Read Sumi Naga ZAHKINIU 30 Bible Online

ZAHKINIU 30 - Sumi Naga bible

ZAHKINIU 30

¹“Ino itehino nongu pelo kumgha ngo musuini kuma dolo lakhi kishelu penike tsuvae. Kughono hipaqo kumtsu nongu shou ikughini keno AMPEU Alhou no khilehi nongu apanagha puwuveno ashiayeh kutami gholo nonguye xuauveni keno tileno kishelu penike ino tsukeu nonguno kumsulu nani

²Nongu eno nopolo kughukomino AMPEU lau ide ighi aye nongu mlo kuchopu tsu puzu ishi tsalalo ino nongu tsu akeu zah hipaqo pelu aye,

³tileno AMPEU Alhou no nongu shou amlo ighiqhiyive nani. Pano khilehi nongu apanagha puwuve keno tipaqo shiayeh launo nongu sachile saghi nani eno pano itaghi nongu pelo axukivi shilu penani.

⁴Nonguye ayeghi cheku putosuu halepuwuve aghi namu AMPEU Alhou no nongu kumtsa kumqono nongu sachile saghi nani.

⁵tishianguno nongu puasuno khilehi ache keno tipau yeghi itaghi amheghi shi pighiluve nani. Pano nopuasu nguno alaushi nongu pelo kinikulu shilupe no timi kumzapu shilupe nanike.

⁶AMPEU Alhou no nongu eno nopolo kughukomi lau aghokulu mlo tsu nani tishianguno nongu mlo kuchopu pesu pa qhuivulu nani eno ayeghi tipaulo tishi xu acheu luve nani.

⁷Pano musuini keu hipaqo kumtsu noghumi no mithino noqoda chekemi shou xupukuve tsu nani

⁸eno nonguno itaghi pa gholu kitheve nani eno pano ahza tsukeu ishi tsalalo ino nongu tsuakeu kumtsu pelu nani.

⁹Nonguno mlakeu thwokha kumtsulo AMPEU no kinikulu shilupe nani; nonguye atianuli kutomo shilu nani, atsu-aqu kutomo anani eno nongu lu lono tuxatini kumzapu ipeghino pithi nani. Pano nongu puasuqo kinikulu shitsu nishi ketoi nongu pesu kinikulu shitsuni keuno pa lokivi shive nani.

¹⁰Ikemu nonguye pa gholu mayesake eno pawu akukutsu kaku hipaulo ayezah yepe qhipuakeu kumtsu pelulo. Nonguye nongu mlo kuchopu pesu pa lau xaide ighimasake.

¹¹“Ishi tsalalo ahza khipau ino nongu tsu ani keno tiye ighono kushokutsu kumoe momu nonguno tomlakepu kumoke.

¹²Hiye atsutsu tohilo ani ke kumoe. Nonguye ishi iniju kepu kumoke, ‘Khuuno kunguu iku no ni ghengu suqighi tsu nani kya? tishianguno ninguno tipau chilu puzu papeluni ke!’

¹³Momu tiye azughizu tuxa kudau anike kumoe. Nonguye ishi iniju akepu kuhake, ‘Khuuno azughi zu katha iku puzu nilau sughi tsu nani kya? tishianguno ninguno tipau chiluno papeluni ke!’

¹⁴Moe, tiye hilau nongu gholo anike. Nonguno tipau ithi ani eno pilu nanike tighenguno itehino tipau gholulo

¹⁵“Ishi tsalalo ino nongu pelo akivi ngo alhoksa kuma dolo eno akuxu ngo akithi kuma dolo kishelu kepu tsu ani.

¹⁶Nonguno AMPEU Alhou no ahza tsukeu, khipau ishi tsalalo ino nongu tsuani keno tipau papelu aye, nonguno pa qhuivu, pa gholu eno pa yezah kumtsu pelu aye tileno nonguye kinikulu shi nani eno timi kumzapu shiayeh shi nanike. AMPEU Alhou no nonguno ngolu niye kuto akeu yeghilo kumghatsu nani.

¹⁷Ikemu nonguno hebide eno initsumono kutau lhouqo mllani keulo sawuve pe aye,

¹⁸nonguye kutsaleve nani, itehi eno hileno ino nongu ghutuve anike. Jordan kathasu ayeghi hukukuu akeu nonguno ngoluniye akeulo ado kushuwa xumlave nani.

¹⁹Ino itehino nongu pelo akuxu ngo akithi kuma dolo, Alhou kukumgha ngo Alhou wu musuini keu kuma dolo kishekulupu tsuani eno nonguno kishelu keulo thopi shipenike ino kungugha ngo ayeghi kusu ani. Akuxupu kishelulo.

²⁰AMPEU nongu Lhou qhuivulo, pa gholulo eno pa lau amikucho shilo, tishi aye nongu eno nopolo kughukomi pano nopuasu Abraham, Isak eno Jakob tsuni keu shi tushoqhive keu yeghilo kushuwa xulu nanike.”