Read Sumi Naga JOHAN 16 Bible Online

JOHAN 16 - Sumi Naga bible

JOHAN 16

¹“Hipaqo kumtsu nongu vilo ino pive ani, tishianguno nongu puxakuluqhive pemonike.

²Panonguno Sinagog lono nongu hapheve nani. Aghuloki hu cheni kughou timi khunono nongu pithiluni keno paye ti shilukeuno Alhou huthulu ani kepi kumsu nani.

³Panonguno Apu mu ni mu mtha ke ghenguno panonguye nongu shou hipaqo shi nani.

⁴Ikemu ino nongu vilo hipaqo kumtsu pive ani, tishianguno kughou panonguno hipaqo shikepu ghuloki ighini keno,nongu pelo panoqo ghenguno ino pivekeu tsa kumsulu penike.” “Abothulo niye nongu vilo hipaqo thime pimoe, kughengu ino nongu gholo acheke.

⁵Ikemu itehiye ipuwukeu lau niye wuveni cheni, ikeghi nongu lakhi nomu ivilo, ‘Noye khila wuveni cheni kya?’ ipi inijumoe.

⁶Eno ino itehiye nongu vilo hipaqo thime pive kelauye nonguye amlo ghimeno chhitoi auvae.

⁷Tishiepimu ino nongu vilo kuchou tsa pini: nongu ghenguno ino wuvekeu pavi kughengu ino wuvemo aye Shikumtokutsuu ye nongu lau ighimo nani. Ikemu ino wuve aye nongu lau ino pa puwuni.

⁸Kughou pano ighini keno pano ayeghilomi vilo axine ngo amikucho eno Alhou no kughatha tsukeu ghili panonguno shipimi achekeu lhe nani.

⁹Axine ghili panonguno pimikeu lhe nani kughengu panonguno ipulumoke;

¹⁰Amikucho ghili lhe nani, kughengu niye Apu lau wuni cheni eno nonguno ni ithumlave nani;

¹¹kughakutha ghili lhe nani kughengu ayeghiqha hipau yehkipeu shou kughakutha betsu ni ake.

¹²“Niye nongu vilo thime kutomo pikepu aphi, ikemu nonguye tipaqo itehiye ithikuthunikeu sho ani.

¹³Ikemu kughono Kuchou Ghungu ighini keno pano kuchou ghili kumtsulo nongu saphepiye nani, kughengu paye pa likhi pa kutoshi pimo nani ikemu pano kiu chilu keno tipau pi nani eno thime ighiniye akeqo ghili nongu vilo pi nani.

¹⁴Pano ijepipitsu nani, kughengu ino kiu pikepu ani keno pano tipau pesu nongu vilo pi nani.

¹⁵Apu no akeu kumtsu iwuke, tighenguno ino pive keuno Aghungu huno ino kiu pikepu akeno tipau pesu nongu vilo pi nani.”

¹⁶“Ado kitila apuzu nonguye ni ithumlave nani, itaghi ado kitila thiuno nonguno ni ithulu nani.”

¹⁷Pa khopemi khamino khami vilo, pi, “Ado kitila apuzu nonguye ni ithulumove nani eno itaghi ado kitila thiuno nonguno ni ithulu nani ipikeu ngo, ‘Kughengu niye Apuh lau wuni cheni’ ipikeu hiye kiu kya?”

¹⁸Panonguno ishi pia, “‘Ado kitila’ ipikeu kiqiye kiu kya? Paye kiu piani kela ninguye mthae!”

¹⁹Panonguno Jisu vilo inijunishi akeu pano ithi ae, ike panoqo vilo pano pi, “Ado kitila apuzu nonguye ni ithumlave nani eno itaghi ado kitila thiuno nonguno ni ithulu nani” ipi ino pikeu kiqi nongu dolo inijukile ani kesha?

²⁰Kuchouno ino nongu vilo pini: Nonguye igha qah nani ikemu ayeghiqhano alokivi shi anani; nonguye amloksa shi nani ikemu nongu mlokusa hu alokivipu shive nani.

²¹Totimi lakhiye anga punu niye su akelo amloksa shicheni, kughengu lino aghime shikepudo ighi kehu; ikemu kughono anga punuluveni keno liye li ghime kumsumave cheni, tiye anga lakhi ayeghilo punusulukeu lokivi launoke.

²²Tihutoi nongu ghi itehiye amloksa shi ani, ikemu niye itaghi nongu sasu kusholuni aphi, tileno nongu mlolo alokivino chhitoilu nani, eno khunomu nongu lokivi ikhisuwuvemla nani.

²³Tipa tsala ighi kelo nonguye ivilo kiumu khumo nani. Kuchouno ino nongu vilo pini, “nonguno ije lono Apu vilo kiu-kiu khuni keno pano tipau nongu tsu nani.

²⁴Itehi kutolo nonguye ije lono kiumu khujumphike; khulo eno nongu tsu nanike, tishianguno nongu lokivi shikupulu penike.

²⁵“Kimighipiyekeu lono niye thime hipaqo pesu nongu vilo pivae, ikemu niye kimighipiyekeu lono nongu putsamo puzu mututuyi keu tsa lono Apu ghili nongu vilo pikepu tuqhudo cheni.

²⁶Tipa tsalalo nonguno ije lono pa vilo khu nani; eno niye nongu zuqhushi pa vilo ino khutsunikeu piamoe,

²⁷kughengu apuh ampino nongu kimiye cheni. Nonguno ikimiye eno niye Alhou launo ighikepi nonguno pululuke ghenguno pano nongu kimiye cheni.

²⁸Niye Apu launo ighike eno ayeghilo ighivae; eno itaghi ayeghiqha qhiveno Apuh lau wuveni cheni.”

²⁹Tileno pa khopemino pa vilo pi, “Imapi, noye itehiye kimighipiyekeu lono kumo puzu mututuyi pi ayae!

³⁰Itehiye ninguno ithiveake noye thwokha ithi ani eno khunomu ovilo iniju akepu kuhavae. Hipau lono noye Alhou launo ighikemi kepi ninguno pululuve peke.”

³¹Jisu no panoqo khochile, “Nonguye itehino pululu ani kya?

³²Nongu kumtsu pututa shelo pututa kilo apanagha halesuveno ilikhi qhivenikeu tuqhudo hu cheni eno hi cheae. Ikemu niye ilikhi ani chemoe kughengu Apuh no igholo ani.

³³Ino nongu vilo hipau pikeuye isasu kimepe akeu lono nongu pelo alokiqi apeniyeke. Ayeghilomino nongu shikimghi nani, ikemu amlo mutotoi shilo! niye ayeghiqha theqhiluvae!”