Read Sumi Naga APOSTOLMI 14 Bible Online

APOSTOLMI 14 - Sumi Naga bible

APOSTOLMI 14

¹Ikonia lo ghi Paul ngo Barnaba pamano Judami Sinagog lo ilo eno puzuu tho lono pikeu loye Judami ngo Judakumomi aqo kutomono kupulumi shive.

²Ikemu Judami dolo pulumokemino Judakumomi xukuthono athikuzumi shou panongu xukighide pukue.

³Apostolmi pamano tile adokushuwa ngono Ampeu ghengu amlo kumtoshi piae. Pamano kupukini shepe shiakeu tiye kuchou kepi mtsuqheyi ithipenike Ampeu no pama pelo pa kuka peithano amchipu eno akumzapuqo shilupe.

⁴Taun lo akeqo dolo aqo kijethave, khamino Judami gholo su, khamino apostolmi gholo sue.

⁵Tile Judami ngo Judakumomi ishino panongu sakiphemi sasu kumtsa kuqha puzu apostolmi pama ghime eno atuno veqhi nikeu shi kughathae.

⁶Apostolmino ti chilu puzu Likonia qhalo Lustra ngo Derbia lo eno tipa che-axu lo pove.

⁷Pamano tilau atsakiviu pesu asheshue.

⁸Lustra lo timi lakhi ache, ike pa pukhuye ala chemla. paye aza polono apukhu lho vimokemi eno khilemu ala chejumokemi.

⁹Tile iqa-ghi pano Paul no piakeu tsa ini ae. Paul no tsaqui jupuwokelo timi huye shipivipeni shikeu kupulu akeu ithulu,

¹⁰eno asutsa qhemghai ghi pi, “Opukhu xapu muzuchoi puthugholu lo!” Timi huno ilhethuve puzu iqho iqi ala chethuve.

¹¹Timi kumqo akeqono Paul no kiu shitsukeno ithulu puzu, panonguno Likonia tsauno ishi ighathuve, “Alhou noqono timi ilhoveno ningu lau iqighi anie!”

¹²Panonguno Barnaba pesu Zeu ku-tsu eno Paul no atsakipiu shiake ghenguno pa pesu Herme kutsue.

¹³Taun lapalo Zeu lhou chineki akeulo achineu huno amshitsu ngo axamunu pesu taun khagholo ighi, eno timi aqo kumqo akeu sasu akumllagho pesu apostolmi mllaniye kutouve.

¹⁴Apostolmi pamano ti chilu puzu amlo zuzushi kelauno pama phimini suxu puzu timi muqo gholo ilhe ilo,

¹⁵eno ishi igha. “O nongu timiqo, nonguye hiye kiu shi ani kya? Ningu ghi nongu toi timi ke, eno ninguye atsakiviu nongu lau asheshu anike, tishianguno nongu pelo hi avehu kuhamithekeu lono nonguno akuxupu Lhou lau ideghi peniyeke. Akuxupu Lhou no atsutsu, ayeghi, azughi eno tile akeu kumtsu mlake.

¹⁶Wovekeu tiqheli loye pano ashiayeh jeli pelo pututa lah pula chepeke,

¹⁷tishimu paye aniepikeu shepe timiqo lau qhitsumoke kumoe. Pano kimiyekeu hitoi shi pephepiye: atsutsu lono tsutsughu piqi tsu eno atusho kiqi lono axa jeli nongu tsu; pano achuqupu nongu tsuke eno pano alokivi pesu nongu mlo piqi tsue.”

¹⁸Atsa hipaqo pivekethiu ghi timiqono akumllagho pesu pama mllaniye kutouveke pamano akushukulu hakhalue.

¹⁹Ikemu Pisida ghakhulo Antiok ngo Ikonia lono Judami khami tile ighi; eno panonguno timiqo pano laumi shi zuluve puzu atu pesu Paul veqhi eno paye thivea kughashi aphughi nguno khalau sunhekiti pheve.

²⁰Ikemu kughou kupulumiqono pa suhupe kumqo akeno, paye puthugholuve eno aphughilo chesu ilo, eno tishiwo thoghiuye Barnaba sasu Derbia lo wuve.

²¹Paul ngo Barnaba pamano Derbia phughilo atsakiviu pesu asheshu eno kutomono kupulumi shiluve. Tithiu pamaye xachile susu Lustra,Ikonia eno Pisidia ghakhulo Antiok lo idewuve.

²²Eno hipaqo-a kumtsulo kupulumiqo mlo shikumtotsu eno akupulu laghilo vejoi alupenike panongu hakite ghi pi, “Shiluksa kutomo vechewo ninguye Alhou yehkipelo ilomaye sae.”

²³Akukuho atsu-tsulo kupulumiqo ghenguno kupulumi kichimi kishephepe qhitsu, akighini shi eno kumvu puzu panonguno hi kichimiqo pesu panoqono pululuvekeu Mpeu lau kulhuqhisuvetsu.

²⁴Panonguno Pisidia ghakhu katha susu wupuzu Pamfilia tolu.

²⁵Panonguno Perga lo asutsa hu pesu asheshuve puzu Attalia lo iqive.

²⁶Tilauno panonguye ashukaki lono Antiok lo cheve, eno tipa-a lono panongu pesu Alhou wu kupukini lau kulhuqhipuku puzu panonguno tipau kumla shikupuno ighilu akeu-ake.

²⁷Panonguno Antiok lo ighi kelo akukuhomi kuhokumqo, eno tipaqo vilo Alhou no kishi panongu peitha keno kishekulu lhe, Judakumomi pelo pululu penike ghenguno Alhou no alaghi kishi kophe tsu anikeno pie.

²⁸Tipa-alo panonguno kupulumiqo sasu ado kushuwa ae.