Read Sumi Naga APOSTOLMI 2 Bible Online

APOSTOLMI 2 - Sumi Naga bible

APOSTOLMI 2

¹Kughou Pentikost[1] pinye to keno, kupulumi kumtsu a-a lakhilo kuhokumqo ae.

²Zuleno aghugha lakhi amlhu kuloghino mulhu akeshi atsutsu kudauno ighino tino panonguno ngo akeu ki kumtsu chhitoive.

³Panonguno ithulukeuno ami mili toi puzu amqo amqono panoqo milakhikhi shou ngove.

⁴Panongu kumtsu Aghungu Kimthe no chhitoive eno Aghungu no panoqo pelo pilupe kehu kutami tsauno pithuve.

⁵Tishiakelo ayeghiqhalo ashiayeh jeli kumtsu lono Judami achine yehlo amlo tsukemiqo ighieno Jerusalem lo akhae.

⁶Aghugha hu chilukelo timiqono ighi kumqo eno panonguye akumzave, kughengu kupulumiqono kutami tsauno pi aghikeu timiqono pututa tsauno chilue.

⁷Timiqoye thughuyi kelauno ishi pi, “Hi atsa piakeqo kumtsu Galilmi ke kumo kesha?

⁸Imaye kishi puzu panoqono nitsauno piakeu ningu kumtsuno chilu ani kya?

⁹Ninguye Parthiami, Mediami, Alammi, Mesopotamia kudaumi, Judia ngo Kapadokiami, Pontu ngo Asiami,

¹⁰Frugia eno Pamfuliami, Ijip ngo Kurene phivilo Libiya qhalomi, khamino Rom kudauno itsusu ighikemi,

¹¹ninguye Judami eno Juda chineyeh luvekemi, Kretomi eno Arabmi— ikeghi panoqono nilikhi nitsauno Alhou no akumzapu kumla shikeu pikeu ninguno chilue.”

¹²Akumzaqhiyi eno thughuyi kelauno lakhino lakhi vilo ishi inijukile: “Hiye kiu shivetsu ani kya?”

¹³Ikemu khamiye thaigha kelauno ishi pi, “Timi hipaqoye aji shomzupu anie.”

¹⁴Ikemu Pitor no apostolmi chighi qhaqhi sasu puthughono asutsa kuloghi lono timiqo vilo asheshu ghi pi, “Akusami Judamiqo eno nongu Jerusalem lo akemiqo, hi julo eno itsa inilo.

¹⁵Nongu kukumsukuju loye timi hipaqoye shomzupu ani ghashi kesha? Moe, itehiye inaqhe ayi toku kihe shiaphie;

¹⁶ikemu hiye Joyil tungkupuno pi puakeu huke:

¹⁷‘Ashekhalau tsalalo hitoi shi nanie pi Alhou no pie: Ino timi kumtsu shou iGhungu lepukuni. Nongu nu ngo nongu ngaqono tungkuptsa pi nani; nongu pumiqono kungu nhetsu ithulu nani, eno nongu wu muchomiqono asamo pumo nani.

¹⁸Tipaqo tsalalo iqepumi eno iqelimi shou ghi ino iGhungu lepukuni eno panonguno tungkuptsa pi nani.

¹⁹Kunguu atsutsulo ino akichiqhipu shipiyeni, eno aqhou ayeghilo amchipu shipiyeni. Ahji ngo ami eno amchhi phoboyi nani;

²⁰Tsukinhe no zumoive nani, aqhino ajhi toi huchuyive nani, ti Ampeu tsala shishe kije eno akimthe-jukuvu ighi nike zulo.

²¹Eno ishive nani, khunono Ampeu je kuluni keno tipaqoye xaluve nani’.

²²“Israilmiqo, atsa hi inijulo, Nazaret no ghami Jisu ye nongu lau Alhou no kophetsukemi lakhi nongu gholo Alhou no pa vechewo akumzapu ngo akichiqhipu eno amchipu shikeu nongu ghi tsaqui ithi ani.

²³Alhou wu apulou eno azunatha kighithi lono hi Jisu ye nongu ulo phesuvetsu keu shi; eno nonguno ayehkumthami pelo kros lo pa yedavepe eno pa pithivepeke.

²⁴Ikemu Alhou no akithi lono pa xuputhuve eno akithino ghimeqhikeu lono pa kuqhopheve, kughengu akithino pa kughape akughu shipe puamlave.

