Read Sumi Naga ZAHKINIU 15 Bible Online

ZAHKINIU 15 - Sumi Naga bible

ZAHKINIU 15

¹“Ampe akutsuniu ashekha shi akelo nongu piashe puaghi keu kumtsu qhi khavetsu masake.

²Tipauye hipa ghola lono shilo. Timi khuu khuumu pa kusami Israilmi lakhi lau pisa puna puaghi aye apiashe tipau qhivetsulo; paye pisa tipau khukideluni ke pukaputsa kevilo; AMPEU ampino apiashe tipau qhivetsu keu pivae.

³Inaghamino nongu tsukepu shi akeu khulu nani ikemu nolikhi nowu timino nongu tsu kepushi aghikeu khulu kevilo.

⁴“AMPEU Alhou no nongu tsu akeu yeghilo nongu kumghatsu nanike. Nowu timi lakhimu kumlhomi shivepemo nanike.

⁵Nonguno pa gholu eno ishi tsalalo ino nongu vilo ahza tsuakeu thwokha kumtsu kutokupui pelu aye,

⁶AMPEU no pano tushoqhive ketoi nongu kumghatsu nanike. Nonguno ashiayeh kutomo lau pisa puna nani ikemu nonguye kutami launo nakeu shimo nanike; nonguno ashiayeh kutomo shou qhasulu nani ikemu ashiayeh khunomu nongu qhasumo nanike.

⁷“AMPEU Alhou no nongu tsuakeu yeghilo taun lakhi lonomu Israilmi akusami lakhino shilusa aghi aye tilehi nonguye shonu shikevilo eno pa kuphunike milive kevilo.

⁸Ikemu pa lau michhimono pano kiu avehupu shi aghini keno tijehi pa punatsulo.

⁹Kiuala pa puna nikeulo milive kevilo, apiashe qhivetsu nikeu mpe kupunu wochea kepi pa milive kevilo. Akukumsu lhoksa tikithipu nongu kukumsulo iloghipe kevilo. Nonguno punani keu milive aye pano nongu nguku ghi AMPEU lau ighamuku nani eno nonguye angsupu shive nanike.

¹⁰Shonu shimono nibonilei pa tsulo eno nonguno mla ithakeu kumtsulo AMPEU no nongu kumghatsu nanike.

¹¹Pulhapujulo Israilmi khamiye kumlhomi shi anani eno shilusa ache nani tighenguno tipaqo lau michhimono tsukepushi ino ahza nongu tsu ani.

¹²“Israilmi kiptimi momu totimi lakhino ovilo aqeu shi pa likhi pa jesuve aye nonguye pano ampe tsugho oqeve kethiuye phepuwuvelo. Ampe akutsuniu tokelo nonguye pa pelo kupunamono wuluve pelo.

¹³Nonguno pa puwu keulo au kumsa pa puwuve kevilo.

¹⁴AMPEU no kiu okumghavetsu akeno tipau lono bheri, athi, atsayi-ji pesu lukumkhashi pa tsulo.

¹⁵Nonguye Ijip lo aqemi shi ache kelono AMPEU no nongu khaqhiphe kepi kumsululo tighenguno ino itehino ahza hipau nongu tsu anike.

¹⁶“Ikemu nongu qeuye wuve nishimono aghiluvi; paye oqhuivu eno okibolomi qhuivu aghiluvi eno aghaqiqhiyi ngo anishi aghiluvike.

¹⁷Tishiaye pa sasu ohukikhalo wulo eno pa kini vuve tsulo; tishive aye paye akuxu kupujulo oqemi shicheni ake. Noqelimi ghi hipa ghola lono peithalo.

¹⁸Nonguno aqemi lakhi phepuwuve kepu shikelo amlo shimo puta kevilo; kughengu paye aqe kiqemi jume tuxa qhemi lono ampe tsugho oqevae. Hipau shi eno AMPEU Alhou no nonguno mlaitha keu thwokhalo nongu kumghatsu nanike.

¹⁹“Nowu amshi ngo bherino ati piti tughiu atsu thaqhuye kumtsu AMPEU nongu Lhou salashi pakutashi qhilo; amshi tipaqoye akumla shipe kevilo eno bheri tipaqoye amhi gholu kevilo.

²⁰Mipe atsu-tsu nongu eno nokibolomino akumlla-a lakhilo AMPEU gizu lono tipaqo heqhi chulo.

²¹Ikemu lhoxu tipaqoye kiuala vimokeu shi aghi aye, tiye apukhu kinita, anhethi iche momu kiuala kutau alomo keshi aghi aye nonguye tipaqo pesu AMPEU Alhou lau aghashi kevilo.

²²Lhoxu titoive keqoye nonguno aki lono heqhi chiluvi. Achinepulo mithe na mithemo namu nonguno aqhu ashe shi chu keshi tipaqo chulu nani.

²³Ikemu tipaqo jih chukevilo; tishinike zuqhulo tiye azu toi ayeghilo kighijivelo.”