Read Sumi Naga APOSTOLMI 5 Bible Online

APOSTOLMI 5 - Sumi Naga bible

APOSTOLMI 5

¹Ike timi lakhi Anania eno pa nipu Safira pamano amheghi lakhi je,

²eno pa nipu sasu kuptsaveno jelukeu pisa hamiye pamano qhipe puaveno hami likhi suwo apostolmi ulo sue.

³Pitor no pa vilo pi, “Anania, kushiye Satan pelo omlo qhasuluvepe puzu noye Aghungu Kimthe pishiqhi eno olu jekeu lono pisa ithulukeu hami qhipe puave kya?

⁴Amheghi jemphi lomu tiye owu eno ti jevekethiu mu pisa ye owue. Imaye, kushiye hikithipu shinikeu omlolo kughuphe kya? Noye timi vilo mikike kumo puzu Alhou zulo mikivae!”

⁵Anania no hi chilu kemtsa iluqi thive, eno ti chilukemi kumtsu akumsano chhitoive.

⁶Apumiqono ithuno pa kumo kuzuveno pa khape ipe puzu akumo qhovetsu.

⁷Ayi kihedo kuthu-a thiu pa nipu iloghi, ti kiu shivekeno liye kiumu mthae.

⁸Pitor no li vilo pi, “Ivilo pilo, okujo akimi anipuno alu jekeu meye akuchopu hi kesha?” Li no ishi khochile, “Iye, akuchopu tihike.”

⁹Ikelo Pitor no li vilo pi, “Kishi puzu okujoye kugha kumtsaveno Ampeu Ghungu pejuniye shi kya? Inijulo okimi kumo shi-qhowukemi ahukikhalo cheae panonguno noghi khape ipeve nani!”

¹⁰Paikhavino liye Pitor pukhu philo ikiqi thive. Apumiqono iloghi kelo liye thive aghi, eno panonguno li khape ipeve puzu li kimi phivilo qhove.

¹¹Akukuhomi eno hipau tsa chilukemi shou akumsa kumzapu ighive.

¹²Apostolmino timiqo gholo amchipu eno akumzapu kutomo shiphepiyelu. Kupulumi kumtsu Solomon kisheqholo kuhokumqo che.

¹³Kutamiye panongu gholo kuhonike ighukeu ae, ikemu timiqono shishe panongu gihukeu ae;

¹⁴Ampeu puluvekemi, kiptimi ngo totimi kutomo alau alau shi panongu gholo hekutsuluve.

¹⁵Ikelauye kusukinimi ghi alaghi lalo khape ighino azua ngo ayephulo puzu, tishianguno Pitor no chewuchekelo pa kusho, likhimu tipaqo shou yekhu puku peniyeke.

¹⁶Jerusalem che-axulo aphu akeqo lono timi aqokitikhi ighikha eno kusukinimi ngo tughakusano ghimeqhikeqo saghi kelo panoqo kumtsu shipivilukha.

¹⁷Tile achinetou ngo pa gholo kumtsa akemi Sadukimi loji huye anhekushu launo amlozuzushive.

¹⁸Panonguno apostolmiqo tshuluve eno akughukilo suve.

¹⁹Ikemu putholo Ampeu wu kungumi lakhino akughu hukikha khaqhino panoqo sasu khalau ipe puzu pi.

²⁰“Wulo eno achinekilo puthugho puzu akuxu kithe tsa hipau pesu timiqo vilo pilo.”

²¹Panonguye hipau chilu puzu tsutho ipeghi kelo achinekilo ilono kutsuthue. Achinetou ngo pa gholo akemiqono wuve puzu Judami Hoho kuho nike ghenguno Judami Hoho wu muchomiqo kumtsu kukutsue, eno apostolmi saghi penike akughukilo ahza tsupuwu.

²²Ikemu kijemi qono akughukilo ighikelo panonguye apostolmi phumlave, ikehu panonguno idewo Judami Hoho lo ishi pi.

