Read Sumi Naga APOSTOLMI 24 Bible Online

APOSTOLMI 24 - Sumi Naga bible

APOSTOLMI 24

¹Ike atsala pungu thiu achinetou Anania no achineyeh lo muchomi khami eno atsapeu Tertullo ipikeu ishi sasu Kaisaria lo ipiqi. Panonguno ahng Feliks zulo wupuzu Paul shou kiu kughakepu akeno tipautsu.

²Tertullo kukelo pano hitoi shi-ghi Paul ngukuthu: “Akijeu akiqheu Feliks owu sakiphe kivi vechewono ninguye shishe alokughuno shilu anipeke, eno nighakhumi kivipushi shikithe kepushi akeqo sawo sutsue.

³Ninguye hikithipu aqha kumtsulo eno ado kumtsulo khelho ake, ikehu ninguye hi ghenguno ighono oshikimthi ani.

⁴Itehi odo kutomo pevetsumoni keghenguno avehu ikhonheikeu lakhi nono kimiyeno initsunimapi ino oqhuiniju ani.

⁵Ninguno ithulukeuno timi hipauye xukidechekemi lakhi eno ayeghiqhalo Judami kumtsu dolo kidichekemie, Nazariomi muqo gholo sakipheu shichekemi lakhike.

⁶Pano Achineki thotsu shikuchhubeni aye pukaputsa, ikemu ninguno tsuqu luveke. [Ninguno niyezah kiqi lono pa shou kughathaveni cheke,

⁷ikemu zahtsuu Lusia no chhosu iloghive eno shishe angukashi ningu launo pa sawuveke.

⁸Ipuzu zahtsuu Lusia no ahza tsukeuno pa ngukuakeqo pelo ozulo ighi lopike.] Nono timi hipau vilo inijukide kudaju aye, ninguno pa nguku akeu kumtsu olikhi no ampino pa launo ithi nani.

⁹Judamiqo ghi Tertullo gholo kuqhaghi hi ngukukeu tsa pikeu kumtsu kuchou kepi pi.”

¹⁰Kughou ahng no Paul vilo pijulo pi pa kiche keno, Paul no ishi pi: “Nono ampe kushuwa ashiayeh hipau shou kughakuthau shi ache keu ithi puzu, niye alokivishi ishokha keu shi ani. Mutsuqheino pi ani kemo keno nono phulu nanike, hi atsala chighi kinia shi aphike niye Alhou mllaniye Jerusalem lo iqhoe. Achinekilo na, Sinagog lo na, momu aphughilo namu

¹²ino kutami sasu muto aghi keu momu timiqo xukutho aghikeu Judamiqoye khilemu ithulupe puamo.

¹³Panonguno ishou ngukube akeu lakhimu ovilo tikepi thebei shi pimla nani.

¹⁴Ikemu ino hi shichekeu pini: Panonguno akumouke pichekeu Laghi hu ino pula puzu ningu puasu Lhou mlla cheni, eno Muse no sughikeu yezahlo ngo tungkupmi kakuqolo yepuakeu kumtsu nighi pulu acheni.

¹⁵Ino Alhou eno timi zulo kivikusa michikulu acheni, ike tiye timi kivikusami kinikujo akithi lono xuputhuve nani.

¹⁶Ike Alhou zulo eno timi zulo ilolo mutsumishei kimchikulupu akeu lono pulhapuju pukaputsa ilikhi iqophe acheni.

¹⁷“Ampe kuthu bidi a-a kutau cheche puzu, kutamino kumsagho tsukeu suwo ni timiqo tsu eno akumllagho pesu mlla ishini aye Jerusalem lo wu.

¹⁸Ino tishi akelo, Achinekilo ishikimtheve ake lono panonguno iphulu. Tilehi timi aqokitikhi mu kuha momu mutomushukeu mu kuhae.

¹⁹Ikemu Asia qhalono ighikemi Judami khami tile ae, le panongu ampino hile ozulo aghikepushi ae eno ishou kiuala aghi aye ngukubeju kepushi ake.

²⁰Momu timi hipaqo pelo kughou ino Judami Hoho zulo puthugho keno kiu lhoksa shipimi puaghikeu panonguno nithulu keno piju pelo.

²¹Panongu gholo puthughokelo ino asheshu pikeuye hilikhi: ‘Ishi tsalalo nongu zulo ishou kughatha akeuye kithimiye akuxupu shi xuputhuve nanie pi pulukeu ghenguno ke.’ ”

²²Ikelo, Feliks ye Alaghi vehu tsaqu-tsaleyi ithi akehu panoqo vilo ishi pi, “Kughono zahtsuu Lusia no iqighini keno tileno ino nongu tsakugha xatha tsuni,” ipi puzu atsa initsu akeu hu tukiqhepe qhive.

²³Tishieno Feliks no ghushimi 100 shou akijeu vilo Paul kheu kutope qhitsulo pi, eno tishimu Paul lakhamo puzu pano kiu shini keno shilupe eno pawu shompami pelo pano kiu avehupu shi aghini keno sughitsu ishi pelo pive.

²⁴Ghulo kini kuthu-a thiu Feliks ngo pa nipu Drusilla pama ighi, liye Judami. Feliks no Paul ku-saghipe eno pano Jisu Khristo lau akupulu akeu pesu pi akelo Feliks ye initsuae.

²⁵Kughou Paul no amikucho, kikhikighi, eno kughakutha tsala ighinikeu vehu apasu shi lhewo keno Feliks ye thughuyive eno Paul vilo pi, “Itehiye palokutove aghilo, kughono adokivi ithuluni keno ino okupuwuni.”

²⁶Tishi pulaghi, Feliks ye Paul no pisa pesu kulugho shi pa tsunimalaye laju ae. Ikehu ghuthu kutomo Paul kupuwu che eno pa sasu kuptsache.

²⁷Ikemu ampe kini wove kethiu Porkio Festa no Feliks zuqhulo ighive; eno Judamiqo lopu shitsunishi kelauno Feliks no Paul pesu akughushipe qhive.