Read Sumi Naga ZAHKINIU 23 Bible Online

ZAHKINIU 23 - Sumi Naga bible

ZAHKINIU 23

¹“Timi khuuno aphighu lothi luve momu khuuno aphighu ghithave akeno paye AMPEU wu timiqo gholo kihisu kuqha kevilo.

²“Tuqhanu momu titoi kemi polo kughukomiye tiqheli achighiu kutolo pinamu AMPEU wu timiqo gholo kihisu kuqha kevilo.

³“Amunmi momu Muabmi momu panoqo polo kughukomiye tiqheli achighiu kutolo pinamu AMPEU wu timiqo gholo kihisu kuqha kevilo.

⁴Nonguno Ijip kudau ipeche kelo panonguno achuqupu ngo azu pesu nongu tsunikeu miliveke eno panonguno Mesopotamia lo Pethor phughi lono Beor nu Balam piqesu puzu nongu musuini nikeu shike.

⁵ikemu AMPEU nongu Lhou no Balam tsa initsumoke; tishinike zuqhulo pano musuini keu pesu kukumghapu kughulhovetsu ke, kughengu pano nongu kimiyeke.

⁶Nonguno ashiayeh lakhi shi ake kutolo khilemu ashiayeh hipaqo kuphu kevilo momu panoqo pelo kinikulu shilupe kevilo.

⁷“Edommi jumithi kevilo; panonguye nosholokumiqo ke. Ijipmi jumithi kevilo, ghuthu lakhilo nonguye pano yeghilo xuacheke.

⁸Tiqheli akuthuu nguno tilauye panoqo kughukomi ghi AMPEU wu timiqo gholo kihisu kuphalu nanike.

⁹“Aghushi ghulokilo nonguno aghazulo ngo akelo nonguye achinepulo mithemove kepu kiumu shikepu kumoke.

¹⁰Timi lakhino putholo asamo pumo akelono ijive keu ghenguno mithemove aye aghazu lono khalau ipeve puzu tilau ngoalo.

¹¹Avelau paye azu kuchhuveno tsukinhe ilove kethiuno aghazulo ideighilo.

¹²“Nonguye aphiki ghazu lono khalau a-a lakhi kutolo eno pujoni shive kelo tilau wulo.

¹³Nowu tinhemgha gholo asuta lakhi puchelo tishianguno nonguno bani shive kelo tipauno ayeghi chhu puzu jonhave kepu shilo.

¹⁴Nowu aphiki ghazu achinepulo akimthe shi qhilo kughengu AMPEU nongu Lhou ye nophiki ghazulo ngopuzu noghumiqo launo nongu susholuni eno tokulu nongu tsuniye ke. AMPEU no nongu lau azupo tsughu tsuve kepu niqhunighulai keu ghusho ghili kiumu shikevilo.

¹⁵“Aqemi lakhino pa mpiu launo pove puzu susholu penike olau ighi aye pa pelo idechile wope kevilo.

¹⁶Paye nowu taun khipaulo pano ngo nishi keno tipaulo ngolu pelo eno nonguye mughachhoi pa peitha kevilo.

¹⁷“Israilmi kiptimi momu totimi khuumu achinekilo kusalhami shikepu kumoke.

¹⁸Tike kumono, hitoi shipuzu pisa qelukeuye shoqhi bekutha shikupukeu lakhi shinike AMPEU nongu Lhou kilo suloghi pekevilo. AMPEU no achinekilo kusalhami jumithi achenike.

¹⁹“Nonguno akusami Israilmi lakhi vilo pisa momu achuqu momu kutau kiwala punakeulo akighishe lukevilo.

²⁰Nonguno inaghami lau kiu punani keno tipaulo akighishe khuluvi ikemu akusami Israilmi lau puna keuloye akighishe khukevilo. Ayezah hipau papelo eno nonguno ngoluniye akeu yeghilo thwokha kumtsulo AMPEU nongu Lhou no kumghatsu nanike.

²¹“Nonguno AMPEU Alhou lau bekutha shoqhi lakhi shikeulo nonguno tushoqhive keu palokutove kevilo; bekutha shoqhi shi keulo AMPEU no nongu phedave nani eno tipau pemokeuye axine ke.

²²AMPEU lau tushoqhimo keuye axine kumoke,

²³ikemu nonguno puloniqhiyi shipuzu lakhi shive keuye tipau mutsuqheino pelu masake.

²⁴“Nonguno alalo chechekeloye kutami tsayilu lakhilo nonguno chunishi ke thaqhu atsayithi chulu nani, ikemu nonguye jolabo kiu lomu tipau supusu wuve kevilo.

²⁵Nonguno alalo cheche kelo kutami ashothi lu lakhilo nongu uno khije muxuluni keno tipaqo kumtsu chulu nani ikemu nonguye hashiwo pesu ashothibo lakhimu gholu kevilo.”