Read Sumi Naga ZAHKINIU 5 Bible Online

ZAHKINIU 5 - Sumi Naga bible

ZAHKINIU 5

¹Muse no Israilmi kumtsu kukumqono panoqo vilo pike, “Israilmiqo, ino ishi tsalalo ayezah nongu tsukeu kumtsu inilo. Tipaqo kumtsu ithitoi shilo eno nonguye tipau pelulo.

²Sinai Toghilo AMPEU ningu Lhou no puloshoqhi lakhi shike,

³tiye ningu papunoqo likhi sasu shike kumono ishi tsalalo ningu xuakemi sasu ghi shike.

⁴Naghuto tileno AMPEU no agi kinheqheno ami lono nongu putsake.

⁵Ino tipa ghulokilo nongu eno AMPEU dolo puthughono pano kiu pikeno nongu vilo pike kughengu nonguye ami musaveke eno naghutolo ikumoveke. “AMPEU no pike,

⁶‘Niye AMPEU nongu Lhou. Ijip lono nongu xaphelukeu, nonguye tilau aqemi shiacheke.’

⁷“‘Inguno alhou kutau mlla kevilo.

⁸“‘Nonguye atsutsulo akeu momu ayeghilo akeu momu ayeghi qhou azulo akeu julho khilemu shipe qhikevilo.

⁹Asu-atu Ajulho lau itsaiqi momu tipau mllakevilo, kughengu niye nongu Lhou AMPEU ke eno niye isasu kusuxani kemi lau kutuu mlae. Imithiche kemi shou eno pano polo kughukomi tiqheli akuthuu abidiu kutolo ino aghime sughi cheni.

¹⁰Ikemu iqhu chekemi eno iyezahqo papelu chekemi lau tiqheli qhethonhe kutolo iwu kikimiye piye chenike.

¹¹“‘Alhoksa vehulo ije peitha kevilo, kughengu ni AMPEU nongu Lhou ye khunono ije peitha pusani keno tipano ghime nanike.

¹²“‘Sabat pine pelulo eno tiye akimthe shi pechelo, tiye ni AMPEU nongu Lhou no ahza nongu tsuveke toi shilo.

¹³Nokumla shinike ghenguno atsala tsugho ani,

¹⁴ikemu atsala akutsuniuye akulhokiqhi tsala ikhiphepe itsuvekeu ke. Nongu na nongu tianuli na, noqemi na, notsu-aqu na momu inaghami noghakhulo aghikemi pinamu tipa tsalalo khuunomu mla kepu kumoe. Noqemighi nongu toi akulhoqhi masake.

¹⁵Nonguye Ijip lo aqemi shi achekepi kumsululo, eno ni, AMPEU nongu Lhou no ikuka kumto kije pesu nongu xapheluke. Tighenguno ino nongu vilo Sabat pinyilo pi ahza tsu anike.

¹⁶“‘Opu oza gihulo, ni AMPEU nongu Lhou no ahza tsuke toi shilo tishianguno noye thwokha kumtsu akivipu shilu peni eno ino nongu tsuakeu yeghilo nonguye axushulu penike.

¹⁷“‘Ghiqhi kevilo.

¹⁸“‘Salhashupu kevilo.

¹⁹“‘Puka kevilo.

²⁰“‘Akimki lono khuumu nguku kevilo.

²¹“‘Kutami nipu jumine kevilo; pa ki alu, pa yeghi, pa qemi, pa tsu-aqu, pawu gadaha momu pano pighi aghikeu kiumu jumine kevilo.’

²²“Ahza hipaqo kumtsu nonguno naghuto phivilo kumqo ake lono AMPEU no tsuveake. Pano ami eno khungkusu zuchiyikeu lono asutsa kuloghi shi putsa ghi ahza hipaqo tsuke eno kutau kumoe. Tipathiu pano atu pha kini shou tipaqo yepukuno itsuke.

²³“Naghuto kuchopu ami iquakelo akuzu lono nonguno asutsa chilu kelo nosakiphemi eno nolaghalo atomino ilau ighino

²⁴pike,’AMPEU ningu Lhou no pa kuloghi eno pa kimthe jukuvu ami lono putsakeu ninguno chilu kelono nipiyeke! Ishi tsala lono nino ithuluve ake Alhou no timi putsave kethiu pinamu timiye xuakulupu shilukeu anike.

²⁵Ikemu ninguye kushiepi itaghi akithi kupunu wu ani kya?Akumsapu mi hupauno ningu kutsave nanike. AMPEU niLhou no itaghi niputsake.

²⁶Akuxupu Lhou no ami lono putsakeu chilukelo timi khuala xulu puani kesha?

²⁷Muse, nono idewolo eno AMPEU niLhou no pikeu kumtsu inilo. Tithiuno ideghi puzu pano ovilo pikeu nivilo pilo. Ningu no initsunike eno pape nike.’

²⁸“AMPEU no hipatsa chilu kelo pano ivilo pike, ‘Timi hipaqono kiu piani keno ino chiluvae eno panonguye achipike.

²⁹Panonguno pulhapuju hikithipu shi igihu eno ino ahza tsukeu kumtsu gholu ke aye! Tishilu aye panongu eno pano polo kughukomiye alhokupujulo aloqhiyi achelu nanike.

³⁰Wulo eno panoqo vilo pututa phiki ghazulo idewovelo pilo.

³¹Ikemu no Muse ye hilau igholo alo eno ino iyezah ngo ahza kumtsu otsu nanike. Ayehzaqo pesu timiqo shikalo tishianguno ino tsu akeu yeghilo panonguye tipaqo pelu kepu shipelo.’

³²“Israilmi, AMPEU nongu Lhou no ahza nongu tsuvekeu thwokha kumtsu shinikeu mutsuqhei shilulo. Pa yezah lakhimu ghobide kevilo.

³³Tipaqo kumtsu pelulo tishianguno nongu lau thwokhalo akivishi alu penike eno tishi keu lono nonguno qhasuluniye akeu ghakhulo xu alukepu shinanike.”