Read Sumi Naga JOHAN 1 Bible Online

JOHAN 1 - Sumi Naga bible

JOHAN 1

¹Inahu abothu lono Atsa ae, Atsa huye Alhou gholo ae; eno Atsa huye Alhou ke.

³Alhou no pa vechewo thwokha lhoke eno pa sumoke loye kiumu lhoqhi pe puamoe.

⁴Atsa huye pa lolo akuxupu ae, eno akuxupu hipauno timi lau akuvu sughitsu.

⁵Akuvu huno akuzulo yepuvu, eno akuzuye khilemu tipau kuzuphove mlae.

⁶Alhou no pa ghini kishimi lakhi puwu, pa jeye Johan.

⁷Pano timiqo vilo akuvu ghili pesu pinike ghenguno atsapeu lakhi shi ighi tishianguno kumtsuno pa vechewo pulu lupeniyeke.

⁸Johan ye akuvu ke kumoe, ikemu akuvu ghili pinike ighi.

⁹Hiye akuvu kuchou ke tipau kuvuno ayeghilo ighieno timi kumtsu yepuvutsu acheni.

¹⁰Atsa huye ayeghiqhalo ae. Alhou no pa vechewo tsutsu yeghi lhoke, ikeghi tsutsu yeghilomino pa ikhilumoe.

¹¹Pano pa yeghi lau ighi ikemu pawu timiqono pa ikhilumoe.

¹²Ikemu khamiye ikhilu eno pa shou pulubeke, ike tipanoqo pelo Alhou nuli shikulupu kuka pano panoqo tsue.

¹³Panonguno Alhou nuli shilukeuye timi shiaji pulou momu timi gho launo kumoe, ikemu Alhou launoke.

¹⁴Atsa huno timi lhoxu lakhi shiveno kimiyekeu eno kuchouno chhitoi xapu ningu gholo xuache. Ninguno pa kimthe jukuvu ithuluvae. Apuh gholo Anu lakhi likhi achekeu kimthe jukuvuke.

¹⁵Johan no ighamuku pa ghili ishi ashepe shitsu. Pano pi, “Ino khuu ghili pesu, ‘Khuu ithiu cheni keno paye inguno akiqheuke, kughengu ipunu mphi lono paye acheghivae’ ipi pichekeu hu pake.”

¹⁶Pawu kupukini chhitoi akeu lono pano kukumgha beghi ningu kumtsu tsuke.

¹⁷Alhou no Muse vechewo Ayezah tsuke, ikemu kimiye kini eno amikuchouye Jisu Khristo vechewo ighi.

¹⁸Khunomu Alhou ithumla aphi. Ikemu Anu khuu Alhou sasu aphiphi keno pa vechewo Alhou ye kiu toi keno ningu lau pephe piyetsu.

¹⁹Kughou Jerusalem lo Judamino achinemi ngo Levi laghami puwu puzu Johan vilo “Noye khuu kya?” ipi inijukeno pano hitoi ashepe shie.

²⁰“Niye Khristo kumoe” ipi mututuyi timi zulono pano pie.

²¹“Tishiaye noye khuu kya? Noye Elija kesha?” ipi panonguno pa iniju. Pano pi. “Niye tikumoe.” “Noye tungkupu hu kesha?” ipi panonguno iniju. “Moe” ipi pano khochile.

²²Tile panonguno pa vilo pi, “Ni puwukemiqo khochile nike ghenguno noye khukela pitsulo. Noye olikhi opesu khuuepi picheni kya?”

²³Johan no Isaya tungkupuno pipua keutsa lono hitoi khochile, “‘Timi kughunamokeu-a lono milakhino ishi ighamuku keu sutsa huke: AMPEU no wukepu laghi lakhi mzuchoyi shilo!’ ”

²⁴Ike aghinikishimi ye Farisimi no puwukemi.

²⁵Panonguno Johan vilopi, “Noye Khristo mu kumo, Elija mu kumo, momu tungkupu mu kumo aye noye kushiye baptiz shitsu cheni kya?”

²⁶Johan no panoqo khochile, “Ino azu pesu baptiz shitsu cheni, ikemu nongu gholo milakhi puthugho akeu mthano anie,

²⁷Paye ithiuno ighi, ikemu niye pa pukhu-kuqho mu kuqhotsu kuzupu kumoe.”

²⁸Jordan nguno hukudau akeu Bethani lo khilehi Johan no baptiz shitsu akeno tilehino hipaqo kumtsu shike.

