Read Sumi Naga ZAHKINIU 24 Bible Online

ZAHKINIU 24 - Sumi Naga bible

ZAHKINIU 24

¹“Kumsujukelo timi lakhino totimi lakhi sasu kughuna luveni ikemu hithiu paye li sasu ngonishi moveni kughengu pano kiu kela lono li launo alomokeu ithuluve keu shi aghiveni. Ikehu pano akughuxa kaku yepesu li tsuveni eno pa kilono li puwuve aghini.

²Tileno liye kutami kilo kulawuve aghi aye

³eno akimi akiniu ghi li lunishimove aghini eno paghi akughuxa kaku yesu li tsuveni eno pa kilono li puwuve aghini. Momu li kimi akiniu huno thive aye,

⁴khuu khuu shi aghi namu pa kimi atughiuye itaghi li sasu kughuna kithe kevilo; liye kitiqeve akepi paye kihive masake. Pano itaghi li sasu kughuna kithe aye tiye AMPEU pulou shipsave keu shinani. AMPEU nongu Lhou no nongu tsu akeu yeghilo kixikila xine tikithipu nonguye shikevilo.

⁵“Timi lakhino akithe shi kulakupu shi pesu akelo paye ghushimi kumlalo peitha kevilo momu aqha kumlapu kiu lomu peitha kevilo; paye ampe lakhi kutolo akumlapu lono pheve masake tishianguno paye akilo ngolupe eno pa nipu lopivi tsulu pelo.

⁶“Nonguno kutami vilo kiuala puna keulo nonguye tipau jeku lono pathi kutsughubo qhipuaghi pekeu shikevilo. Tishini keloye akibono pukhupe xuachekeu ikhi suwuve tsuniake.

⁷“Khuu khuumu akusami Israilmi kughasawo pa qemi shipe momu aqemi shipeniye jesuve aghi kemiye pithive masake. Hitoi shipuzu alhoksa hipau shipuhaluve nanike.

⁸“Nonguno musachekeu ayiko kusu lono suakelo Levi chinemino nongu vilo kiu pini keno tipatho vejoi shilo; ino panoqo lau akukutsu tsuvekeu papelo.

⁹AMPEU nongu Lhou no nonguno Ijip lono wuche kelo Miriam shou kiu shive keno kumsululo.

¹⁰“Nonguno kiuala timi lakhi puna keulo tipau ghenguno aphimini ogholo qhipuaghiniye shi keu nouno pa kilo ilono luniye shikevilo.

¹¹Noye khalauno ngokhelo eno pa pelo tipau olau supeghi pelo.

¹²Pano kumlhomi shi aghi aye putho loye tipau qhiluve kevilo;

¹³kijili atsutsu tipau pa tsuchilelo tishianguno pa pelo tipau uzu lukepu shipelo. Tishiaye pano amlo kiqi shinani eno AMPEU nongu Lhou ye nongu lau amloqi nanike.

¹⁴“Kumlhomi aqe kiqemi pishiqhi kevilo paye akusami Israilmi shi aghina momu nowu taunlo xuakemi inaghami lakhi shi aghi pinamu.

¹⁵Ghulo lakhilo tsukinhe ilomphi lono tipa tsala jume pa tsuvelo; paye pisa avehupu shi anike eno tipau ithulunike khe anike. Nonguno pa tsumo aye pano AMPEU lau nongu ghenguno ighamuku pinani eno nonguye axine shive keu kuyiqu shive nani.

¹⁶“Atianulino heqhi buqhikeu shiveke ghenguno apuaza heqhi pithi kevilo eno apuazano heqhi buqhi keu ghenguno panoqo tianuli heqhi pithive kepu kumo; timi lakhiye pa likhi pano heqhi buqhive keu ghengulo likhi no pithi kepuke.

¹⁷“Inaghami ngo mighimgha chipiu ikhiluvetsu kevilo eno topu chimemi lakhino pisa nalukeu ghenguno tipau thelilo aphimini qhipuaghini keu lukevilo.

¹⁸Nonguye Ijip lo aquaxemi shi ache eno AMPEU nongu Lhou no nongu kuqhophe kepi kumsululo; highenguno ino nongu lau ahza hipau tsu anike.

¹⁹“Nonguno aghi ghokutsu kelo ghope qhikeu hami puighimono qhive aye tipau lunike idesu wukevilo; tiye inaghami ngo mighimghami eno topu chimemi ghenguno qhive tsulo, tishianguno nonguno mlakeu thwokha kumtsulo AMPEU nongu Lhou no kumghatsu nanike.

²⁰Nonguno Oliv xathi ghuthu lakhi xoluve kethiuye tilehi qhive keu itaghi lukithe nike wukevilo; tipaqoye inaghami ngo mighimghami eno topu chimemi ghenguno ke.

²¹Nonguno atsayithi ghuthu lakhi xoluve kethiuye atsayibolo ghuthu akiniu xukidejuwu kevilo; atsayithi qhive aghi keuye inaghami ngo mighimghami eno topu chimemi ghenguno ke.

²²Nonguye Ijip lo aquaxemi shi ache kepi khilemu kumsuma kevilo; highenguno ino ahza hipau nongu tsu anike.”