Read Sumi Naga APOSTOLMI 6 Bible Online

APOSTOLMI 6 - Sumi Naga bible

APOSTOLMI 6

¹Tishiwo kusho kumolo, apapemi alau shi ikowove kehu Grik tsa kipimi Judami ngo Ibri tsa kipimi Judami dolo mutomushukeu ipeghive. Grik tsa kipimi Judamiqono pikeuno atsala atsalalo achuqupu kijetsu chekeulo panonguw chimemiqoye kughuchovetsu cheniepi pike.

²Ikehu apostolmino apapemi amuqo kumtsu kukutsuno pi, “Ninguye Alhou tsa pesu asheshu nikeu kughuchove puzu achuqupu kutotsukeu shiauve nikeuye achipi kumoe.

³Tishiaye, athikuzumiqo nongu gholono timi akivimi khunoqo Aghungu Kimthe eno alokutsu chhitoi ani keno mitsuni kishephelo, eno ninguno panoqo pelo hipa kumlapu saje peithaluve penike.

⁴Ninguye akighini eno asheshukeu kumlalo ado kumtsu puwokeu shinie.”

⁵Hipau tsalo aqo kuchopuno aloqilu, ike panonguno hipaqo kishelu: Stifan, paye akupulu ngo Aghungu Kimth no chhitoikemi, Filip, Prokhora, Nikanor, Timon, Permena, Antiokmi Nikola paye Judami chine lono pekidelukemi ishi kishelu.

⁶Timiqono sawo apostolmi zulo qhi, eno panonguno panoqo shou a-u beno inikhu tsue.

⁷Ike Alhou tsa alaushi vekuphawove. Jerusalem lo papeluvekemi kikihi kutomo alaushi ikowove, achinemi ghi kutomono hipau kupuluyeh ikhiluve.

⁸Stifan ye Alhou no kumgha kupukeu eno akukano chhitoi puzu timiqo gholo amchipu eno akumzapu kije shiphelu ae.

⁹Ikemu Aghoshi Sinagog ipi kuchekeu lo kihikusumi Kuriniami, Aleksandriami, Kilikiami, Asiami ighi kumqono lachile Stifan sasu kighethu.

¹⁰Ikemu panonguye Stifan no Aghungu lokutsu lono pikeulo ghechilemlave.

¹¹Tileno panonguno timi khami chuxuveno tipaqo pelo ishi pipe. “Pano Muse ngo Alhou thaighakeu tsa pikeu ninguno chilue!”

¹²Panonguno timiqo, sakiphemi, Ayezah kukutsumiqo xukutho sasu Stifan lau ighieno pa tsuquluve puzu pa sasu Judami Hoho zulo sawu.

¹³Panonguno akimki shepe kughu pua puzu tipaqono ishi pi, “Timi hipauye pulhapuju ningu wu akimthe chineki ngo Muse yezah shou atsa kumo piachenie.

¹⁴Pano pikeu nino chiluke Nazaretmi Jisu hipauno achineki xaqhive nani eno Muse launo ninguno itehi kutolo pepimhe ighikeu akhu- ayeh kumtsu kilive nani ipike.

¹⁵Ahoholo iqakemi kumtsuno anhethi sukuqumono Stifan jua eno pa gi ye kungumi gi toi panonguno ithulue.”