Read Sumi Naga APOSTOLMI 7 Bible Online

APOSTOLMI 7 - Sumi Naga bible

APOSTOLMI 7

¹Tile Achinetouno Stifan vilo iniju, “Hiye kuchouno tishi kesha?”

²Stifan no pi, “Athikuzumi eno apuamuqo, itsa initsulo! Nisu Abraham no Mesopotamia yeghilo kughuna aphilo, eno pano Haran lo wo kughuna mphi lono ajukuvu Lhou no pa lau ipeghino

³pa vilo pi: ‘Noyeghi ngo nolimi-alagha qhiveno ino opiye nikeu yeghilo wuvelo.’

⁴Ike pano Khaldia yeghi qhiveno Haran lo kughuna niye wue. Pa pu thivekethiu, nonguno itehi khile kughuna ani keno tilehi Alhou no pa sakiqe sasu ighie.

⁵Ikeghi tipa-alo apukhu nepa qhemi lakhimu pa mheghi shilukepu tsumoe; ikemu Alhou no tushoqhi keuno ti pa tsuniepi, eno tiye pawu eno pa tikughukomiqo wu shipeniepike. Alhou no hipau shoqhi shike ghulokilo Abraham ye ati anuli kuhae.

⁶Alhou no ishi pi pua: ‘Pa tikughukomiqoye kutami yeghilo inami shi nani, tilau ampe 400 kutolo panonguye timi qemi shino timino kijipusa nani.

⁷Ikemu panonguno qeniye akemi shou ino kughakutha puwu nani, eno tithiuno panonguno hipalo ighieno imlla nani,’ ipi Alhou no pie.

⁸Alhou no puloshoqhi shike michi aphighu yiko ghavekeu peithawo peniye Abraham tsue. Hipaqo kumtsu kiqi kuputsukeu shi-ghi Isak punu kelo atsala tachelo Abraham no panu phighu yiko ghavetsu. Isak launo Jakob ighi eno Jakob launo asu chighikini ighi eno panongu kumtsu aphighu yiko ghavekeu shiwove.

⁹“Nisunoqono pano thikuzu-u Josef ju anheshu puzu pa kughape Ijip lo timi qemi shiwuve peniye jesue. Ikemu Alhou no pa gholo ae,

¹⁰eno pa kuxu-kusa kumtsu lono pa xaphelu. Alhou no alokutsu eno timi lopu pesu Josef tsukeu lono pano Ijip lo akukau Farao zulo wukelo, Farao no pa pelo Ijip yeghilo Ahng shipe eno akukau kibo shou peithakutsu-u shivepe.

¹¹Tile puqumiyekeu lakhi Ijip ngo Kanan qha kumtsu ighi eno shishe shilukusa shive. Nisunoqoye achuqupu kiumu ithumlave.

¹²Ijip yeghilo athi ithulu aniepikeu Jakob no chilukelo pano nisunoqo hapuwu, panongu ghenguno tino izu tughiue.

¹³Aghuzu akiniu loye Josef no pamunoqo pelo paye khuu kela ithipe, eno Josef nobolomi ghili Farao no ithivepe.

¹⁴Ikehu Josef no papuh Jakob ngo pano bolomi, pano lhotsuni pungu kumtsu kuwupe.

¹⁵Tile Jakob no Ijip lo iqi eno pa ghi eno nisunoqo ghi tilano thive.

¹⁶Panongu kumoye Shekem lo xapuwu eno Abraham no Amarimi Hamor vilo pisa agho lakhino qhukeu kumokilo panongu kumo qhoveke.

¹⁷“Alhou no Abraham vilo piqhipuakeu kupunikeu do kupunuvekelo Ijip lo nitimi alaushi ikowove.

¹⁸Tipashelo, Josef ghili mthakemi kukami kutau lakhino Ijip lo ayeh pethuve.

¹⁹Pano muquijoyi shino nishiayeh kutsaveniye shi, eno ayikusashi nisunoqo pelo panongu-ngaqo puxupemoni aye aki lono khalau ikhiphevepe.

²⁰Tishiake holono Muse punu. Paye anga jukivi kutsasa. Aqhi kuthu kuto pa puazano aki lono pa tucho mujo puthu.

