Read Sumi Naga APOSTOLMI 11 Bible Online

APOSTOLMI 11 - Sumi Naga bible

APOSTOLMI 11

¹Judia qha kumtsulo apostolmi ngo athikuzumi akeqono Judakumomi ghi Alhou tsa ikhiluvae pikeu chilu.

²Kughou Pitor no Jerusalem lo iqhoghi keno,Judakumomi ghi aphighu yiko ghave penikeuno pulochekeqono pa pipusaghi pi.

³“Noye kushiye aphighu yiko ghamokemi Judakumomi lau wuno panoqo gholo chusho kya?”

⁴Ike Pitor no panoqo vilo abo-akeshi lhepe pi:

⁵“Niye Jopa lo akighini shiae, eno kungunhetsu lakhi ithulu. Ayephu toike kiukela kije lakhi ashe bidilono kunguuno kughuju piqi cheghikeu ino ithulu, eno tiye iphivilo iqighie.

⁶Tsaqu-tsaleyi jukelauye apukhu bidi kupu lhoxu, tughashi, itikiche lhoxu eno aghau ishi ino ithulue.

⁷Tile asutsa lakhi iputsakeu ino chilu, ‘Pitor, ithulo, hi heqhino chulo.’

⁸Ikemu ino pi, ‘Tishimla thono, Ampeu! Kitiqevekeu momu mithekumo chuqupu ikichilo sumphie.’

⁹Ikemu asutsa huno itaghi kunguuno pi, ‘Alhou no kiu shikimtheveakeno kitiqevaepi noye pikepu kumoe.’

¹⁰Ghuthu kuthu hitoi shi, eno ashekhalo thime kumtsu atsutsulo sunhe chile saikuve.

¹¹Tipa mtsa timi mikuthu, khunoqo ikuwu peniye Kaisaria lono puwu keno ino ngo akeu kilo ighi aghi.

¹²Ike kiumu kunacho kevino panoqo gholo wulo pi Aghungu no ivilo pie. Jopa lono athikuzumi hipano tsugho ghi igholo Kaisaria lo wu, eno ningu kumtsu Kornelia kilo wuke.

¹³Pano ningu vilo pikeuno, kungumi lakhino pa kilo puthugho aghikeu ithuluepi eno pa vilo ishi piepi, ‘Jopa lo timi puwuno Pitor ipichekeu Simon hu kuwu pelo,

¹⁴eno no ngo abolomi kumtsu kishi xalukepu keno pano atsa ovilo pitsu nani.’

¹⁵Ike ino atsa pithu kethiu Aghungu Kimthe no panoqo shou iqighie, inahuu ningu shou ighikeu hutoike.

¹⁶Ampeu no kiu pipuakeno tileno ishi ino kumsuchilelu, ‘Johan no azu pesu baptiz shitsue; ikemu Aghungu Kimthe pesu nongu baptiz shitsu nani.’

¹⁷Ampeu Jisu Khristo pululukeulo ningu tsukeu toi, Alhou no agho aphiphi pesu panoqo tsukeulo ni khukeno ino Alhou hachilekulupu kya!”

¹⁸Kughou panonguno hi chilukeno panonguno pipusa keu inaqhoive eno ishi Alhou sheqhe, “Tishiaye Alhou no Judakumomi pelo ghi xakidelu puzu akuxupu shilukepu dokivi tsuanie!”

¹⁹Ike Stifan pithilukeu lono shikighimekeu huthuve kehu kupulumiqoye apanagha Fonika ngo Kupra ngo Antiok kutolo wu khave; eno panonguno asutsakivi hu Judami vilo likhi piwo.

²⁰Ikemu panongu gholo khamiye Kuprami eno Kuriniami kehu panoqono Antiok tokelo Ampeu Jisu wu atsa kiviu hu pesu Grikmi vilo ghi asheshu tsu.

²¹Ampeu kuka panoqo gholo ae; eno timi kutomono pululu puzu Ampeu lau xaide ighiluve.

²²Hipau sutsa Jerusalem lo akukuhou tove ikehu panonguno Antiok lo Barnaba puwu.

²³Kughou pano Antiok tokeno Alhou no timiqo kumghatsu akeu ithulu puzu pa mulo kiqi shive eno panongu vilo amlo iqemono Ampeu ghokulu shi alulopi pano kumtsu shikumto.

²⁴Barnaba ye timi kivi, Aghungu Kimthe eno akupuluno chhitoi kemie. Timi aqo kutomo Ampeu lawumi shilupeke.

²⁵Tishino paye Tarsus lo Saul phuniye wuve.

²⁶Pano pa phulu kelo pa sasu Antiok lo ighi. Ampe lakhi kupuju pamano akukuhomi sasu kushokumtsa eno timi aqo kije shikache. Ike ti kutsuluvekemiqo pesu Khristomi ipi Antiok lono kutughiu shie.

²⁷Tipa ghulokilo tungkupmi khami Jerusalem lono Antiok lo ighi.

²⁸Panoqo gholo Agaba ipikeuno puthugho puzu Aghungu kuka vechewo ighinike ghili pikeuno ayeghiqha kumtsu shou puqumiye keu lakhi kije cheniepi. Klaudia no akukau shi ake lono hipau shikupue.

²⁹Kutsuluvekemiqono kuptsathalukeuno panoqo lakhi khino kiu toluke qhemi keno tipau kiqi lono Judia lo athikuzumiqo kuphu puwunikeu shi.

³⁰Panonguno titoi shi, Barnaba ngo Saul pama ulono akukuholo kichimi lau akukuphu tsupuwue.