²³“Ninguno akughuki tokelo tiye tsatsai khape puaghi eno aghukhemi ahukikhalo puthughope khe aghi, ikemu kughou ninguno khaqhi iloghikeno alou khumu kuhave aghie.”

²⁴Kughou panonguno hi chilukeno, achineki khemi shou akijeu ngo achinetomiye apostolmi kishiveakela pi qheghuyive.

²⁵Tileno timi lakhi iloghi puzu panongu vilo pi, “Le nonguno akughukilo suvekemiqoye achinekilo puthughono timiqo kutsu anie!”

²⁶Ikelo akijeuno pawu timiqo sasu wu puzu apostolmi saighive. Tishimu panongu shou aku-agha vesumoe, kughengu timiqono atu pesu panongu veqhi pithivenosa kehu.

²⁷Panonguno apostolmi sailoghino Judami Hoho zulo puthughope, eno achinetouno panoqo vilo ishi iniju.

²⁸“Timi hipau jelono kutsu kevilo pi ninguno tsatsayi ahza tsuvae, ikeghi nongu kukutsu pesu Jerusalem nhakhava, eno timi hipau kithi ningu makho shivetsu niye anie!”

²⁹Pitor ngo apostolmino ishi khochile, “Ninguye timi nguno Alhou gholu masae.

³⁰Ningu puasu Lhou no Jisu xuputhuvae, nonguno kros lo pa yedave puzu pithive kemu.

³¹Alhou no pa xaputhu pesu pa-u ajeu Sakipheu eno Xakuluu shipe, tishikeu lono Israilmi pelo xaideghi lukepudo tsuniye eno panongu xine pevetsu niyeke.

³²Hipaqolo ninguno thopimi, eno Aghungu Kimthe ghike, paye Alhou gholukemiqo shou Alhou no agho tsukeuke.”

³³Judami Hohomi no ti chilu puzu axuideve eno apostolmi pithiveni shiqhiyive.

³⁴Ikemu Ahohomi gholo Ayezah kukutsumi Farisimi lakhi pa je Gamaliel, khuu timi kumtsuno qhoqhu gihu chekeno pano Ahoho lo puthughono apostolmi khalau ipeve aghipe nikeu zah tsue.

³⁵Tishino pano Ahohomi vilo pi, “Israil lo timi ipikeqo, nonguye timi hipaqo shou kiu shiniye anikeno tsaquyi shipaghilo.

³⁶Kughengu wovekeu tsala ghulokilo ghi Theudas ipeghi eno pa ghi pa shelo kije kepi puzu timi 400 toike pa gholo checheke. Ikemu pa pithive eno pa gholo kichemi apanaghaveno tino panoqo shekha shiveke.

³⁷Hipathiu, timi lhoxu kihike ghulokilo Galilmi Judas ipeghi, pano saphepiye puzu timi khamino xukide ipeghi, ikemu pa ghi pithive eno pa gholo chechekemi kumtsu kuhave.

³⁸Ike, hipau shelo ghi ino nongu vilo piani, timi hipaqo shou kiumu shikevelo eno panoqo lokutovelo, kughengu panongu kukughu kumla hipau timi launo ighikeu shiaghi aye hauve nani;

³⁹ikemu tsala kuchouno Alhou launo shiaghiaye nonguye panongu theqhivemla eno nonguno Alhou mujochilekeu shiaghiluvike!” Ahohomi no pano pikeulo pulosulu khave.

⁴⁰Panonguno apostolmi ku-suno panoqo ghaqhipe eno khilemu Jisu jelono timi putsa kevilo pi a-ghoshi ahzatsu, tishieno panongu phepuwuve.

⁴¹Apostolmino Judami Hoho lono alokivishi cheve, kughengu Jisu je ghenguno shikukujo pekepushi Alhou no panonguye akuzuepi kishelupe kehu.

⁴²Tsalakipetsu achinekilo ngo timiqo kilo panonguno Jisu ye Mesiya ke pikeu tsakiviu pesu tamono asheshu ae.