Read Sumi Naga ZAHKINIU 8 Bible Online

ZAHKINIU 8 - Sumi Naga bible

ZAHKINIU 8

¹“Ishi tsalalo ino ayezah nongu tsukeu kumtsu amikucho shi papelo, tishianguno nonguye xulu,ikowolu eno nopuasuqo lau AMPEU no tushoqhive keu yeghi qhasupe ngolu nanike.

²Wovekeu mpe hi lhobidi kutolo AMPEU nongu Lhou no nongu sasu asayeqha vechewo ado kushuwa itsuchekeu kumsululo, tishi chekelo nongu pejunike shiluksa puwu cheke tishianguno nonguno kiu shiniye kumsupu ani keno pano ithinike eno nonguye pano ahza tsukeu papelu nani kemo keno ithiniyeke.

³Pano nongu pelo muzuthive peke eno tishieno nongu pelo chupenike mana sho tsuke nongu eno nopuasuqono khilemu chuju mphikeu chuqupu tsuke. Pano hipau shikeuye timiye xu anike achuqupu shou likhi bepe masake kumoe, ikemu thwokha kumtsulo AMPEU no pikeu shou bepe ani kepi nongu shikapiye niyeke.

⁴Ampe hi lhobidi dolo nongu phiminiye aqa shimphi momu nongu pukhu mu ingu mphike.

⁵Apu lakhino pa tianuli sakiyi saputhu ketoi AMPEU nongu Lhou no nongu shikithe eno ghime chekeu kumsululo.

⁶Tighenguno AMPEU no ahza nongu tsukeu toi shilo; Pa yezah kiqi lono xuchelo eno pa sumsalo.

⁷AMPEU nongu Lhou no aghuma yeghilo nongu sailoghini cheni, ayeghi tipauye aghoki eno azupuki akeu eno ayeghiqhou zupukino akhila ngo naghutoqolo mpa ipeghikeu ke;

⁸ayeghi tipaulo ashothi, barlithi, atsayithi, khughuthi, khaghatu, Oliv eno akhi ngozu ipeghi chekeu ke.

⁹Tilehi nonguye khilemu muzuthimo nani momu athokha shimo nani. Tipatuquqolo ayi akhani eno tipau naghutolo nonguno tamayi chhulu nani.

¹⁰Nonguno chunishi ke thaqu ithulu nani eno AMPEU nongu Lhou no aghuma yeghi nongu tsuke ghenguno pa shikimithi nanike.

¹¹“AMPEU nongu Lhou phevemo nike kutokupui shilo; ishi tsalalo pa yezah ino nongu tsu akeu lakhimu pemovekeu shikevilo.

¹²Nonguno kiu chunishi keno kumtsu ithulu akungo ki kivi shiluve kelo

¹³eno no mishi ngo bheri, nowu shuna tsandiyi eno nowu kuakini mheghi alau ikowoluve kelo,

¹⁴aqhekuza shiveno AMPEU Alhou no nonguno Ijip lo aquaxemi shiache kelono xaphelukeu hu pheve nosake.

¹⁵Akumsa kuighupu sayeqha kathasu pano nongu sawuke tile tughu kupu pighi ngo achuwapaza acheke. Qhai azu kuhake yeghi tipaulo pano nongu ghenguno atuqu kuloghi lono azu qoipeghi peke.

¹⁶Asayeqhalo pano nongu pelo mana sho chulupeke, nongu puasuqoye tipau chuqupu chuju mphikeu ke. Pano nongu pejunike akijikusa nongu shou pukuke tishianguno ashekhalo thime kivi pesu nongu kumghatsu kepu shiniyeke.

¹⁷Tighenguno nonguye nongu kuka kumtono nongu pelo kinikulu shilupe kepi khilemu kumsu kepu kumo.

¹⁸AMPEU nongu Lhou no nongu pelo kinimi shilu penike akuka tsuke pi kumsulu achelo. Pano hipau shikeuye paye nongu puasuqo sasu puloshoqhi shikeu ishi tsala kutolo amikucho shi pe acheni ke.

¹⁹AMPEU nongu Lhou khilemu pheve kevilo momu kutau lhouqo mlla eno qenike tsughusu wukevilo. Nonguno tishi aye ino ishi tsala lono nongu vilo piputove anike nonguye mutsuqhei kutsaleve nanike.

²⁰Nonguno AMPEU gholumo aye pano ashiayeh kutami khipaqo nonguno azuu haighi kelo pano kutsave tsuniye shi ani keno tipaphi lono nongu ghi kutsave nanike.”