²¹Kughou aki lono khalau pa ikhipheve keno Farao nga ayiliuno pa saluve eno li nga paphi shi-ghi pa saputhu.

²²Ijipmi kighithi lokutsu kumtsu pesu pa shika puthu, eno atsalo na akumlalo namu kijemi lakhi shiluve.

²³“Kughou Muse no apunu mipe lhobidi shini chekelo pa thikuzumi Israilmiqoye kiutoi ani keno juwu kepuke pikeu pa mlolo kumsuphelu.

²⁴Panongu gholo milakhi Ijipmino ghimeqhi aghikeu pano ithulu kelo, pano aghime sholuakeu saphu eno Ijipmi hu heqhi pithive.

²⁵(Pano kumsukeuno Alhou no pa peitha puzu panongu xaphe ani kenapi pa thikuzumino ithivea kughashi ake, ikemu panonguye ti mthae.)

²⁶Tishiwo thoghiu Israilmi kini kichighi aghikeu pano ithulu, eno pano pama dolo kulashive tsuniye shi. pano ishi pi, ‘Nitimi nokujo, nokujoye athikuzumi puzu kushiye lakhino lakhi ghimeqhi ani kya?’

²⁷Ikemu pama dolo akumou shi akeu huno Muse tuha peveno pi, ‘Khuno opelo ni shou ayehkipeu eno kughakuthau shipe kya?

²⁸Nono ighina Ijipmi heqhi pithivekeu hutoi nighi heqhi pithiveniye kesha?’

²⁹Muse no hi chilukelo paye Ijip lono pove eno Midian yeghilo acheuve. Eno tilauno anu kini shie.

³⁰“Ampe lhobidi wovekethiu, kungumi lakhino asuminipholo ami mili iquakeu lono pa lau ipeghi piye, tiye Sinai naghuto phivilo timi kughunamoke-a lono.

³¹Hi ithulukelo Muse ye akichiqhive, eno ti jukutojuni aye tipau phivilo wu. Ikemu Ampeu sutsa pano ishi chilu:

³²‘Niye osunoqo Lhou ke, Abraham, Isak eno Jakob Lhou ke.’ Muse ye akumsano khokhoshive eno junikeu ighuve.

³³Tile Ampeu no pa vilo pi, ‘Opukhu kuqho xavelo, kughengu khipa alo nono puthugho ani keno tiye akimthe-a ke.

³⁴Iwu timi Ijip lo akeqo kishi ghimeqhi ani keno ino tsaqui ithuluva, eno panonguno igha kukuno akeu chiluva, eno panoqo xaphe nike niye iqighi ani. Ike noye kutolo, eno ino Ijip lo opuwu nike.’

³⁵“Muse khuu panonguno ‘Khuno opelo nishou ayehkipeu eno kughakuthau shipe kya?’ ipi kileqhive kehu kungumi vechewo asuminipho lono Alhou no pa lau ipeghipiye eno xaphekuluu shipeniye Alhou no pa puwu.

³⁶Pano Ijip lono timiqo sasu ipe, eno Ijip yeghilo ngo Akuhu Zughilo eno ampe lhobidi timi kughunamoke-alo pano amchipu eno akumzapu shishe mla.

³⁷Israilmi vilo ishi pikeu hu Muse noke, ‘Alhou no nongu ghenguno tungkupu lakhi pano isaputhu kehutoi nongu gholo ipeghipe nani.’

³⁸Asayeqhalo Israilmi kuhokumqo kelo panongu sasu akeuhu pake. Pano kungumi sasu Sinai naghutolo nongu putsa eno nisunoqo ghi sasu ngono kuptsake. Ningu tsuniye akuxupi sutsa peighi keuhu panoke.

³⁹Nisunoqono pa gholunikeu pulomo eno pa tudapeve, eno panongu mloloye Ijip lo idewove nishikeu kumsuve.

⁴⁰Ikehu panonguno Aron vilo pi, ‘Ningu zulo chechepe kepushi nisala alhou shipesu tsulo. Muse khuu ningu sasu Ijip lono saipeghikeno paye kiu shivekeno ninguye mthae.’

⁴¹Tishi puzu panonguno amshiti lakhi shipeqhi eno hipa julho lau akumllagho pesu mlla, eno panongu uno mlaqhilukeulo ahukulu shi aghulhu shi.

