Read Sumi Naga ZAHKINIU 33 Bible Online

ZAHKINIU 33 - Sumi Naga bible

ZAHKINIU 33

¹Kukumgha hipaqoye Alhou wu timi Muse no pano thini ke zulono Israilmi shou pipuku tsukeu ke.

²AMPEU no Sinai Toghi lono ighi; tsukinhe toi pano Edom shou ithughi eno Baran Toghi lono pawu timiqo shou yepuvue. Kungumi 10,000 pa gholo ae, pawu ajeu ami kuiqu lakhi ae.

³AMPEU no pawu timiqo qhuivulai eno pawu shiluve kemiqo susholue. Tighenguno ninguno pa pukhu phivilo itsaiqi eno pa zah kutsu gholue.

⁴Muse no ningu tsukeu Yezah ninguno aghokulu shi, nishiayeh no kike puache keu mheghie.

⁵AMPEU no pawu timi Israil shou akukau shiluve tiye pano lagha eno sakiphemi kutsuno kumqoluve.

⁶Muse no Ruben lagha ghili pipuani: “Ruben ye aghuloshi aghinamu khilemu thiuve pemoniu.”

⁷Juda lagha ghili pano hi pi: “AMPEU, panoqono kuphu lepi ighamuku keu initsulo; Alagha kutami gholo itaghi panoqo sukuqhalu pelo. Panoqo ghenguno aghu shitsulo, AMPEU, Pano ghumi sasu shiakeulo kuphulo.”

⁸Levi lagha ghili pano hi pi: “AMPEU, nono Urim ngo Thumim lono opulou pephepiye, tiye amikucho shi oqeche kemi Levimi vechewo; Massa lo nono pano pejukeu lo suju, Meriba lo azu akeulo panoqoye kuchou shiaghie.

⁹Panonguye kumzapu oqhoqhu keu piye, tiye apuaza, athikuzumi momu atianuli nguno alaushi. Panonguno nono ahza tsukeu gholu eno owu puloshoqhi lau amikucho shie.

¹⁰Panonguye onuliqo oYezah gholu penike shika nani: Owu akiptialo panonguno heqhi mllakeu shi nani;

¹¹AMPEU, panoqo lagha mutotoi thuwulu pelo; Panonguno kiu shikeno tipaulo amlo kiqi shitsulo. Pano ghumi kumtsu chine qhivelo; Tipaqo pelo khilemu idethughi kithe pekevilo.”

¹²Benjamin lagha ghili pano pitsu: “Alagha hipauye AMPEU no qhuivu eno susho cheni; Pano atsala kupujulo panoqo khekuto cheni, panoqo mtalo pano ngo acheni.”

¹³Josef lagha ghili pano pitsu: “AMPEU no tsutsughu pesu pano yeghi kumghatsu peni eno ayeghi qhou zu pesu kumghatsu peniu.

¹⁴Pano yeghiye tsukinheno phupinivekeu xathino chhi peni, atusho atsu-tsulo axathi akiviuno kinikulu shipeni.

¹⁵Panoqo wu kha-ghino achekeu toghiqoye akikishe xathino nhachhi peni.

¹⁶Pano yeghiye akivi jelino chhitoi peni, AMPEU no alo akeu huno kumghalu peniu, Asu minipho lono putsa keu huno. Kukumgha hipaqo Josef lagha lau ighi peni, kughengu paye pa thikuzumi gholo sakipheue.

¹⁷Josef ye amshitsu kumto, Aghalo mishitsu kibo paphie. Pa kiboye Manasse lo qhethonhe jejehi akeqo Efraim lo qhethonhe jejehi akeqoe. Tipaqo sasu pano ashiayeh kutami qodaqhi eno ayeghi shekichi kutolo halepuwuve.”

¹⁸Zebulun ngo Isakhar lagha ghili pano pitsu: “Zebulun no azughilo lhidi shikeulo heshelu peni, Isakhar wu kinikuluye akilo alau ikowolu penie.

¹⁹Panonguno pano wu naghutolo inaghami kusaghi, Agha shikeu achipiu pesu tilano mllae. Panonguye azughi lono pano wu kuakini ithulu cheni, Azumuku phivilo asaye lono ithulu cheni.”

²⁰Gad lagha ghili pano hi pitsu: “Alhou sheqhelo, panoqo lughi akuloghi shitsukeu. Gad ye abongushu toi timiqo kheke Au momu aboghe suthaluveni ye.

²¹Panonguno aghakhu akivi pano sala luve; Sakipheu saje pesu pano sala shitsu. Panonguno AMPEU yezah eno ahza tsukeu agholu. Tiye Israil sakiphemi kuhokumqo kelo.”

²²Dan lagha ghili pano hi pitsu: “Dan ye abongushu toi alhothe; Pano Bashan lono ika ipeghie.”

²³Naftali lagha ghili pano hi pitsu: “Naftali ye AMPEU no akivishi qhuivu keuno kinikulu shi kumghavetsue; pano yeghiye Galil zughi lono apeu kutolo to anike.”

²⁴Asher lagha ghili pano hi pitsu: “Asher ye alagha kutami nguno alau kukumghapu. Paye pa thikuzumiqo kumtsuno heivu keu shipeni,

²⁵Pawu taunqoye ayi khaghono susholu peni, eno paye pulhapujulo ithamono apeniu.”

²⁶Israilmiqo, alhou kiunomu nongu Lhou toimo, Paye atsutsu kathasu qhivutsuniyi chewu, khungkusu shou ikupuzu nongu kuphu nike cheni.

²⁷Alhou ye pulhapujulo nowu sushokulu shi acheni; pawu lhokta uno nongu puqhe cheni. Nonguno azuu haighi kelo pano noghumiqo haphevetsu, nongu vilo kumtsu kutsalevelo pie.

²⁸Tighenguno Jakob polo kughukomiye iqughai xulu cheni, athi eno atsasyi-ji chhitoi akeu yeghilo ithamo, tipau loye atsutsulo atsuzuno ayeghi putsatsu cheni.

²⁹Israil, noye kiu toi alokivipu kela Otoikemi milakhimu kuhae AMPEU no xalukeu shiayeh lakhie. AMPEU ampino ozuto eno ozuta, osusho eno tokulu otsunikeue. Oghumi qono kimiyekutu tsulopi oqhuiniju ighi nani, nono panoqo nedaqoda nani.