²⁹Tishiwo thoghiu Jisu no Johan lau cheghikeu pano ithulu puzu pi, “Julo, Alhou wu Bheriti, ayeghiqha xine ikhipewukeu hi chenie!

³⁰Ino, ‘Timi lakhi ithiu cheni, ikemu paye inguno akiqheue’ ipichekeu huye pake, kughengu paye ipunu mphi lono acheke.

³¹Ni ampi ghi paye kiu keno mthae, ikemu ino azu pesu baptiz shitsu ighikeuye Israilmi lau pa kilethisutsu niyeke.”

³²Johan no ashepe hipau tsupuanie: “Kungugha lono Aghungu Kimthe no miqhedu lakhi toi iqighi eno pa shou ngokeu ino ithulu.

³³Niye pa mthano ake, ikemu ivilo azu pesu baptiz shitsupe nike Alhou no ivilo ishipi, ‘Aghungu Kimthe no khuu shou iqighi puzu ngokeu nono ithulu nikeno tipauno Aghungu Kimthe pesu baptiz shitsu nikeu ke.’

³⁴Ino ti ithuluvae eno nongu vilo ino ashepe shitsu anike paye Alhou Nue.”

³⁵Tishiwo thoghiu tsalani Johan no pa khopemi kini sasu itaghi tile puthugho akelo

³⁶Jisu no chesu wucheghi keu jupuzu pi, “Julo, Alhou wu Bheriti!”

³⁷Akhopemi pamano pano hipau pikeu chilu puzu Jisu papesu wuve.

³⁸Jisu no idewo pamano pa papecheghikeu ithulu puzu ishi iniju. “Nokujoye kiu phuju cheni kya?” Pamano pa khochile, “Rabbi, noye khile acheni kya?” (Hipa tsa kiqiye “Akukutsuu.”)

³⁹Pama vilo pano pi, “Ighino julo.” Ike pamano pa gholo wu eno pano khile achekeno tipau ithulu eno pa gholono tipa tsala kupuju puwove. (Tiye avelau phitsu ghuloki shiae.)

⁴⁰Johan no pikeu chilu puzu Jisu papewuvekeu pama dolo milakhi huye Andrew ke. Paye Simon Pitor pama athiazu.

⁴¹Atughushi pano pa thikuzuu Simon phuwu puzu pa vilo ishipi, “Ninguno Mesiya sasu kusholuvae” (hipatsa kiqiye “Khristo.”)

⁴²Tishi puzu pano pa sasu Jisu lau ighi. Jisu no pa ju puzu pi, “Noye Johan nu Simon ke. Oje Kefa ku-tsunie.” (Tiye Pitor ipikeu eno pa kiqiye “Atuqu.”)

⁴³Tishiwo thoghiu Jisu ye Galil lo wunikeu shi kughuve. Pano Filip sasu kusholu kelo pa vilo ishipi, “Igholo ighilo!”

⁴⁴Filip ye Bethsaida taun lono ighi. Tiye Andrew ngo Pitor pamano achekeu taun ke.

⁴⁵Filip no Nathana-el sasu kusho eno pa vilo ishipi, “Muse no Ayezah kakulo khuu ghili yepuakeno eno tungkupumino khuu ghili yeh ishikeno timi tipau ninguno phuluvae. Paye Nazaret noghami Josef nu Jisu ke.”

⁴⁶Tile Nathana-el no pa vilo ishi iniju, “Nazaret phu lono kiu akivi ipeghi kulupu ani kya?” “Ighi puzu julo” ipi Filip no pa khochile.

⁴⁷Nathana-el no pa lau cheghikeu Jisu no ithulu puzu, pano Nathana- el ghili ishipi, “Israilmi kuchou lakhi hichenike julo. Pa lolo pishikiqhi kuhae.”

⁴⁸Nathana-el no pa vilo ishi iniju, “Noye kishi puzu ni ithi ani kya?” Jisu no pa khochile, “Filip no okumphi lono nono khughuthibo qholo ake lono ino no ithuluvae.”

⁴⁹“Kutsuchekeu, noye Alhou Nue! Nono Israilmi kukaue!” ipi Nathana-el no Jisu khochile.

⁵⁰Jisu no pi. “Ino ovilo nono khughuthibo qholo ake lono noithuluvae pikeu ghenguno noye pulu ani kesha? Hinguno alau thwokha kije nono ithulu nani.”

⁵¹Pano pa vilo pi, “Ino kuchouno nongu vilo pini, kungugha khaqhive puzu Alhou wu kungumino Timi Nu shou ikuju eno iqiju akeu nonguno ithulu nani.”