⁴²Ikemu Alhou no panoqo launo ighosu wuve eno panoqo pelo atsutsulo ayepu yesu akeqo mlla penikeu shivepe, ti tungkupmi kakulo ishi yepe puakeu hutoi, ‘O Israilmiqo, ampe lhobidi dolo asayeqhalo, Nonguye Lhoxu heqhi eno akumllagho pesu ilau ighi kesha?

⁴³Moe, ti Molek phi-ki nonguno pekishe che, eno nongu lhou Refan wu ayepu pekishe cheke. Nonguno tipaqo lau itsaiqi mllaniye nongu likhi nonguno ajulho shipe qhike. Ikehu Babilon nguno hukidiu ino nongu puwu nani.’

⁴⁴“Asayeqhalo nisunoqo gholo Alhou no sa-akeu phiki acheke.Tiye Alhou no Muse vilo shilo pikeu eno ayeh pa piyevekeu kiqi lono tipau shipe qhikeuke.

⁴⁵Tipashelo nisunoqono panoqo papuh launo tipau phi-ki pekishe sughi puzu, kughou Alhou no panoqo zulono ashiayeh kutamiqo haphevetsuno panongu pelo ngolu penikeu yeghilo, Joshua gholono tipau phiki pesu iloghi. David kutolo tishi ache.

⁴⁶Paye Alhou lopu shi, eno pano Alhou vilo iniju puzu Jakob Lhou ki lakhi kutotsu nikeu khu.

⁴⁷Ikemu Solomon no Alhou ki lakhi shitsu.

⁴⁸Ikeghi, Alhou Akiqheuye timi uno shikeu kilo ngochemoe, tungkupuno ishi pike toi,

⁴⁹‘Kungughaye ikughuqa-a eno ayeghiye ipukhu kinepu. Nonguye ighenguno kiu ki shini kya? ipi Ampeu no pie. Ikulho kiqhipu-aye kiu kya?

⁵⁰I-u no hipaqo thime kumtsu mlake kumokesha?’

⁵¹“Nongu aghekulukumomi, amlolo kusakugha eno Alhou sutsa chikumlamiqo. Nonguye nongu puasuqo toi kena, nongu ghi pulhapuju Aghungu Kimthe mujochile cheni.

⁵²Nongu puasuqono kijipusamokeu tungkupumi khuu ani kya? Panonguno Alhou ghinimi khunoqono Alhou qeu Amikuchou ighi naniepi kutughuche keno tipaqo heqhi pithike. Itehiye nonguno pa kughape atheshive eno heqhiveke.

⁵³Kungumi vechewo ikhiphetsukeu yezah nonguno ikhilu, ikeghi nonguye tipau gholumoe!”

⁵⁴Judami Hoho lo ampimiqono Stifan no pikeu chilu puzu panonguye axuideve eno ahu tsughu bubushi amlo idewuve.

⁵⁵Ikemu Stifan ye Aghungu Kimthe no agi teqhi-teleyi puzu, anhethi sukuqumono atsutsulo jupuku eno Alhou jukuvu ngo Alhou- u ajeu Jisu puthugho akeu ithulu.

⁵⁶Pano ishi pi, “Julo! Atsutsu khaqhi akeu eno Alhou- u ajeu Timi nu kungughalo puthugho akeu ino ithulu ani!”

⁵⁷Panonguno kumzapu shi igha puzu a-u pesu panoqo kini kujukhaluve. Tishieno panongu kumtsu kumtsa qhayi pa lau kohaighi puzu,

⁵⁸aphughi lono pa sunhepheve eno atu pesu pa veqhi pithive. Tipaulo thopimiqono panoqo phi xapesu apumi lakhi Saul ipikeu pukhu philo qhive.

⁵⁹Panonguno atu pesu Stifan veqhi akelo, paye Ampeu vilo ishi pia, “Ampeu Jisu, ikuxu ikhilutsulo.”

⁶⁰Qhoqhunhe pesu pano ighamuku pi, “Ampeu hipau xine panoqo shou betsu kevilo.” Hi pive puzu paye thive. Saul ye Stifan pithive keulo pulokuqhatsu ae.