Read Sumi Naga JOHAN 7 Bible Online

JOHAN 7 - Sumi Naga bible

JOHAN 7

¹Hipa thiu Jisu ye Galil lo izu ache. Paye Judia lo izuwu nishimoe kughengu tilau Judamiqoye pa pithive nikeu shi pa phuju ae.

²Judamino Apusholo ngokeu Ghulhu kupunuve,

³ikelo Jisu thikuzumino pa vilo pi, “A-a hipau qhiveno Judia lo wulo, tishianguno nono kiu kumla shi ani keno okukutsu ikhilukemi qono ithulupenike.

⁴Kughengu timi kumtsu pelo ithipenishi aye timi khumu pano kiu mla ani keno kusuve chemoe. Nono hipaqo shilu ani keaye ayeghiqha pelo no ithi pelo.”

⁵(Pa thikuzumi ghi pa shou pulubemoe.)

⁶Jisu no panoqo vilo pi: “Ighenguye ado achipiu tomphie; nongu ghenguye kughokughomu ado achipike.

⁷Ayeghilomiye nongu mithi mlae ikemu imthi cheni, kughengu tipaqo kumla lhoksa ghili ino pitsu achenike.

⁸Nonguye aghulhulo wulo. Niye tipau ghulhulo wuni chemoe, kughengu ighenguno ado achipiu hu tomphie.”

⁹Panoqo vilo tishi pipuzu paye Galil lo ngoauve.

¹⁰Ikemu pa thikuzumino aghulhulo suniye iqhove kethiuno Jisu ghi iqho, kutami pelo pa ithipemo nike kusuuno wue.

¹¹Aghulhulo Jisu ighinimalaye Judamino pa phuju ae eno ishi iniju, “Pa khile ani kya?”

¹²Eno timi aqokitikhi gholo pa ghili ishi kughae. Khamino, “Paye timi kivimi lakhi,” ipiaye kutamino, “Tikumoe, pano timi sakughuzu chenie,” ipi piae.

¹³Ikemu khumu aqo zuloye pa ghili kuptsamoe, kughengu panonguye Judami musa kehu.

¹⁴Aghulhu shikeu tsalaqo tuxa shivekethiu Jisu no achinekilo wu eno timiqo kutsuthuve.

¹⁵Judamiqoye shishe akichiqhiveno pi,”Timi hipauye akiphikilo wumo keghi kishi no hijejehi ithi ani kya?”

¹⁶Ike Jisu no khochile, “Ino kiu pesu kutsucheni keno tiye iwu kumoe, ikemu Alhou ipuwu puakeu launo ighikeu ke.

¹⁷Khunono Alhou pulou shini shikeno tipanono ino kutsukeuye Alhou launo keo momu ilikhi ilotsu lono piani keno ithi nani.

¹⁸Timi khuuno pa likhi pa lotsu lono pini keno pa jekipipu phuchenie. Ikemu timi khuno pa puwupuakeu jekipipu phuni keno tiye akumzumi eno tipano qholoye akimki kumu kuhae.

¹⁹Muse no Ayezah nongu tsuke kumo kesha? Ikemu nongu lakhi mu Ayezah pemlae. Nonguye kushiye iheqhipithive nike phu cheni kya?”

²⁰Timiqono pa khochile. “Noye tughami ololo anie! Oheqhi pithiveniye khuno ophu cheni kya?”

²¹Jisu no khochile, “Ino akumla lakhi shi eno nongu kumtsuno tipau jupe akichiqhie.

²²Muse no nongu vilo nongu nuliqo yiko ghavelo pike ghenguno (tiye Muse no shilopikeu kumono nongu pu-asuno ti huthuke) nonguno Sabat tsala lono anu phighu yiko gha cheni.

²³Muse yezah hexatsumoniaye Sabat tsala lono anu phighu yiko gha cheni aye, kushiye Sabat tsala lono ino timi lakhi vithayi shipivike ghenguno nonguye ishou amlo ide ani kya?

²⁴Agi juno kughatha kevilo, ikemu achipiu kughakutha pesu xathalo.”

²⁵Ikelo Jerusalem lo kuami khamino pi, “Panonguno heqhipithive niye phuchekeu timi huye hike kumo kesha?

²⁶Juniwa, paye timiqo zulono atsa piani eno khumu pa shou kiumu piamoe! Khilehi nitimi sakiphemi qoye paye Mesiya kepi kuchouno ithivea kesha?

