Read Sumi Naga ZAHKINIU 9 Bible Online

ZAHKINIU 9 - Sumi Naga bible

ZAHKINIU 9

¹“Inilo, Israilmiqo! ishi tsalalo nonguye Jordan katha ikuni cheni eno nongu nguno akijeu akumtou shiayehqo yeghilo ngoluveni chenike. Panoqo phughiye akuloghike eno akuptuqoye atsutsu toni keshi anike.

²Timiqo ghi chuqumghai eno akumtoke; panonguye subosughike eno khunomu panoqo mujomla kepi pikeu nonguno chiluvae.

³Ikemu itehiye no likhi nongu ampino ithulu nanike AMPEU nongu Lhou no ami kuyiqu he chighi akeu lakhi toi nongu zuu wunanike. Nonguno azuu haighi kemtsa pano panoqo leluve nani, tishianguno pano tushoqhive ke toi nonguno panoqo halepheve nani eno payi kutsaleve nani.

⁴“AMPEU nongu Lhou no nongu ghenguno panoqo halepheve kethiu, no likhi no vilo ayeghi hipau amheghipu shilu penike pano nongu sailoghi keuye nonguno ithulu kuzupu shi aghi kehu kepi pikevilo. Moe, AMPEU no nongu ghenguno timi hipaqo halepheveniye akeuye panonguno lhoksa kughami ke hue.

⁵Nonguno akivi ke ghenguno AMPEU ye nongu pelo panoqo yeghi lupeniyeke kumoe. Pano panoqo halevetsuniye akeuye panonguno lhoksa kughami eno pano nongu puasu Abraham, Isak eno Jakob lau tushoqhi puakeu kumsupu achenike hue.

⁶Nonguno ithulu kuzupu shi aghike ghenguno AMPEU no aghuma yeghi hipau nongu tsuani kepi kumsu kevilo, khilemu tikumoke. Moe, nonguye kuthovilo kemiqoke.

⁷“Asayeqhalo nongu no kishi AMPEU nongu lhou loghu kighidevetsu keno tipau khilemu kumsuma kevilo. Nonguno Ijip qhiveke tsala lono nonguno hila ighike tsala kutolo nonguno pa hebide achenike.

⁸Sinai Toghilo ghi nonguno AMPEU loghu shikighideke, nongu kutsavepe nikeu loghu shikighideke.

⁹AMPEU no nongu sasu puloshoqhi shivekeu yepeqhikeu tu phaqo lunike ino naghutolo iqhoke. Tilau niye pucho tsala putho tsala lhobidi ngove eno kiumu chu shomoke.

¹⁰Tileno AMPEU no atu pha kuma itsuke, tiye nonguno naghuto phivilo kumqo ake tsalalo pano ami lono kiu nongu vilo pikeno tipaqo pauno yepuku puake.

¹¹Putho tsala pucho tsala lhobidi thiuno AMPEU no atu pha khikuma shou puloshoqhi yepuku pua keno tipau pesu itsuke.

¹²Tile AMPEU no ivilo pike, ‘Mtazu naghuto lono iqivelo nowu timi nono Ijip lono saipeghi kemiqoye kusakugha shivae eno alhoksa mlavae. Ino panoqo vilo kiu shilopi ahza tsukeno tipau lono tsughusu wuvae eno panonguye pano sala asu-atu julho shipe auvae.’

¹³“AMPEU no tinguno alau ghi ivilo pi, ‘Timi hipaqoye kiu toi kuthovikemi keno ino ithi anike.

¹⁴Ilakha kevilo, niye panoqo kutsakhaveni keu kumsuluvae tishianguno timi khumu panoqo kumsulu pemove nike. Tithiu ino okugha pesu panongu nguno ashiayeh kuloghi eno akuka akumtou lakhi shivetsuni ke.’

¹⁵Tighenguno ino naghuto lono ide iqighi eno puloshoqhi yepuku puakeu tu pha kini khapesu iqighi. Naghuto lono ami mili ipeghi ake.

¹⁶AMPEU nongu Lhou no ahza tsukeu nonguno ghobideve aghikeu ino ithuluve eno nonguno ayi pesu amshitsu julho shipe qhike.

¹⁷Ike tileno ino nongu gizu lono atu pha vepuwuveno kubopiniyiveke.

¹⁸Tishieno itaghi AMPEU gizulo iqi pishiqhope pucho tsala putho tsala lhobidi kutolo ihozuke eno kiumu chu shomoke. Ino hipau shikeuye nonguno AMPEU shou axine shive eno pa pelo aloghu idevepe kehue.

¹⁹Niye AMPEU loghu kighide musaveke kughengu paye nongu kutsave nike muqhumsauveke; ikemu itaghi AMPEU no itsa initsuke.

²⁰AMPEU ye Aron shou ghi shishe aloghu ideve eno pa pithive niye kutove, ike tipa ghulokilo niye Aron ghenguno inikhue.

²¹Nonguno axinepu shi qhikeu ayino shikeu mishitsu hu ino ikhiluno amilo tipau vesuve. Tishieno ino tipau kubopiniyiveno naghuto lono qoiqi akeu ghokilo tipau mukhu munohu vesuveke.

²²“Nonguno Tabera lo ngo Massa eno Kibrot Hatava lo akelo ghi AMPEU nongu Lhou loghu shikighideve tsuke.

²³Kades Barnea lo pano ahza nongu tsu no ayeghi nongu tsu akeu amheghipu shiluvelo pikelo ghi nonguye hebideke; nonguye pa pukhumoke eno pa gho hebideke.

²⁴Ino nongu ithi kelono itehi kutolo nonguye AMPEU hebide achenike.

²⁵“Tighenguno niye AMPEU zulo putho tsala pucho tsala lhobidi iqi pishiqhope ihozuke kughengu paye nongu kutsaleve niye kutokeu ino ithive.

²⁶Ino ishi inikhu, ‘Akughushu MPEU, owu timiqo, nono okuka kumto kije pesu Ijip lono xaphelu kemiqo kutsale kevilo.

²⁷Oqeu Abraham, Isak eno Jakob kumsulu tsulo eno timi hipaqono kuthovi akeu, lhoksa kugha shi akeu eno panoqo xine shou jupukutsu kevilo.

²⁸Tikumoaye, Ijipmino noye owu timiqo sasu nono panoqo tsunikeu shi tushoqhive keu yeghilo sawumlavae ipi nanike. Nono owu timiqo pithiveni aye asayeqha lo panoqo sawuke kughengu nono panoqo mithi chenike ipi panonguno pinanie.

²⁹Kughengu timi hipaqoye owu timi shipenike nono kishelu kemiqoke eno okuka kughushu pesu Ijip lono saipeghi kemiqo ke.’ ”