²⁵Kughengu David no pa vehu ishi pi pua: ‘Pulhapuju izulo ino Ampeu ithulu ache, paye i-u ajeu ani, ike ipelo iqevepemo nani.

²⁶Highenguno imlouno alokivishi eno itsapi lo alokiqishie. Tinguno alau, niye thiveni kuau shianamu, lajupu xapu acheni.

²⁷Kughengu noye ighungu pe kithighalo kughucho qhivemo nani; Momu oqeu Akimtheu pelo tsu-mavekeu ghime sholupemo nani.

²⁸Nono akuxupu la ipelo ithipe, eno nono sasu chekeu lono ilokivi shepichhi nani.’

²⁹“Athikuzumiqo, niye nipuasu David ghili mutsumishei pi masavae. Paye thiveno qhova, pa kumoye ishi kutolo ningu gholo anie.

³⁰Paye tungkupumi lakhi eno Alhou no pa lau tushoqhipe puakeu ithi ake: Alhou no ashoqhi shipuakeuno pano David polo kughuko pelo akukau shipenikeu shike.

³¹Alhou no kiu shini chenikeno David no ithulue ike pano Mesiya xuilethughikeu ghili piqhi puakeuno: ‘Kithighalo pa kughuchoqhivemoe: pa phi ashi tsumave pemoe.’

³²“Alhou no Jisu hipau hu xuputhuve eno ninguno tipaulo thopi miqoe.

³³Pa xuputhu pesu Alhou-u ajeu qhieno ajepipi tsue. Apu launo tushoqhi puakeu hutoi Aghungu Kimthe ithulu puzu khikhi nonguno ithulu eno chilu anikeno hiye pano ningu shou lepukutsukeu ke.

³⁴Kughengu David ye kungughalo ikuke kumoe ikemu pa ampino ishi pipuani. ‘Ampeu no iMpeu vilo ishi pi: i-u ajeu kudau iqalo,

³⁵Oghumiqo pesu ino opukhu kinepu shitsumoke kutolo.’

³⁶“Tighenguno Israil lo timi kumtsuno hi mtsuqhei ithi pelo, Jisu khuu nonguno yedavekeno tihu Alhou no pa pesu Ampeu eno Khristo kinikujo shivetsuae!”

³⁷Kughou timiqono ti chilu keno panongu mlo itapiniyive puzu Pitor ngo apostolmi kutamiqo vilo pi, “Athikuzumiqo, ninguye kiu shikepu kya?”

³⁸Pitor no panoqo vilo pi, “Nongu lakhi khino nongu xine lono xaideghiluve puzu Jisu Khristo je lono baptiz shiluvelo, tishianguno nongu xineqo pevetsupe kepushi eno nonguno Alhou wu agho, Aghungu Kimthe ithulu nani.

³⁹Kughengu Alhou shoqhiye nongu ngo nongu tianuli eno khunoqomi putou anikeno khukhumu Ampeu ningu Lhou no kulukemi ghenguno ke.”

⁴⁰Pano atsa kutau kutomo pesu ashepe shi eno panoqo hakutho ghi pi, “Hi chighichilai keu tiqheli launo nongu xaluvepelo.”

⁴¹Ike khunoqono pa tsa ikhilu keno tipaqo baptiz shitsu eno tipani timi 3000 kutolo panongu gholo kihikusumi shiluve.

⁴²Panonguno Apostolmino kutsukeu ngo kuposhukeulo eno kuposhukeu ghulhu ngo akighini lono ado peitha ae.

⁴³Akumzapu eno akichiqhi kepu kutomo Apostolmi vechewono mlalua, eno kumtsuno msakhokhoshie.

⁴⁴Puluvekemi kumtsu kumtsa kumqo ngo eno thime thwokha kumtsu aqu shie.

⁴⁵Panonguno aki alu eno tinhemgha je puzu milakhi khino kiu avehupu shi aghi keno tipau kiqi lono kumtsu lau kusaje ae.

⁴⁶Tsalakipetsu achinekilo kumtsa wu, panongu kilo kumtsa kuchukusho shi, alokiqi eno alophaphaleyi keu lono pano chuqupu chu.

⁴⁷Alhou sheqhe eno timi kumtsu lopu shilu ae. Tsalakipetsu khunoqo xakulu ithulukhakeno tipaqo Ampeu no pesu panoqo gholo sulupe ae.