Read Sumi Naga JOHAN 9 Bible Online

JOHAN 9 - Sumi Naga bible

JOHAN 9

¹Jisu no chesu wuchekelo anhethi icheveno punukeu sasu kusholu.

²Tile pa khopemino pa vilo iniju, “Kutsuchekeu, timi hipauye pa xine ghenguno keo pa puaza xine ghenguno anhethi icheghi punu kya?”

³Jisu no khochile, “Hiye timi hipauno axine shiveke ghenguno kumoe momu pa puazano axine shiveke ghenguno kumoe, ikemu pano anhethi iche akeuye Alhou kuka kumla pa shouno pephepiyeni ke.

⁴Atsala kua lono ninguye khuno ipuwukeno pa kumlaqo mla amasae, putho shive aye khunomu mlalu chemoe.

⁵Ino ayeghilo khitohi anikeno tikutolo niye ayeghilomi kuvue.”

⁶Hipatsa pi puzu Jisu no ayeghilo musu puku eno amiti pesu aniba kunue, eno tipau anhethi kighicheu nhethilo nutsuno

⁷ishipi, “Wulo eno Silom Zukucho lono qhuvelo.” (Silom kiqiye “Puwukeu.”) Ike timi huno wuve puzu pa nhethi qhu eno pa nhethi tsukholu-ghi ideighi.

⁸Pa kisughumi ngo pano khuchucheke ithulupe puakemiqono ishipi, “Timi hipauye iqa puzu khuchu chekeu hu kumo kesha?”

⁹Timi khamino, “Hiye tipau huke” ipi, ikemu kutami khamiye, “Moe, pa kumoke, paye tipau kimihike.” Ikelo pa ampino ishi pi, “Timi tipau hu nike.”

¹⁰Timiqono pa vilo iniju, “Onhethi kishieno tsukholuve kya?”

¹¹Timi huno khochile, “Timi lakhi Jisu ipichekeu huno aniba kunu puzu inhethilo nutsuno ivilo, ‘Silom lo wuno qhuvelo’ ipike. Ike ino wu puzu qhukelauye inhethi tsukholuvae.”

¹²Tileno panonguno pa vilo, “Timi tipauye khile ani kya?” ipi iniju. Pano khochile, “Niye mthae.”

¹³Tile panonguno puzuu anhethi iche achekeu timi hu sasu Farisimi lau saghi.

¹⁴Jisu no aniba kunu puzu timi nhethi xukhotsukeu tsala huye Sabat tsala lono ke.

¹⁵Farisimino tileno timi tipau vilo paye kishi shi puzu pa nhethi ithulu kepu shiluve keno iniju kithe. Timi huno panoqo vilo pi, “Pano aniba pesu inhethilo datsu eno ino qhukelauye itehiye inhethiye ithuluvae.”

¹⁶Farisimi khamino pi, “Timi khuno hipau shikeno paye Alhou launo ighikemi kumoe kughengu paye Sabat yezah hebideke.” Tishimu khamiye ishipi, “Timi axinemi lakhiye kishi puzu amchipu hipaqo shiluni kya?” Tilehi panoqo gholo kuqhakumla ipeghive.

¹⁷Tighenguno Farisimino itaghi anhethi kighicheu vilo inijukithe, “Pano onhethi xuqhovetsuake noye paye kiutoi kemi kepi nani kya?” Timi huno khochile, “Paye tungkupu lakhi.”

¹⁸Timi tipau puaza kusaghi mphi kutolo Judamiye timi huye anhethi iche ache puzu pa nhethi tsukholuve kepi pulutsumoe.

¹⁹Ikehu pa puaza vilo iniju, “Timi hipauye nonu kesha? Paye punuqhi kelono anhethi iche kesha? Tishiaye paye itehiye kishieno pa nhethi tsukholuvea kya?”

