Read Sumi Naga ZAHKINIU 14 Bible Online

ZAHKINIU 14 - Sumi Naga bible

ZAHKINIU 14

¹“Nonguye AMPEU Alhou wu timiqoke. Tighenguno thivekemi ghenguno nonguno mloqa kevilo, kutamino shicheke toi noshi ghale momu nokutsulo asa agizuu akeu miyele kevilo.

²Nonguye AMPEU nongu Lhou wu timiqoke; ayeghilo timi xuakemi gholono pawu timi shipenike pano nongu kisheluke.

³“AMPEU no mithemoke pi pivekeu jeli kiumu chukevilo.

⁴Nonguno lhoxu hipaqo chulu nani: amshi, bheri, ane,

⁵ashe, aghalo bheri, aghalo ne, eno achui.

⁶Lhoxu khipauno apukhu mutsu shoba eno akhakile cheni keno tipaqoke.

⁷Ikemu lhoxu khipaqono apukhu mutsu shoba eno akhakile chemo keno tipaqoye chukevilo. Nonguye kemel, rabit, achighi chukevilo. Hipaqoye mithemokeu lhoxuke, tipanoqoye akhakile cheni ikemu apukhu mtsu shobamoke.

⁸Awoshi chukevilo. Tipaqoye mithemoke; tipanoqoye aphukhu mutsu shobake ikemu akhakile chemoke. Lhoxu hipaqo lakhimu chukevilo momu tipaqo kithikumo bukevilo.

⁹“Nonguye kiu kiu kha shi aghinamu akoza asaxu puaghikeu chulu nani,

¹⁰ikemu azulo lhoxu aghikeu jeli akoza kuhakeu eno asaxu puaghimo keuye chukevilo; tiye mithemoke pi kihivelo.

¹¹“Nonguye aghau akimthe jeli kiu kiumu chulu nani.

¹²Ikemu aghau jeli hipaqoye khilemu chukevilo: alhuqu, aqhaqho, alu kuzuva, alhaqu, aluqu jeli kutauqo, agha, ostrik, azu luqu; azu ghau eno has jeli; minitugha eno ashuqha.

¹⁹“Achishibo kupu tikha-ninga kumtsu mithemo ke tipaqo chukevilo.

²⁰Nonguno akimthe tikha-ninga kiu kiumu chulu nani.

²¹“Kiu kiu lhoxu namu pakithi thivekeu chukevilo. Inaghami nongu gholo xuache kemi pelo chupelo momu nonguno inaghami kutami vilo jeluve nani. Ikemu nonguye AMPEU Alhou wu timike; nonguye pawu timiqoke. “Bheriti momu aneti shi pesu tipau aza kichhizu lono lhokevilo.

²²“Ampe lakhilo nolu lono ipeghikeu jeli kumtsu chighi sajelo lakhi kutashi pesu qhilo.

²³Tipathiu AMPEU nongu Lhou no a-a lakhi lono mllapenike kishetsu keu-alo wulo; eno tilau pagizu lono nowu chighi saje: athi, atsayi-ji, oliv teli eno amshi ngo bheri piti tughiu hu chulo. Hipau shichelo tishianguno nonguye pulhapujulo AMPEU nongu Lhou gihukeu shikalu kepushilo.

²⁴Akumlla-aye nonguno ngochekeu lono ala kushuwa kehu AMPEU no nongu kumghatsu puzu ipeghi keu tilau chighi saje xapu wuni keu sho aye hipau shilo:

²⁵Ipeghikeu jeliqo jevelo eno pisa pesu mllakeu-a lakhilo wulo.

²⁶Nonguno kiu lono tipau pisa puwoni keno shilo—amshishi, bheriti shi, atsayiji momu aji lono puwolo, eno tilau AMPEU nongu Lhou gizu lono nonguno nokibolomi sasu kuchu kusho shi alokivi shilo.

²⁷“Levi laghami nowu taun lo akemi kughucho kevilo; panonguye pano wu aki-alu kuhake.

²⁸Ampe akuthuu shekhalo nowu tuxatini lo chighi saje lakhi pesu nowu taunqolo pekutsupe qhilo.

²⁹Achuqupu hipauye Levi laghami salake kughengu panonguye aki alu pighi chemoke eno inaghami ngo mighimghami eno chimemi nowu taun lo xuache kemi salake. Panonguno avehupu shi akeu ighino lupelo. Hipau shilo eno AMPEU nongu Lhou no nonguno mla ithakeu kumtsulo nongu kumghatsu nanike.”