Read Sumi Naga ZAHKINIU 19 Bible Online

ZAHKINIU 19 - Sumi Naga bible

ZAHKINIU 19

¹“AMPEU nongu Lhou no khunoqo yeghi pesu nongu tsu ani keno tipaqo kutsaleve kethiu nonguno pano phughiqo ngo akiqo luve puzu tilau ngoluve kethiuye,

²tipau ghakhu pesu saje kuthu shi kijethalo, saje lakhi khilo mulalei wo tokulupu aphughi lakhikhi shilo. Tishiaye timi khuno kutami lakhi pithiveni keno posusu aphughi tipaqo lakhilo sushokulu shilupe kepu shilo.

⁴Timi lakhino kutungulu puzu pa ghumi kumomi lakhi pithive aghi aye paye aphughi tipaqo lakhilo powulu nani eno pa kuxu xalu nanike.

⁵Kumsujukelo, timi mikini aghasulo asu gheniye wukelo milakhino asubo yeqhi ake lono amughu hejoveno milakhiu pithive aye paye aphughi tipano kuthu gholo lakhilo powulu nani eno pa kuxu xaluve nanike.

⁶Aphughi lakhi likhi aghi aye tipaulo powuni keu ala kushuwa shi aghiluvi eno amukhu luni kemi asholokumi pano sholokumi pithive tsukeu ghenguno hasusu ighieno timi tipau kughaluve nanike eno pa mlo kighide launo pimimo kemi pithive nanike. Kughengu paye kutungulu keu lono pa ghumi kumomi timi pithive kethono kutau lono kumoe.

⁷Highenguno ino nongu vilo aphughi kuthu qhilopi ahza tsu anike.

⁸“AMPEU nongu Lhou no noghakhu pekhotsu kelo pano tishi tsunike pi nopuasu vilo piveke toi eno pano tushoqhive keu yeghi kumtsu nongu tsukeulo,

⁹nonguno aphughi kutau ala kuthu kishelo. (Ino ishi tsalalo ahza nongu tsu akeu thwokha kumtsu nonguno shikupu aye eno nonguno AMPEU nongu Lhou qhuivu aye eno pano kutsupiye keu kiqi lono xuche aye pano ayeghi hipau nongu tsunanike.) “

¹⁰Hipau shilo tishianguno pimimokemi pelo thipemo nike eno AMPEU no nongu tsuakeu yeghilo nonguno titoikemiqo pithivekeu ngusu shimo nanike.

¹¹“Ikemu, tsalatsa timi lakhino puthaputsano pa ghumi khea puzu heqhiveni eno aphughi hupaqo lakhilo sushokulupu ghenguno pove napi aye,

¹²tishiaye, pano taunlo sakiphemino pa saighi lo eno akithiuno sholokumi amukhu kulumi lunikeu akemi ulo suvetsulo tishianguno timi tipau pithive penike.

¹³Pa shou kimiyeqhi akevilo. Israi lo timi hekiqhimi hipau ikhivelo tishianguno nongu gholo akivipu shilu nanike.

¹⁴“AMPEU no nongu pelo amheghi shilupenike tsu akeu yeghilo nonguye akusami lughilo atu shopuakeu pekiqe kevilo.

¹⁵“Thopiu lakhi shepe likhiye heqhibuqhive keulo akipimi tsuni keu luzulake; timi lakhiye kuquve akepi mutsumishei shitsulu nikeuye akimkheuno thopi shinikemi kini avehupu shi ani.

¹⁶Timi lakhino kutami shipsani aye akimiki lono kutamiu huye heqhi buqhivekeu nguku aye,

¹⁷pama kinikujo akumlla-a lakhilo wulo eno tilau achinemi ngo kughakuthami hiyam lo akeqo pelo xathatsu pelo.

¹⁸Kughakuthamino atsa kughakepu, sughikeu kishekulushi phuju nani; eno timi tipauno akimki lono pa kusami Israilmi shou ngukube puaghi aye,

¹⁹pano ngukube akeu timi huno aghime ithulu kepu shi akeu timi tipauno ithulu kepu shinani. Hitoi shipuzu nonguno alhoksa hipau ikhive kepu shilo.

²⁰Tileno kumtsu ghano kiu shive keno chiluve no musave nani eno khuunomu ighumono alhoksa tikithipu shikidemove nanike.

²¹Tikithipu vehulo nonguye kimiyeqhiyikeu shikevilo; aghime tsuni keuye hitoi shilo, akuxu thelilo akuxu, anhethi thelilo anhethi, ahu thelilo ahu, au thelilo au eno apukhu thelilo apukhu kutsavetsulo.”