Read Sumi Naga ZAHKINIU 27 Bible Online

ZAHKINIU 27 - Sumi Naga bible

ZAHKINIU 27

¹Tipathiu Muse no Israil lo sakiphemi sasu kumtsa ngo puzu timiqo vilo pi, “Ishi tsalalo akukutsu tsa ino nongu tsu akeu kumtsu papelo.

²Nonguno Jordan katha iku puzu AMPEU nongu Lhou no ayeghi nongu tsukeulo iloluke tsalalo nonguye atu pha kije ghope qhilo eno tipaqoye aghani pesu nudalo,

³eno tipaqo shou ayezah ngo akukutsu hipaqo kumtsu yepukulo. Nonguno kinikulu eno aghuma akeu yeghi AMPEU nongu puasu Lhou no nongu lau tushoqhive keulo iloluni keno

⁴eno nonguno Jordan tuxau toluveni keno atuqu hipaqo pesu Ebal Toghi lo qhilo; ino ishi tsalalo nongu lau akukutsu tsuve ke toi shilo eno aghani pesu tipaqo nuda lo.

⁵Atu khipaqo shou ayikhumu kumu chishi puku mphi keno tipaqo pesu akiptia lakhi mlalo,

⁶kughengu nonguno AMPEU nongu Lhou ghenguno akiptia kiu shini keno tiye atu yethamo keu pesu shimaye sake. Tipaulo nonguno agha shikeu gho pesu piti kepu shilo,

⁷tilehino nonguye kuposhukulu kumllagho pesu agha shino chulo eno AMPEU nongu Lhou gizulo shikimthilo.

⁸Aghani pesu nuda keu tuquqo shou Alhou yeza tsalothi kumtsu mtsumishei yepukulo.”

⁹Tileno Muse no Levi laghami achinemi sasu ngo puzu Israilmi kumtsu vilo pi, “Israilmiqo, amlo tsuqhiyi shino itsa ini tsulo. Ishi tsalalo nonguye AMPEU Alhou wu timiqo shiluvae;

¹⁰tighenguno pagho lulo eno ishi tsalalo ino nongu tsu akeu yezahqo kumtsu pelulo.”

¹¹Tileno Muse no Israilmi vilo pi,

¹²“Nonguno Jordan katha ikuve kethiu timiqo shou kukumgha betsu akelo alagha hipaqo Gerizim toghilo puthugholo: Simon, Levi, Juda, Isakhar, Josef eno Benjamin.

¹³Musuinibe akelo alagha hipaqono Ebal Toghilo puthugholo: Ruben, Gad, Asher, Zebulun, Dan eno Naftali.

¹⁴Levimino ighamuku atsa hipaqo pilo:

¹⁵“‘Timi khuuno asu atu momu ayi pesu ajulho shisuno tipau mllani keno Alhou no musuini keu pa shou ani; AMPEU ye ajulho mllakeu mithi chenike.’ Eno timi kumtsuno khochileni, ‘Amen!’

¹⁶‘Timi khuuno papu momu aza gihumoni keno Alhou no musuini keu pa shou ani.’ eno timi kumtsuno khochileni, ‘Amen!’

¹⁷‘Timi khuno akusami lughi-tusho ikhikiqeni keno Alhou no musuini keu pa shou ani.’ Eno timi kumtsuno khochileni,’Amen!’

¹⁸‘Timi khuuno anhethi kighichemi akumolau sabideni keno Alhou no musuini keu pa shou ani.’ Eno timi kumtsuno khochileni, ‘Amen!’

¹⁹‘Timi khuuno inaghami ngo mighimgha eno chimemiqo chipiu shipuhave tsuni keno Alhou no musuini keu pa shou ani.’ Eno timi kumtsuno khochileni,’Amen!’

²⁰‘Timi khuuno papu nipu sasu ashiaji kuqha puzu papu shiputhani keno Alhou no musuini keu pa shou ani.’ Eno timi kumtsuno khochileni, ‘Amen!’

²¹‘Timi khuuno lhoxu kutau sasu kughupani keno Alhou no musuini keu pa shou ani.’ Eno timi kumtsuno khochileni, ‘Amen!’

²²‘Timi khuuno pa chelimi sasu ashiaji kuqhani keno Alhou no musuini keu pa shou ani,’ Eno timi kumtsuno khochileni, ‘Amen!’

²³‘Timi khuuno pa nikishiu sasu ashi aji kuqhani keno Alhou no musuini keu pa shou ani.’ Eno timi kumtsuno khochileni, ‘Amen!’

²⁴‘Timi khuuno tuqhouno timi ghiqhiveni keno Alhou no musuini keu pa shou ani,’ Eno timi kumtsuno khochileni, ‘Amen!’

²⁵‘Timi khuuno pimimo kemi heqhinike pisa luni keno Alhou no musuini keu pa shou ani.’ Eno timi kumtsuno khochileni, ‘Amen!’

²⁶‘Timi khuuno Alhou yezah eno akukutsu kumtsu papelumoni keno Alhou no musuinikeu pa shou ani.’ Eno timi kumtsuno khochileni, ‘Amen!’ ”