Read Sumi Naga JOHAN 12 Bible Online

JOHAN 12 - Sumi Naga bible

JOHAN 12

¹Hechekulu Ghulhu shinikeu atsala tsugho akelo Jisu ye Bethani lo Lazar no achekeulo ighi. Lazar ye Jisu no akithi lono xuputhukeu huke.

²Panonguno tilau pa ghenguno alibe shipeqhitsue, Lazar ghi Jisu sasu kuchukusho shinikemi gholo ngoae eno Martha no tipau kutope qhitsue.

³Tile Maria no nard subo lono mlaphekeu axo kutsungu teli ighono amekusho abohu-kichhi peighi puzu Jisu pukhu lete tsu eno lisa pesu pa pukhu isuvetsu, ikelo teli xono aki chhitoi vechighive.

⁴Jisu khopemi gholo Judas Iskariot ipikeu Jisu pesu atheshiveni kuau huno pi,

⁵“Kushiye teli hipau ghuka 2000 lono jeno pisa pesu kumlhomi tsumo kya?”

⁶Pano hi pikeuye, paye kumlhomi kumsulu cheke ghengunoke kumoe, ikemu paye kupkami lakhi ke; pano aqowu pisabo puche eno tilehi kiu sukeno pano luvecheke.

⁷Ikemu Jisu no ishipi, “Li lokutolo, lino kiu shi anikeno ikumo qhoke tsalalo ghengunoke.

⁸Kumlhomiye pulhapuju nongu sasu achenani, ikemu niye pulhapuju nongu sasu anichemoe.”

⁹Jisu ye Bethani lo anie pikeu sutsa Judami aqokitikhino ithive eno panonguye tilau ighi. Jisu likhi juniyeke kumono pano akithi lono xuputhuvekeu Lazar ghi juniye ighi.

¹⁰Ike achinetomino Lazar ghi pithivenike kuchughuve,

¹¹kughengu pa ghenguno Judami kutomono panongu shou sakiphemi qhiveno Jisu shou pulubewuveke.

¹²Tishiwo thoghiu Hechekulu Ghulhu lo suniye timi aqokitikhi ighikeqono Jisu ye Jerusalem lo ighini chenie pikeu sutsa chilu.

¹³Ikehu panonguno amsabo loka michepe pa sasu kushoniye ighamuku wue: “Alhou Sheqhelo Ampeu jelono khuu chenikeno Alhou no pa kumghatsulo! Israilmi kukau kumghatsulo!”

¹⁴Jisu no gadaha lakhi phuno tipau shou iqae, kuchoyesulo pipuakeu kiqi shi:

¹⁵“O Zion phughi, msakevilo! Julo, okukau olau chenie, gadaha lakhi shou iqano chenie.”

¹⁶Tishiake ghulokilo pa khopemiye hipau ithikuthumono ae, ikemu kughou Jisu ye ajukuvupulo xuputhuve keno, kuchoyesulo hipau pipuakeu eno panonguno pa ghenguno hipau shitsukeu akhopemino kumsuchilelu.

¹⁷Kughou Jisu no akumoki lono Lazar kuphe eno akithi lono pa xuputhu akelo pa gholo timi akeqo huno kiu kishi shikeno pikhave aghi.

¹⁸Timi aqokitikhino pa sasu kushokeu kiqiye Jisu no amchipu kumla hipau shikeu panonguno chiluke ghengunoke.

¹⁹Tileno Farisimino lakhino lakhi vilo ishipi, “Noghi julo, ninguye kiumu shimlave ake! Julepi, ayeghiqhano pa pape cheuvae.”

²⁰Aghulhulo Alhou mllaniye iqhokemiqo gholo Grikmi khami ae.

²¹Ikehu panonguno Filip lau ighi, (Filip ye Galil lo Bethsaida phulono ighike) eno ishipi, “Akijeu, ninguye Jisu junishi ani.”

²²Filip no wu puzu Andrew vilopi eno pama wu puzu Jisu vilo pi.

²³Jisu no panoqo vilo pi, “Itehiye Timi Nu jekipipu shinikeu tuqhudo ighivae.

²⁴Kuchouno ino nongu vilo pini, athi lothi lakhiye ayeghilo ikiqi ilono thive moke thaqhuloye tilikhi patho acheni; ikemu tipauno thive aye alothi kutomo pithilu cheni.

²⁵Khunono pa likhi pa kuxu kupu nikeno tipau puhave nani; khunono ayeghi hipaulo pa kuxu kupumo nikeno lhokta kuxu ghenguno tipau pekutsulu nani.

