Read Sumi Naga JOHAN 20 Bible Online

JOHAN 20 - Sumi Naga bible

JOHAN 20

¹Tughakhani inaqhe zumoyi aphilo Magdala noghami Maria no akumo- kilo ighi kelo akumo-ki kichilo atuqu ake tipau tukulove aghikeu lino ithulu.

²Lino posu Simon Pitor ngo Jisu no kimiyechekeu akhopeu pama lau ighi eno pama vilo pi, “Panonguno akumo-ki lono Ampeu pewuvae, eno panonguno pa pewo khile qhivea kela ninguye mthae.”

³Tileno Pitor no akhopeu lakhiu hu sasu akumoki kudau wuve.

⁴Pamaye posu wuke, ikemu akhopeu lakhiu huno Pitor zuthave eno pano atughushi akumo-ki tolu.

⁵Pano pishipulo jukelo, tilehi aphikumtsha xachhopuakeu ithulu, ikemu paye alou ilomoe.

⁶Tile Simon Pitor no ighi puzu vejoi akumoki alou ilove. Pano tilehi aphikumtsha xachhopuaghikeu ngo

⁷Jisu kutsu nhakeu phi ishi ithulu. Nhakeu phi tipauye aphi kumtsha gholo xachhomo puzu tipau kutashi likuzu puaghi.

⁸Tileno akhopeu lakhiu, pano atughushi tokeu hughi alou ilo eno pano ti ithulu puzu puluve.

⁹Kughengu Jisu ye akithi lono xuputhuve nikeu kuchoyesulo pipuakeu panonguye tikutolo mthano ae.

¹⁰Tithiu akhopemiye akilo idewokhave.

¹¹Ikemu Maria ye akumoki khalacheu puthughope qa-ae eno lino qa-ghi akumokilo pishipulo ju,

¹²ikelauye kungumi kini metsughoyikeu phimini pepu puzu Jisu sukumo qhikeu-alo lakhino akutsu kudau eno lakhino apukhu kudau iqa aghikeu ithulu.

¹³Pamano li vilo pi, “Totimi, noye kushiye qa ani kya?” Lino khochile, “Kughengu panonguno iMpeu pewuve ake, eno panonguno khilehi pa pewo qhive keno niye mthavae!”

¹⁴Tishi pive puzu lino igho ighi kelo Jisu no tilehi puthugho aghikeu ithulu, ikemu tiye Jisu kepi liye mthano ae.

¹⁵Jisu no li vilo pi, “Totimi, noye kushiye qa ani kya? Noye khuu phucheni kya?” Tipauye aghutu kumlau kughashive puzu lino pa vilo pi, “Akijeu, nono pa pewuve aghi aye, noye khilehi pa pewo puani keno ivilo pitsulo, ino wupuzu pa pewuvenike.”

¹⁶Jisu no li vilo, “Maria!” ipikelo lino pa lau igho-ighi puzu Ibrimi tsauno ishipi, “Rabboni!” (Hipau kiqiye “Kutsuchekeu.”)

¹⁷Ikelo Jisu no li vilo pi, “Isasu kiphemla kevilo, kughengu niye Apu lau ideiku mphike. Ikemu ithikuzumiqo lau wulo eno panoqo vilo itsa pitsulo: ‘Niye iPuh eno nongu paPuh lau eno ILhou eno nongu Lhou lau ideiku cheni.’ ”

¹⁸Magdala noghami Maria no wuno akhopemiqo vilo, “Niye Ampeu ithuluvae eno pano hipaqo ivilo pike,” ipi panongu vilo pi.

¹⁹Tipatsala, tughakhani avelau akhopemiqoye Judami musake launo aki khathaveno sholokuu kumqo ae. Tile Jisu no ighino panongu gholo puthughope ngono ishipi, “Alokughuno nongu gholo apelo.”

²⁰Pano hipatsa pive puzu pa-u ngo pa jibo ishi panoqo piye. Ampeu ithulu kelo akhopemiqoye shishe alokivishive.

²¹Jisu no itaghi panongu vilo pi, “Alokughuno nongu gholo apelo. Apu no ipuwuke toi nighi nongu puwu ani.”

²²Pano hipau pive puzu panoqo shou atuthushepukuno pi, “Aghungu Kimthe sasu lulo.

²³Nonguno khuno kipimi pevetsu akeno panoqo launo tipau pevetsu ake; eno nonguno khuno kipimi pevetsumo keno panoqo launo tipau pevetsumo ke.”

²⁴Akhopemi chighikini gholo Thoma, tipau pesu Diduma ipichekeu huye Jisu ighi kelo paye panoqo gholo kuhake.

²⁵Ike akhopemi kutamino pa vilo, “Ninguye Ampeu ithuluvae!” ipi. Ikemu Thoma no panongu vilo pi, “Ino pa-ulo ayishu zaku ithulumoke kutolo eno i-u loti pesu ayishu yesuke alo suju eno pa jibolo suju moke kutolo niye pulumoe.”

²⁶Atsala tache thiu pa khopemiqoye itaghi aki sholokuu kumqope ae, eno Thoma ghi panoqo gholo ae. Ahukikha ye khapepua, ikemu Jisu no iloghi puzu panongu gholo puthughope ngono pi, “Alokughuno nongu gholo alo!”

²⁷Tishieno pano Thoma vilo pi, “O-u loti hile suju eno i-u julo; tishi puzu o-u chhopheno ijibolo sujulo. Omlo lipi kevilo ikemu pulululo!”

²⁸Thoma no pa vilo pi, “IMpeu eno iLhou!”

²⁹Jisu no pa vilo pi, “Noye ni ithuluve ake ghenguno pululu anikesha? Khunoqono ni ithumla pimu puluni keno tipaqo lokivipue!”

³⁰Jisu no pa khopemi nhekithe lono akumzapu kumla kutau kutomo shikeu kaku hipaulo yesu khape puamoe.

³¹Ikemu hile yesupe puakeuye nongu pelo Jisu ye Mesiya, Alhou Nu kepi pululu peniyeke eno tipau kupulu vechewo paje lono akuxupu alupeniyeke.