Read Sumi Naga ZAHKINIU 3 Bible Online

ZAHKINIU 3 - Sumi Naga bible

ZAHKINIU 3

¹“Tipashelo, ninguye ahuu kudau Bashan toqhalo iqesu wuke, ike Akukau Og no pawu timiqo sasu Edrei taun phivi lono nisasu aghu shinike ipeghi.

²AMPEU no ivilo pike, ‘Pa msa kevilo. Ino paghi pawu timi eno pa ghakhu kumtsu nongu tsu nanike. Nonguno Heshbon lo ayehkipeu, Amarimi kukau Sihon lau kishi shitsu keno pa lau tipaphi shitsulo.’

³“Tighenguno AMPEU no Akukau Og ngo pawu timiqo ghi niulo suvetsuke eno ninguno panoqo kumtsu ghiqhiveke.

⁴Tipamtsa ninguno pawu taun kumtsu khasupe leluve, ninguno lumokeu lakhimu kuhaveke. Kumtsu kelo taun lhotsugho ninguno khasupe leluveke, Bashan lo Akukau Og no ayehpe chekeu Argob toghiqha kuchopuke.

⁵Taun hipaqo kumtsu qhemghai putusukeu ngo khagho no bothasupe ake eno khagho qoye akhaduno khakeuke, eno tilehi aphu putumokeu ghi kutomo ake.

⁶Ninguno taun kumtsu kutsaleve eno kiptimi, totimi eno atianuli kumtsu pithi khavetsuke, tiye Heshbon lo Akukau Sihon wu taunqolo ninguno shivetsuke toi shitsuke.

⁷Ninguno atsu-aqu luve eno taunqo xulepuwuve ke.

⁸“Tipa ghulokilo Amarimi akukau hupama launo Jordan kipelau ayeghi akeu, Arnon ghoki lono Hermon Toghi kutolo akeu ninguno luveke.

⁹(Hermon Toghiye Sidonmi Sirion ipi cheke.)

¹⁰Bashan lo akukau Og ghakhuqha kumtsu ninguno luveke, tiye atomqalo aphughi akeqo ngo Gilead eno Bashan tokujoqhalo Saleka ngo Edrei taun kutolo ke.”

¹¹(Akukau Og ye Refaim gholo ashekhauke. Pa kumobo ye atuno shike, tiye aqhalo akimighi peitha chekeu kiqiloye akushulau miter bidi eno akijelau miter kini pahi shike. Tiye itehi ghi Amunmi phughi Raba lo ithulu chephi ke.)

¹²“Kughou ninguno ayeghi pighiluve keno Arnon ghoki phivilo Aroer taun nguno aghakhu ahuu akeu eno Gilead naghuto qha aqha hami eno tipaulo aphughi akeqo pesu Ruben ngo Gad laghami ino kophetsuke.

¹³Manase lagha tuxami lau Gilead naghuto qha kutau akeqo eno Og no ayehpeche keu Bashan kumtsu ino panoqo kophetsuke, tiye Argob tokujoqha kumtsuke.” (Bashan ye Refaim yeghi ipi ithi acheke.

¹⁴Manase laghamino Jair no Argob tokujoqha luveke, Bashan ye Geshur ngo Maka lughi kutolo ke. Pano aphu tipauqo pesu paje kuvetsuke eno itehi kutolo Jair phuqo ipi ithi achenike.)

¹⁵“Manase laghalo Makhir limi lau ino Gilead kophetsuke.

¹⁶Ruben ngo Gad laghami lau Gilead ghakhu lono Arnon ghoki kuto ino kophetsuke. Aghoki muta lono apeu kudauno panoqo lughike eno ahuu panoqo lughiye Jabok ghoki, tipau chopu hamiye Amunmi lughi shiacheke.

¹⁷Kulolau panoqo ghakhuye Jordan kutoke, ahuuno Galil Zughi kutoke eno kipelauno Pisga Toghi pukhu kuxa kutoloke.

¹⁸“Tipamtsa ino kutsukeu tsa hipaqo pesu panoqo tsuke: ‘AMPEU ningu Lhou no nongu pelo ngolu penike ayeghi hipau Jordan kipela kudau akeu tsuve ake. Tighenguno aghu shikithimino ananu pipeno Jordan tuxatsau puwulo, eno Israil shiayeh kutamiqo zuu puwulo eno panoqo pelo pano yeghilo ngolupenike kuphulo.

¹⁹Nongu nipunuli eno atsu-aqu kumzapu akeu ino ithi anike tipaqoye ino nongu kophetsuve keu taunqolo athiu ngove pelo.

²⁰Nokusami Israilmi kutami no Jordan kulolau AMPEU no ayeghi panoqo tsuakeulo ngoluvemoke kutolo eno AMPEU no panongu pelo iqunei xuluve pemoke kutolo kuphulo, tiye pano hilau nongu ghenguno shivetsu ake. Tipa thiuno nonguno aghakhu khipau ino nongu kophetsu akeno tipaulo ideighilu nanike.’

²¹“Tishieno ino Joshua kutsuke: ‘AMPEU nongu Lhou no akukau Sihon ngo Og pama shou kiu shi keno nonguye ti kumtsu ithuluvae eno nonguno lewukemi yeghilo akemi kumtsu shou tipatho shinanike.

²²Tighenguno panongu msa kevilo kughengu AMPEU nongu Lhou no nongu ghenguno aghu shinanike.’

²³“Tipa ghulokilo ino tsaqui inikhuke,

²⁴‘O Akuka akumto Lhou, ino ithi anike, nono akumzapu kumla shiniye kuto akeu hukuthu likhi ipiye anike. Kungughalo na ayeghilo namu nono akughushu kumla shivekeu kiu lhou nomu tipau shimlake!

²⁵Ipelo Jordan katha ikupelo, O AMPEU eno hu tuxau ayeghi kivi ithulu pelo, ti jukivi ghakhu qha eno Libanon naghutoqo jupelo.’

²⁶“Ikemu nongu ghenguno AMPEU ye ishou axuideveke eno itsa initsumoe. Tipa zuqhulo pano pike, ‘Lumkhavae! Tipau pikide kevilo!

²⁷Pisga Toghi kutsuqalo ikulo eno ahuu apeu, kipelau eno kulolau jupuwulo. Nono kiu juni keno tsaqui jukutolo kughengu noye khilemu Jordan katha ikumo nani.

²⁸Akukutsu tsa Joshua tsulo. Pano kumsupu akeu shikumtolo kughengu pano timiqo sakipheu shieno nono ithulu akeu yeghiqhalo ngolu penike sawu nanike.’

²⁹Tighenguno ninguye Bethpeor taun ghungulo akhilalo ngoveke.”