Read Sumi Naga ZAHKINIU 12 Bible Online

ZAHKINIU 12 - Sumi Naga bible

ZAHKINIU 12

¹“AMPEU nongu puasu Lhou no nongu tsuakeu yeghilo xuake tivilo nonguno pelu masa kepu yezah hipaqo anike. Tipaqo inilo!

²Nonguno ngoluve niye akeu yeghilo, timiqono khilehino panoqo lhou mlla acheni keno, naghuto kutsuqalo, atoghilo eno asuminipho qholo a-a aghikeu kumtsu kutsalevelo.

³Pano wu akiptiaqo tulepiniyivelo eno chini chekeu tsukucho tu kubopinyive tsulo. Panongu lhou liu Ashera julho shikeu pitilevetsu eno panoqo suatu julho michevetsulo, tishianguno tipaqo alo itaghi tipanoqo mlla kithe pemo nike.

⁴“Timi hipaqono pano lhouqo mllake ghola lono AMPEU nongu Lhou mlla kevilo.

⁵Noshiayeh ghakhu lo AMPEU no a-a lakhi kishelu nani, tipa-alo timiqoye pa mllalo.

⁶Tilehi nonguno aghashikeu piti pesu mllalo eno nongu wu kutau aghashikeu gho nowu chighi saje akumllagho, nonguno AMPEU lau tushoqhive keu gho, nowu puloniqhiyi keu gho eno nowu amshi ngo bheri piti tughiuqo pesu mllalo.

⁷Tilau AMPEU Alhou no nongu kumghatsu keu gizulo no kibolomi sasu mlalukeu thime kiviqo chuno aghakiqi shilo.

⁸Tipa ghuloki ighi kelo nonguye itehi kiu shi ani keno shikepu kumoke. Itehi kutolo nongu kumtsuno pututano pulokeu lono mlla achenike,

⁹kughengu nonguye AMPEU nongu Lhou no ayeghi tsuakeulo ilomphi kehue, tilau nonguno iquighai xulu nanike.

¹⁰Nonguno Jordan katha iku kelo AMPEU no nongu pelo ayeghi tipaulo ngoluno xulu penanike. Noghumi kumtsu launo pano nongu susholu nani eno iquighai xulu nani.

¹¹AMPEU no a-a lakhi likhi kishetsu nani, tipa-a lono pa mlla kepushi nonguye tipa alo ino ahza tsuvekeu kumtsu pa lau sughi masake. Nonguno piti pesu aghashinikeu eno kutau aghashi kepuqo, nowu chighi saje eno akumllagho eno akimchi gho nonguno AMPEU lau tushoqhivekeqo sughilo.

¹²Nongu tianuli, noqemiqo eno nowu taunlo Levi laghami sasu kumtsa pa gizulo alokivishilo: Levi laghamiye pano sala ayeghi kuha nani kepi kumsululo.

¹³Nonguye nonguno mllanishi ke alono nowu aghashikeu pesu mlla kevilo;

¹⁴nonguye noshiayeh ghakhulo a-a lakhi AMPEU no kishetsu keulo likhino akumllagho pe mlla masake. A-a tipaulo likhino nowu aghakishi piti pesu mllalo eno tileno ino ahza nongu tsukeu jeli kutau kumtsu shilo.

¹⁵“Ikemu nonguno khile xuni keno tipa-a lono notsuaqu heqhino chulu nani. AMPEU no nongu tsukeu khijehi chunishi keno chulu nani. Achinelo mithena mithemo namu nongu kumtsu aqhu ashe shi chuke toi tipaqo chulu nani.

¹⁶Ikemu nonguye tipaqo jih chukevilo; nonguye azu peleve keshi tipaqo jih ayeghilo kighijivelo.

¹⁷AMPEU mllakeuye kiu kiu shi aghi namu: chighi sajelo tsukeu thi, atsayi-ji, oliv teli momu nomishi ngo bheri piti tughiu jeli, nonguno AMPEU lau agho tsuni keushi tushoqhive keu, nonguno puloniqhiyi tsukeu kumllagho momu akumllagho kiukiu shi aghi namu nonguno khile xu acheni keno tipa aloye heqhi chu kevilo.

¹⁸Nongu, notianuli eno noqemiqono Levimi nowu taun lo akemiqo sasu kumtsa AMPEU nongu Lhou gizulo likhino akumllagho hipaqo chulo, tiye AMPEU nongu Lhou no akumlla-a lakhi kishetsu keu-alo likhino shilo. Nonguye tipa-a lono nono shilukeu thwokha ghenguno alovilulo.

¹⁹Mutsuqhei hi ithilo, nonguno noyeghilo xuake tivilo Levi laghami kughucho kevilo.

²⁰“AMPEU nongu Lhou no nolughi pekhovetsu kelo, pano tushoqhive ketoi, kughokughomu nonguno ashi chunishiaye chulu nani.

²¹Akumlla-a lakhi likhi huno ala kushuwalo aghiaye nonguno chunishi kelo nomishi momu bheri AMPEU no nongu tsukeu heqhino tipau shi aki lono chulu nanike, ino nongu vilo piveke toi.

²²Khuu khumu achine pulo mithe na mithemo namu tipau shi chulu nani tiye aqhu ashe shi chu akeshi chulu nanike.

²³Tishi keulo ashi gholo ahji akeu chu kevilo kughengu akuxuye ahjilo anike eno nonguye ashi gholono akuxu ghi chu kevilo.

²⁴Ahji pesu achuqupu shi peitha kevilo; tishimono tiye azu toi ayeghilo kighijivelo.

²⁵Nonguno ahza hipau gholu aye AMPEU no amlo qi nani, nongu eno nongu polo kughukomi ghenguno kumtsu akivipu shinanike.

²⁶Nowu akumlagho ngo nonguno tushoqhive keu ghoqo pesu mllakepu a-a lakhi akeulo pewulo.

²⁷Aghashi keu AMPEU akiptia lono qhoi piti kepu shi akeu pesu tilauno mllalo. Itaghi aghashi keu khipaqo nonguno ashi chu eno akiptialo ahji peleqhi cheni keno tilauno pesu mllalo.

²⁸Ino ahza nongu tsuvekeu thwokha amikuchoshi pelulo, nongu eno no polo kughukomi ghenguno alhokupujulo akivipu shiche nani kughengu kiuno achipi keno eno kiuno AMPEU nongu Lhou lopu keno tipau shi luni ake.

²⁹“Nonguno ashiayeh kutamiqo yeghi lewu kelo AMPEU nongu Lhou no panoqo kutsaleve no nonguno tipaulo ngoluve eno tile acheuve nani.

³⁰AMPEU no ashiayeh hupaqo kutsaleve kethiu, nonguye panoqo chineyeh pape wumo nike itehino kutokupui shilo, kughengu tino nongu meluve nanike. Panonguye kishi pano lhouqo mlla cheni keno nongu ghi tipau phujuwu kevilo.

³¹Panonguno pano lhouqo mllake ghola lono AMPEU nongu Lhou mlla kevilo, kughengu panoqo lhou mlla keulo panonguye AMPEU no aphimuqhu kepu jeli shi chenike. Panonguye pano tianuli ghi heqhi pesu akiptia lono aghashi piti chenike.

³²“Ino ahza nongu tsukeu thwokha shilo; tipaulo kiumu sukupha kevi momu tipau lono kiumu ikhive kevilo.”