Read Sumi Naga ZAHKINIU 10 Bible Online

ZAHKINIU 10 - Sumi Naga bible

ZAHKINIU 10

¹“Tileno AMPEU no ivilo pike, ‘Atu pha kini yethalo tiye puzuu toi shilo eno tipaqo supe qhinike asu bohu lakhi mlalo. Naghutolo ilau iqhoghilo

²eno atu pha nono kuboleve keulo ino kiu yepua keno atu pha tipaqo shou ino yepukutsu nike eno tipathiu noye abohu lo tipaqo sulo.’

³Tighenguno ino akasia-su pesu abohu lakhi mla eno atughiu tu pha toikeu kini yethalu eno naghutolo peikuke.

⁴Tile AMPEU no atughiulo pano kiu tsa yepuku keno tipatho atu pha kumalo yepuku, Ahza Chighi nongu tsukeu huke, tiye nonguno naghuto phivilo kumqoke tsalalo pano ami lono pikeu tsake. AMPEU no atu pha pesu itsuve,

⁵eno ino xaidesu naghuto lono iqighiveke. Eno AMPEU no ahza tsukeu tho lono ino mla puakeu bohu lo tipaqo suno tipaqoye itehi kutolo tishi achenike.”

⁶(Israilmiye Jakan lo kuamiqo zukikhe lono chesu Mosera lo wuve. Aron ye tilauno thiveno qhove eno panu Eleazer no pa thelilo achineu shi luve.

⁷Tilauno panonguye Gudgoda lo wuve eno tipashelo azu kutomo akeu Jotbatha lo wuve

⁸Naghutolo AMPEU no Levi laghami susu puzu panoqo pelo Puloshoqhi Bohu jukuto penikeu shie. Eno itehi ghi panoqo kumlaye tipaqoke.

⁹Hipau ghenguno Levi laghaye kutami laghano ithuluke toi ayeghi ithulumoe; AMPEU nongu Lhou no tushoqhive ke toi, panonguye AMPEU chinemi shilu kepu dokivi ithulukeu shike.)

¹⁰“Atughulo shike toi niye naghutolo putho pucho tsala lhobidi ngoveke. AMPEU no hipau ghulokilo ghi itsa initsu eno nongu kutsavemo nike puloluvetsuke.

¹¹Tishieno nongu sawu lopi pano ivilo pike tishianguno pano nongu puasuqo lau tushoqhive keu yeghi nongu pelo amheghipu shi lukepu shipe niyeke.

¹²“Israilmiqo, itehiye AMPEU Alhou ye nongu launo kiu khuani keno inilo: AMPEU mllalo eno pano ahza tsukeu kumtsu shilo. Pa qhuivulo eno nongu mlo kuchopu eno angulho kumtsu pesu pa qelo

¹³eno nongu kivipu ghenguno ishi tsalalo ino pa yezah khipau nongu tsu ani keno tipau kumtsu pelulo.

¹⁴Kungugha akiqheu kutolo ghi AMPEU wuke; ayeghi ghi eno tile thwokha akeu pawuke.

¹⁵Ikemu AMPEU no nongu puasuqo qhuivulai keuye shishe mutotoi akehu timi kutami qhiveno nongu kisheluke eno nonguye pano kisheluve kemi shi aphike.

¹⁶Tighenguno hinguno hilauye AMPEU gholulo eno kuthovi akevilo.

¹⁷AMPEU nongu Lhou ye kutau lhouqo eno akuka kutauqo kumtsu nguno akiqheuke. Paye kije eno akumtou ke eno pa sumsa kepu ke. paye agi juchemoe eno kulugho luchemoke.

¹⁸Paye mighimghami ngo chimemiqo achipiu lono peitha cheni; paye inaghami niwu timi gholo akeqo qhuivu cheni eno achuqupu ngo aphimini tipaqo tsupe kepu shichenike.

¹⁹Tighenguno inaghami tipaqo lau kimiyekeu pephepiyelo kughengu ghuthu lakhilo nonguye Ijiplo inaghami shi acheke.

²⁰AMPEU nongu Lhou gholulo eno pa likhi mllalo. Pa lau amikucho shi achelo eno pa jelo likhino nowu tushoqhilo.

²¹Pa sheqhelo, paye nongu Lhou ke, pano nongu ghenguno akichiqhi kepu kije shitsu keu no likhi no nhethino ithuluve ake.

²²Nopuasuno Ijip lo iqi kelo pano lhotsuni likhi ke ikemu itehiye AMPEU nongu Lhou no nongu pesu atsutsulo ayepu jejehi shivetsu ake.”