²⁶Khuno iqe nishi keno paye ipape masae eno ino khile ani keno pa ghi tilehi igholo anani. Khuuno ihuthuni keno Ipuh no pa gihu nani.”

²⁷“Itehiye ighono imlo-kusa shivae. Niye kiu pini kela? ‘O Apuh, hipau tuqhudo lono ixaphelulo’ ipini kesha? Moe, hipau kimjipu ghenguno aghimepu tuqhudo hipaulo ino ighivae.

²⁸O Apuh, oje kipipu shilulo!” Tileno kungugha lono asutsa lakhi ishi ighi. “Niye ajekipipu shivae eno itaghi ajekipipu shi nani.”

²⁹Timi aqokitikhi tipau phivilo puthugho akeqono asutsa hu chilu eno tiye tsutsusu aniepi. Kutami khamino pikeuno kungumino Jisu putsa ipi.

³⁰Ikemu Jisu no panoqo vilo pi, “Asutsa hipauye nongu sala kethono isala kumoe.

³¹Itehiye ayeghiqha shou kughakutha ghulokike; itehiye ayeghiqha hipau shou ayehkipeu hu halepheniake.

³²Kughono ayeghi lono ni ikhiqheni keno, ino timi kumtsu sunheluve nani.”

³³Pano hipau pikeuye paye kiu kithi ghola lono thini cheni keno piyekeuke.

³⁴Timi aqokitikhino pa khochile, “Ni yezah kakulo Mesiya ye alhokupuju ache nani kepi pipuanie. Tishiaye noye kishi puzu Timi Nu ikhiqhenikeu tsa piani kya? Timi Nu huye khuu kya?”

³⁵Tileno Jisu no panoqo vilo pi, “Akuvu huye ado kitila likhi nongu sasu aniae. Nonguye akuvu aphi lono nongu kuxu xululo, tishimoaye akuzuno nongu haluvenosake; kughengu khunono akuzulo xuani keno paye khilau wucheni keno mthae.

³⁶Nonguye akuvu ake lono akuvu pulubelo, tishianguno nonguye akuvu timiqo shilu nani.” Jisu no hipau pive puzu paye chesu wuveno Judami launo itshuauve.

³⁷Panoqo zulo pano amchipu kumla kutomo shikeghi panonguno pulumoe;

³⁸tino Isaya tungkupuno pipuakeu shi kupuve: “O Ampeu, ninguno pikeu sutsa khuno pulutsu kya? Khuno lau Ampeu kukakumto pephe piye kya?”

³⁹Tighenguno panonguye pulu mlae, kughengu Isaya no highi pivae:

⁴⁰“Alhou no panoqo nhethi kighichevetsu eno panoqo mlo shikughupo vetsu, Ikehu panongu nhethino ithumla, eno panongu kukumsulo vethamla, eno panoqo shipivitsu penike ilau panonguno ideghimoe.” ipi Alhou no pi.

⁴¹Isaya no hipau pikeuye pano Jisu jekipipu ithuluke ghenguno pa ghili pike.

⁴²Tishimu, Judami sakiphemi kutomono Jisu shou pulukeu ae, ikemu Farisimi msake ghenguno panonguye piphemoe, tiye Sinagog lono hapheve nosakehue.

⁴³Kughengu Alhou no sheqhepe nikeu nguno alauno timino sheqhekeu panonguno kimiyekutue.

⁴⁴Jisu no asutsa kumgha lono pi, “Khuuno ipulu ani keno, ilikhi pulu anike kumoe ikemu paye ipuwu keu ghi pulu anie.

⁴⁵Khunono ni ithulu ani keno paye ipuwu puakeu ghi ithulu anie.

⁴⁶Niye akuvu shi-ghi ayeghiqhalo ighivae, ike khunono ipulu nikeno tipaqoye akuzulo akepu kumoe.

⁴⁷Khunono ino pikeu tsa chiluno tipau pemla nikeno, niye pa shou kughathabemo nani; kughengu niye ayeghilomi shou kughathabe nike ighike kumoe ikemu ayeghilomi xalu nike ighie.

⁴⁸Timi khunono ni ikhilumo nikeno kughakuthau lakhi anie. Ino pivekeu tsano ashekha tsalalo pa shou kughakuthau shive nani.

⁴⁹Kughengu niye igho lono pianike kumoe ikemu niye kiu pimasa eno kiutsa pimasakeno Apuh ipuwukeu huno ahza itsupuanie.

⁵⁰Ino ithi akeuno pano ahza tsukeu huno lhokta kuxu sughi cheni. Tighenguno ino kiu pikeno tiye Apuh no ivilo pilopikeu ke.”