Read Sumi Naga ZAHKINIU 25 Bible Online

ZAHKINIU 25 - Sumi Naga bible

ZAHKINIU 25

¹“Israilmi mikini atsa kughanike kughakilo wukelo milakhiye pimimo eno lakhiuno kuquvekeu pitsu kelo,

²ti kuquvekeu timi huye ghaqhinikeu shi xathavetsu aye, kughakuthauno timi tipau pelo agi pishiqhope ihozu pelo eno pa ghaqhi pelo. Kihe khije hekepu keno tiye pano kiu lhoksa shive keno tipau kiqi lono helo.

³Ghuthu lhobidi kutolo likhi pa ghaqhi lunani ikemu tinguno alau hemoni; tinguno alau pahe aye aqha zulono pa shikukujove ake.

⁴“Nonguno amshitsu sasu athi qophe akelo tipau kichi khave tsukevilo.

⁵“Athikuzumi mikini aki-alu lakhi kumtsa xuache puzu milakhiye anu shimono thive aye pa nipu achimeu huye abolomi nguno kutami sasu kulawuve pekepu kumoke; akithiu thikuzuu kumlapu sajeye li sasu kughuna kepuke.

⁶Pamano anu atughiu punu keuye akithiu nu kepi kihivetsu masake tishianguno Israil lo ti akithiu she-amzu achepenike.

⁷Ikemu akithiu thikuzuuno li sasu kughuna nishimo aye liye taun lo sakiphemiqo gizulo wuno ishi pilo, ‘Ikimi thikuzuuye pano shikepu shi akeu shimoe; paye Israil lo pamu polokughukomi qhitsumo pi anike.’

⁸Tileno taunlo sakiphemino pa kupuwulo eno pa putsalo. Tishi kethiu ghi paye li sasu kughunamo piaye

⁹taunlo sakiphemi gizulono lino pa phivilo wupuzu pa pukhu kuqho lakhi sujoluve tsulo eno pa gilo musute pukulo eno ishi pilo, ‘Timi khuuno pamu ghenghuno atikughuko tsumoni keno timi tikithipu lau hikithipu shichenike.’

¹⁰Israil lo timi tipauno bolomi pesu, ‘Apukhu kuqho xaluvetsu keu bolomi’ ipi ithi acheuve nanike.

¹¹“Timi mikini kichighi akelo milakhi nipuno likimi saphuniaye kutamiu phighu tsuquluvetsu aye,

¹²li kimiye kevilo ikemu liu micheve tsulo.

¹³“Mighi kepu tuqu ngo abohu peitha kelo nonguye pishiqhi kevilo.

¹⁵Amikuchou mighi kepu tuqu ngo abohu peithalo tishianguno AMPEU nongu Lhou no nongu tsu akeu yeghilo nonguye axu shulu nanike.

¹⁶Pishiqhi kemiqoye AMPEU no mithi chenike.

¹⁷“Nonguno Ijip lono ipeche kelo Amalekmino nongu lau kiu shikeno kumsululo.

¹⁸Panonguye Alhou sukumsa kuhae ikehu nonguno qeive eno akulhoshive kelo panonguno azupouno nongu haleighike eno athiu ithaumlano chekemi kumtsu ghiqhive tsuke.

¹⁹Tighenguno, kughou AMPEU nongu Lhou no ayeghi nongu tsuveni keno eno no ghumi nongu suhope akemi kumtsu launo nongu xapheluveni keno, thebeino Amalekmi kumtsu pithikhaveni keu ithilo, tishianguno khuu pelomu panoqo kumsulu pemonike. Hipau kumsuma kevilo!”