Read Sumi Naga JOHAN 13 Bible Online

JOHAN 13 - Sumi Naga bible

JOHAN 13

¹Hiye Hechekulu Ghulhu zuloke. Jisu no paye ayeghiqha hipau qhiveno Apuh lau wuvenikeu tuqhudo tovekeu ithive! Ayeghiqhalo khunoqono pawu keno pano pulhapuju tipaqo kimiye che, eno pano ashekha kutolo panoqo kimiyeche.

²Jisu ngo pa khopemiye kijiliu ghulhu shiae. Tughamino Simon nu Judas Iskariot mlolo Jisu kichephe piyevetsu nikeu kumsuvepe.

³Apuh no akuka kumtsu Jisu ulo suvetsukeu Jisu no ithi ae eno paye Alhou launo ighi eno Alhou lau wuveni cheni kepi pano ithi ae.

⁴Ikehu Jisu no ilhuake lono ithu puzu pa phi xaqhive eno kughusuphi pesu pa po khapuve.

⁵Tishieno pano chithakhu lakhilo azu lesuno pa khopemi pukhu qhutsu eno pa po khapuakeu kughusuphi pesu panoqo pukhu isutsu.

⁶Pano Simon Pitor lau ighi kelo, Pitor no pa vilo pi, “Ampeu, nono ipukhu qhunike sheno?”

⁷Jisu no pa khochile, “Ino kiu shiani keno noye itehiye mthae ikemu hithiuno nono ithi nanike.”

⁸Pitor no pa vilo pi, “Noye khilemu ipukhuye qhupemo nani thono!” Jisu no pa khochile, “Ino opukhu qhutsumo aye noye ilaumi kumoe.”

⁹Simon Pitor no khochile, “Ampeu, tishiaye ipukhu likhi kumono i- u ngo ikutsu ghi qhutsulo!”

¹⁰Tileno Jisu no pi, “Timi khuuno azukuchhuvea keno pa pukhu likhi kumoaye paye ampi kuchopu mithe ani eno kutauye qhuakepu avehu kuhae. Nongu gholo lakhi likhino kumoaye kutamiye kumtsu mithe anie.”

¹¹Kughengu khuno pa kichephe piyevetsuni chenikeno pano ithi ae, ikehu pano, “Milakhi thono nongu kumtsu mithe anie” ipike.

¹²Jisu no akhopemi pukhu qhuvetsu puzu pa phi uluveno puzuu paalo ngoveno panoqo vilo pi, “Ino nongu lau kiu shitsu keno nonguye ithi anima?

¹³Nonguno ivilo Kutsuchekeu eno Ampeu ipi iku cheni, nonguno tishi pikeuye achipike, kughengu niye tihuke.

¹⁴Tishiaye, ni nongu Mpeu eno nongu Kukutsuuno nongu pukhu qhutsu aye, nongu ghi lakhino lakhi pukhu qhutsu kepue.

¹⁵Ino kichekipiye lakhi nongu lau qhitsu ani, ike ino nongu lau shikeu toi nongu ghi titoi shikepue.

¹⁶Kuchouno ino nongu vilo pini, aquaxemi lakhiye pampeu nguno akijeu kumoe; momu aghinikishimi lakhiye pa puwuakeu nguno akijeu kumoe.

¹⁷Nonguno hi ithi aye eno nonguno hipaqo pepimhelu aye, nongu lokivipuke.

¹⁸Niye nongu kumtsu ghenguno piamoe; ino khunoqo kishelukeno ino ithi anie. Ikemu kuchoyesulo akeu kupuve masa kehu, ‘Igholo kumtsa chukeu timi huno ishou chhophisue.’

¹⁹Hipau shimphi lono ino itehino nongu vilo pive anike, tishianguno kughono tishini keno, ‘Niye nike’ ipikeu nonguno pulu nani.

²⁰Kuchouno ino nongu vilo pini, khunono ino puwukemi ikhilu nikeno paye ni ikhilu ani, eno khunono ni ikhilu ani keno paye ipuwuakeu ikhilu anie.”

²¹Jisu no hipau pivekethiu pa mlo ghime-kusa shiveno kumtsu zulono pi, “Kuchouno ino nongu vilo pini, nongu gholo milakhino ikichephe piyevetsuni cheni.”

²²Paye hipatsa khuu mijighi piakeno akhopemiqoye avehu izuve kehu lakhino lakhi jukuto ae.

²³Akhopemi gholo lakhi Jisu no kimiyechekeu huye Jisu mumupe iqa-a.

²⁴Ikehu Simon Pitor no a-u pesu pa lau kiche puzu pi, “Hiye khuuno tishiveni cheni kela Jisu vilo inijulo.”

²⁵Ike Jisu mumupe iqa akeu akhopeu huno Jisu vilo iniju, “Ampeu, tiye khuno tishini cheni kya?”

²⁶Jisu no khochile, “Ino akulhozulo asho putsuno khuu tsu nikeno timi tipauke.” Ike pano asho tachu lakhi ikhi pesu putsuno Simon nu Judas Iskariot tsue.

²⁷Judas no asho ikhiluve kemtsa Satan no pa lolo ilove. Jisu no pa vilo pi. “Noye mtazu kiu shikepushi ani keno shilo!”

²⁸Jisu ye kushiye hipatsa pa vilo pikeno tilehi alibe chuakemi lakhi nomu tipau vethamlae.

²⁹Judas no pisabo pighiu shiche kehu Jisu ye pa vilo wupuzu aghulhu ghenguno kiu avehupu shi akeno tipaqo qhunikeu momu kiu kiumu pesu kumlhomi tsu nikeu pikughashi akhopemi khamiye kumsuve.

³⁰Ike Judas no asho ikhiluveno paye tipa mtsa khalau ipeve. Tiye putho shiae.

³¹Judas no wuve kethiu Jisu no pi, “Itehiye Timi Nu jekipipu, pephepiye anie; itehiye Alhou jekipipu pa vechewo pephepiye ani.

³²Pa vechewo Alhou jekipipu pephepiye aye, tishiaye Alhou ghi Timi Nu jekipipu pa ampino pephepiye nanike, eno paikhavino pa je pipive nani.

³³Anuliqo, niye ado kitila likhi nongu sasu anani. Nonguno iphuju puhave nani, ino Judami vilo pivekeu toi itehino nongu vilo hi piani, ‘Ino khilau wucheni keno nonguye ighimlae.’

³⁴Ahzakutsu akithe lakhi ino nongu tsu ani tiye nongu lakhino lakhi kimiyekilelo; ino nongu kimiyecheke toi nongu ghi lakhino lakhi kimiyelo.

³⁵Nongu lakhino lakhi kimiyekile aye, tileno nonguye ino kutsuluvekeqo kena ipi timi kumtsuno ithi nani.”

³⁶Simon Pitor no pa vilo iniju, “Ampeu, noye khilau wuveni kya?” Jisu no pa khochile. “Ino khilau wucheni keno noye itehiye ipapemlae, ikemu hithiuno nono ipape nani.”

³⁷Pitor no pa vilo iniju, “Ampeu, niye kushiye itehiye opapemla nani kya? Oghenguno niye ikuxu pephetsulu nanie!”

³⁸Jisu no khochile, “Noye kuchouno ighenguno okuxu pephetsuluni kesha? Kuchouno ino ovilo pini, awuduno ighanike zulo ghuthu kuthu kutolo noye imthae pinani.”