²⁰Pa puazano khochile, “Paye ninu kepi nino ithi ani eno paye punuqhi kelono anhethi icheke,

²¹ikemu paye itehiye kishi puzu anhethi tsukholuve keno ninguye mthae momu khuno pa nhethi tsukholupe keno mthae. Paye kichimi shiveake pa vilo inijulo, pa likhi pano pipelo.”

²²Pa puazano hipatsa pikeuye kutau kumono panonguye Judami musaveke, kughengu Judamino xatha pe puakeuno timi khuno Jisu ye Khristo kepi pipheni keno Sinagog lono timi tipau haphevenikeu shiae.

²³Tighenguno pa puazano, “Paye kichimi shiveake pa vilo inijulo” ipive.

²⁴Ghuthu akiniu ghi panonguno anhethi iche achekeu hu ku-puzu pa vilo pi, “Alhou jukuvupu shi kuchou tsa pilo! ninguno ithi anike timi huye axinemi lakhie.”

²⁵Anhethi iche achekeuno pi, “Paye axinemi lakhi keo mokela niye mthae. Thime lakhi ino ithi anie: ike niye anhethi iche achekemu itehi niye tsukholuvae.”

²⁶Panonguno pa vilo iniju, “Pano olau kiu kishi shitsu kya? Paye kishi puzu onhethi tsukholuve pe kya?”

²⁷Pano khochile, “Niye nongu vilo pikhave, ikeghi nonguno initsumoe. Nonguye kushiye iniju kithenishi ani kya? Nongu ghi pa khopemi shiwuve nishi ani kesha?”

²⁸Tileno panonguno pa ghushoqhi pi, “Noye timi hupau khopemike ikemu ninguye Muse khopemiqoe.

²⁹Ninguno ithi akeuno Alhou no Muse putsae, ikemu timi hupauye pano khilauno ighikeno ninguye mthae.”

³⁰Timi huno khochile pi, “Ya! Tiye akichiqhipuke kumo kesha? Paye khilano ighikeno nonguye mthae, ikemu pano inhethi tsukholuvepeke!

³¹Ningu kumtsuno ithi anike, Alhou ye axinemi tsa initsu chemoe, ikemu khunono pa qhoqhu cheni eno pa pulou shicheni keno Alhou no tipano tsa initsu chenie.

³²Inahu-u ayeghiqha huthu kelono itehi kutolo timi khunomu punuqhi kelono anhethi ichekemi nhethi tsukholuvepe keu chimla aphie.

³³Timi hipauye Alhou launo ighimo napiaye paye kiumu shimlani cheke.”

³⁴Panonguno pa khochile, “Noye axine lono punu puthu kena ipuzu noye ningu shikaniepi ani kesha?” Eno panonguno Sinagog lono pa hapheve.

³⁵Panonguno pa haphevea pikeu Jisu no chilu, eno pa phuwuno pa vilo pi, “Noye Timi Nu shou pulube ani ma?”

³⁶Timi huno khochile pi, “Akijeu, paye khukela ivilo pitsulo, tishiaye ino pa shou pulubeni ke!”

³⁷Jisu no pa vilo pi, “Noye pa ithuluvae eno paye itehi oputsa akeu huke.”

³⁸“Ampeu, ino pulube ani!” ipi timi huno pi eno Jisu zulo itsaiqi qhoqhunhe.

³⁹Jisu no pi, “Kughakuthapu ghenguno niye ayeghi hipaulo ighie, tishianguno anhethi kighichemi pelo ithulupe eno ithulu akemiqo pelo anhethi icheve peni kehue.”

⁴⁰Pa phivilo Farisimi khami akeqono hipau chilu puzu pa vilo iniju, “Ningu ghi anhethi iche kesha?”

⁴¹Jisu no khochile, “Nonguno anhethi iche keaye nonguye kuqu aghimoni cheke, ikemu nonguno, Ninguye ithulu anie ipikeu kiqiye nonguye kuqu aphie.”