²⁷Kughou Mesiya ighini keno khunomu paye khilano ighikeno mtha nanie, ikemu timi hipauye khilano ighikeno ninguno ithi anie.”

²⁸Ike pano achinekilo kutsukelo asheshu ghi pi: “Nonguye kuchouno niithi ani eno niye khilano ighikeno ithi ani kesha? Ikemu niye ighopulou shi ighi anike kumoe. Khuno ipuwukeno paye kuchouke eno nonguye pa mthae,

²⁹ikemu niye pa ithi anie, kughengu niye pa launo ighi eno pano ipuwuke.”

³⁰Tileno panonguno pa kughaluveniye pukaputsa, tishimu khunomu pa shou a-u chhopuku moe, kughengu pa doye tomphi kehu.

³¹Timiqo gholo kutomono pa pululuveno pi, “Kughou Mesiya ighini keno paye timi hipau nguno alau amchipu kumla shilu nani kema?”

³²Farisimi ngo achinetomino timiqono Jisu ghili kugha akeu chilu kelo, aghukhemi kijemi khami pelo Jisu kughalu penike puwue.

³³Tile Jisu no pi, “Ino nongu gholo ado kitila aghini aphi eno tithiuno niye ipuwupuakeu lau wuve nani.

³⁴Nonguno iphuju nani ikemu nonguye iphumla nani, kughengu ino khile wuni keno nonguye ighimla nani.”

³⁵Judamiqono panongu dolono ishi piae, “Paye khilau wuveni cheni keno ninguye pa phumlave nani kepi anikya? Paye Grikmi phughi qolo Judami akeqo lau wupuzu Grikmiqo kutsuwuve nikeu shi ani kesha?

³⁶Pano pikeuno, ‘Nonguno iphuju nani ikemu nonguye iphumla nani’ ipi, eno ‘Ino khile wuni keno nonguye ighimla nani’ ipike, tiye kiu kiqi kya?”

³⁷Aghulhu shiakeulo atsala ashekhauno kumtsu nguno akhotou tsalake. Tipani Jisu no puthugho puzu ighamuku asheshu ghi pi: “Khukhumu tughuthi aghiaye, ilau ighieno yelulo.

³⁸Kuchoyesulo pipuakeu toi, ‘Khunono ipulu nikeno pa mlo lono akuxupu zu qoipeghi nani.’ ”

³⁹Jisu no hipau pikeuye timi khunoqono pa pulu nikeno tipaqono Aghungu Kimthe ithuluniye akeu ghili piake. Tikutolo Aghungu Kimthe ye tsumphike kughengu Jisu ye xuputhu pesu akimthejukuvu shive tsumphi kehu.

⁴⁰Timi aqokitikhi gholo Jisu no hipatsa pikeu chilukemi qono ishipi, “Kuchouno timi hipauye tungkupu huke.”

⁴¹Khamino ishi pi, “Hipauye Mesiya ke!” Ikemu kutami khamino pi, “Mesiya ye Galil lono ighini kesha?

⁴²Mesiya ye David laghami shi nani eno David no achekeu phu Bethlehem lono punu nani kepi kuchoyesulo pipuamo kesha?”

⁴³Ikehu Jisu ghenguno timiqo dolo aqo-kututashive.

⁴⁴Tipaqo khamino pa kughalu nishiae, ikemu timi khunomu pa shou a-u bemoe.

⁴⁵Aghukhumi kijemi qono achinetomi ngo Farisimi lau idewove, ikelo panoqo vilo ishi iniju, “Nonguye kushiye pa kugha saghimo kya?”

⁴⁶Kijemi qono pi, “Timi khumu pa toi atsakivi pikeu mtha aphie!”

⁴⁷Farisimi no panoqo vilo iniju kithe, “Nongu ghi pano shikughuzuve kesha?

⁴⁸Sakiphemi gholo eno Farisimi gholo lakhi nomu pa pulu chemokeu nonguye mtha kesha?

⁴⁹Timi aqokitikhi hipaqoye Muse yezah mthake, ike panonguye Alhou no ghushove keulo anie!”

⁵⁰Panoqo gholo Nikodema ghi lakhike, paye puzuu Jisu lau wukeu huke. Pano panoqo vilo pi,

⁵¹“Niyezah kiqiloye timi pa ampi launo chilumphi eno pano kiu shi puani keno phujumphi loye pa shou kughatha mlae.”

⁵²Panonguno pa khochile, “Noghi Galil lono ighikemi kesha? Kuchoyesu phukide kudajulo, Galil lono tungkupu ighi puaghikeu noye ithulumo nani ke.”