu nani. Ayeghiye ino panongu tsu nani eno panonguno tilehi ngolu nani.

⁴⁰Ikemu nongu timiqo, nonguye tsughu idelo eno Aqaba lo Azu chhekusu laghi kudauno asayeqhalo idesu wulo.’

⁴¹“Nonguno ishi khochileke, ‘Muse, ninguno AMPEU shou axine shivae. Ikemu AMPEU ningu Lhou no ahza nitsuve keu toi ninguno itehiye lewuni ake.’ Tileno nongu lakhikhino aghu shinike kutoke, eno naghuto ghakhu lenikeuye mlalei kughashi kumsu akhake.

⁴²“Ikemu AMPEU no ivilo pike,’Panoqo vilo lewu kevilo pi ghutuvelo kughengu niye panoqo gholo chemo nani eno pano ghumiqono panoqo toluve nani.’

⁴³AMPEU no kiu pikeno ino nongu vilo pike ikemu nonguno amlo tsughi initsumoe. Nonguno pa shou hebideke eno nonguno aqhekuzashi naghuto ghakhulo chewuke.

⁴⁴Tileno naghuto hupaqolo achekeqo Amarimino akhi takeshi nongu shou ikughike. Panonguno Horma kutolo nongu haighike eno Edom lo naghuto ghakhu lono nongu leluveke.

⁴⁵Tighenguno nonguno AMPEU lau ighamuku kuphulo pike ikemu paye nongu ghugha initsumoe momu nongu lau amlo tsumoveke.”

⁴⁶“Tishive kehu, Kades lo ado kushuwa ngove kethiu,”