Read Sumi Naga ZAHKINIU 11 Bible Online

ZAHKINIU 11 - Sumi Naga bible

ZAHKINIU 11

¹“AMPEU nongu Lhou qhuivulo eno pulhapujulo pa yezah kumtsu pelulo.

²Pa gholo pujushijuve keu lono AMPEU ghili kiu ithive akeno ishi tsalalo tipau kumsululo. Nonguno AMPEU kughushu pa kuka pa kumto eno pano akumzapu kumla shikeu ithuluke.

³Pano Ijip lo akukau ngo pa yeghiqha kuchopu shou kiu shikeno nonguno ithuluvae.

⁴AMPEU no Ijipmi ghushimi pano khurshi ngo khurkulu gholono qhoi puhave keu nonguno ithuluke, tiye panonguno nongu haighi kelo Akuhu Zughi lono panoqo putsuqhi pithiveke.

⁵Nonguno hilau ighi mphilo AMPEU no nongu ghenguno asayeqhalo kiu shikeno nonguno ithi anike.

⁶Ruben laghami Eliab nu Dathan ngo Abiram pama shou pano kiu shive keno kumsukidejulo. Timi kumtsu nhekithe lono ayeghino mpapho puzu pama eno pano kibolomi, pano phiki eno panoqemi ngo lhoxu jeli kumtsu munoveke.

⁷Kuchouno nongu nhethi ampino AMPEU no thime kije hipaqo shikeu kumtsu ithuluve ake.

⁸“Ishi tsalalo ino nongu lau ayezah tsukeu kumtsu pelulo. Tishianguno nonguye aghoki katha iku iloniye kuto akeu yeghilo ngolu nanike.

⁹Nonguye AMPEU no nongu puasuqo eno pano polo kughukomi tsunikeu shi tushoqhive keu kinikulu eno aghuma yeghilo ado kushuwa xualu nanike.

¹⁰Nonguno ngoluveniye kuto akeu yeghiye puzuu nonguno xuachekeu Ijip yeghi toimo ke. Tilauye apiti yisu kelo nongu ye alulo azu sunike ghenguno aka aveshi mla cheke;

¹¹ikemu nonguno iloniye kuto akeu yeghiye naghuto ngo akhila akeu, tsutsughu zuno putsu chekeu yeghike.

¹²AMPEU nongu Lhou no ampe kupuju ayeghi hipau tuchohiju eno jukuto achenie.

¹³“Tighenguno ishi tsalalo ino ahza nongu tsuakeu pelulo; AMPEU nongu Lhou qhuivulo eno nongu mlo kuchopuno pa qelo.

¹⁴Nonguno tishilu aye, no yeghino tsutsughu avehupu shive kelo tixi tsalalo eno ghixu tsalalo pano ghuqhitsu nani, tishianguno nonguye athi, atsayi-ji eno oliv teli

¹⁵eno no mishiqo ghenguno atsani alunani ke. Nonguno achuqupu lunishi keu kumtsu alunanike.

¹⁶AMPEU launo nongu musu sawuve puzu kutau lhouqo mlla eno qeuve kevilo.

¹⁷Nonguno tishive aye AMPEU ye nongu shou aloghu ideve nani. Pano tsutsughu suchileluve nani eno axaboqoye ayeghino qhaiveno thuwumove nani. Ayeghi nongu tsuniye akeu yeghiye akivi shi anamu nonguye tileno itheno thive nanike.

¹⁸“Ahza tsuakeu hipaqo kumsululo eno tipaqoye losupu shi kumsu chelo. Nongu piputo keu lakhi shipenike aumlolo khapulo eno nongu kishelo dapulo.

¹⁹Tipaqo pesu nongu tianuliqo shikalo. Nonguno akilo ngo akelo eno khalau chekelo, akulho qhi akelo eno akumla shi akelo tipaqo ghili kuptsa alo,

²⁰Nongu hukikha ngo khagho tsukucholo tipaqo yepukulo.

²¹Tishi aye nongu ghi eno nongu tianuliqo ghi AMPEU nongu Lhou no nopuasuqo tsunikeu shi tushoqhive keu yeghilo ado kushua axu shulu nanike. Ayeghi ngo atsutsu ake kutolo nonguye tile xu achelu nanike.

²²“Ino nongu tsu akeu yezah kumtsu amikucho shi pelulo: AMPEU nongu Lhou qhuivulo, pano ahza tsukeu thwokha shilo eno pa lau amikucho shichelo

²³Tishi aye nonguno azuu haighi kemtsa pano ashiayeh kutami hupaqo halepheve nani eno nonguye ashiayeh kutami nongu nguno akijeu eno akumtomi yeghilo ngoluve nani.

²⁴Nonguno khipa qha shou chesu wuni keno tipaqo kumtsu nowu shive nani. Nolughiye apeu asayeqha lono ahuu Libanon naghuto kutolo qhawo nani eno kipelau Eufrati ghoki lono kulolau Mediteriya Zughi kuto shinani.

²⁵Tipa yeghilo nonguno khilekhile wu namu AMPEU nongu Lhou no pano tushoqhiveke toi timiqo pelo nongu musape nani, eno khunomu nongu lakhamla nanike.

²⁶“Ishi tsalalo nongu pelo kukumgha ngo musuinivekeu kuma khiu kisheluni keno nongu tsu ani.

²⁷Ishi tsalalo AMPEU nongu Lhou no ahza tsukeu ino nongu tsu anike nonguno pelu aye kukumghapu ke;

²⁸ikemu ahza tsukeu hipaqo ghobideveno nonguno khilemu mlla chemokeu kutau lhouqo mllaniye tsughusu wuve aye musuinikeu lakhi ake.

²⁹Nonguno ngoluniye kuto akeu yeghilo AMPEU no nongu sailoghi kelo nonguye Gerazim Toghi lono kukumghapu pesu asheshulo eno Ebal Toghi lono musuinikepu pesu asheshulo.

³⁰(Naghuto hikumaye Jordan kulola kudau Kananmi khunoqono Jordan khilalo xu acheni keno tipano luzalo anike. Tipaqoye kulolau More lo achine subo lono kushuwa kumolo anike eno Gilgal taun phiviloke.)

³¹Nonguye Jordan kathani cheake eno AMPEU nongu Lhou no nongu tsu akeu yeghilo ngoluni cheake. Nonguno tipau luveno tilehi ngoluve kelo

³²ishi tsalalo ino ayezah nongu tsu akeu kumtsu pelunike kutokupui shilulo.”