Read Sumi Naga APOSTOLMI 9 Bible Online

APOSTOLMI 9 - Sumi Naga bible

APOSTOLMI 9

¹Ikelo Saul ye Ampeu no kutsukeulo papeluvekemi pithive nikeu shi kichikumsa ake. Pano achinetou lau wu eno

²Damaska lo Sinagog qo lau kilethi sutsukeu yesu khu, tishianguno tilau Ampeu La papekemiqo kiptimi na totimi namu pano phulukemi thaqhu tshu sasu Jerusalem lo saighi nikeu shi.

³Pano Damaska kupunu wuche kelo paikhavi atsutsu lono akuvu lakhino pa sumxape yeluve.

⁴Paye ayeghilo iluqive eno asutsa lakhino pa vilo pikeu chilu, “Saul, Saul! Noye kushiye ikijipusa ania?”

⁵“Ampeu, no khuu kya?” ipi pano iniju. Asutsa huno pi, “Niye Jisu, nono kijipusa akeuhu ke.

⁶Ikemu noye ithu puzu taun lo ilolo, noye kiu shimasa keno tilauno ovilo pitsu nani.”

⁷Saul gholo wuchekemino atsa piphemlano puthughove, panonguno asutsa hu chilu ikemu khuumu ithumlae.

⁸Saul no ayeghi lono ithu puzu pa nhethi tsukhoju kemu kiumu ithumla. Ikehu pa gholo chekeqono pa-u tsuqupeno pa sasu Damaska lo ilo.

⁹Atsala kuthu kutolo paye kumu ithumla eno kumu chu-shomoe.

¹⁰Akukutsu papeluvekemi Anania ipikeu Damaska lo ae. Kungunhetsu lakhi lono Ampeu no pa vilo pi, “Anania!” “Iye, ni hi ani, Ampeu,” ipi pano khochile.

¹¹Ampeu no pa vilo pi, “Ithu puzu Muzuchoyi ipichekeu laghilalo wulo, eno Judas kilo Tarsus lono timi lakhi Saul ipikeu phuwulo. Paye akighini shi ani,

¹²eno timi lakhi Anania no pa lau ighi puzu pa pelo tsukhope ithulukithe penike pa shou a-u chhope bekeu pano kungu nhetsu lono ithuluvae.”

¹³Ikemu Anania no khochile pi, “Ampeu, timi hipauno Jerusalem lo kishi owu timiqo ghimeqhi puani keno timi kutomo launo ino chiluvae.

¹⁴Paye oje pi aghikemi kumtsu tshuluni aye achinetomi launo ahza lupesu hilau ighi ani.”

¹⁵Tile Ampeu no pa vilo pi, “Wulo, kughengu pa pelo iqe penike eno ije pesu Judakumomi, kukami eno Israilmi lau pewu penike ino pa kishevae.

¹⁶Ighenguno paye kishi ime mayesakeno kumtsu ni ampino pa piye nani.”

¹⁷Anania no wupuzu akilo ilo pa-u Saul shou be puzu pi,”Athikuzuu Saul, nono hilau wuchekela lono Ampeu Jisu khuu olau ipeghi keno, pano olau ipuwu ani tishianguno opelo itaghi ithulukithepe eno Aghungu Kimthe no chhitoilu peniye ke.”

¹⁸Paikhavi no kiuala akoza toike Saul nhethi lono ikiqive eno paye ithulukitheve. Pano puthughove eno baptiz shiluve,

¹⁹pano achuqupu chukethiu aghuthi xuxuyive. Ghulo kini-kuthu toike paye Damaska lo akukutsu papeluvekemiqo gholo ae,

²⁰eno vejoi Sinagog lo wupuzu Jisu ghili pesu asheshuthuve. “Paye Alhou Nu ke,” ipi pano pi.

²¹Pa tsa chilukemi kumtsuno akumzave eno ishi iniju, “Jerusalem lo aje hipau picheghikemi thaqhu timi hipauno heqhi cheke kumo kesha? Pano hile ighikeu kimijiye panoqo tshu sasu achinetomi lau wuniye ighike kumokesha?”

²²Ikemu Saul ye pa ghuthi kuxu alau shiuve, eno Jisu ye Mesiya ke pikeu kuchou tsa Damaska lo Judami kughuna-akeqo mlolo putsaqhitsu ikehu panonguye pa lamlavekepu shive.

²³Atsala kutomo thiu Judami no Saul pithive nike kumquve,

²⁴ikemu panonguno kumqupe akeu Saul no ithive. Pa pithiveni aye putho-pucho panonguno khagho lono khe-ju ae.

²⁵Ikemu pano kutsukeulo papeluvekemino puthono pa sawo ashoghi lakhilo ilovepeno aphu liwo kighipe lono kighitipiqive.

²⁶Kughou Saul no Jerusalem lo ighikeno paye apapemiqo gholo kutupoluniye pukaputsa, ikemu panongu kumtsu pa msave, kughengu paye papeluvekemi akepi panonguno pulumono ae.

²⁷Tileno Barnaba no pa sasu kusho eno apostolmi lau sawu eno panongu vilo kishi alalo cheke lono Saul no Ampeu ithulu, Ampeu no pa putsakeu eno Damaska lo Saul no kishi ighumono Jisu je lono asheshu keno panoqo vilo chixechilei lhetsu.

²⁸Ikehu Saul no ighumono panoqo gholo ngo no Jerusalem qha kumtsulo Ampeu je lono asheshue.

²⁹Pano Grik tsa kipimi Judami putsa eno panongu sasu kighekileche, ikemu panonguno pa heqhi pithiveniye pukaputsa.

³⁰Kughou athikuzumiqono hi ithivekeno, panonguno Saul sasu Kaisaria lo iqino Tarsus lo puwuve.

³¹Ike Judia, Galil eno Samaria qha kumtsulo akukuhouye iquneikeu do sholu ae. Ampeu sumsakeu lono hiye mutokithe eno azuu hawolu eno Aghungu Kimthe kukuphu lono alau thuwuae.

³²Pitor no aqha kumtsulo izuwu eno ghuthu lakhi Alhou wu timi Lida lo akeqo lau iqighi.

³³Tipa alo timi lakhi Aina ipikeu aphi ashi thikeu lono supuzu ampe tache azu-a lono ithughimlano akeu sasu kusho.

³⁴Pitor no pa vilo pi, “Aina, Jisu Khristo no oshipivi anie, ithuno ozu-a kutsuvelo.” Aina no paikhavi ithuve.

³⁵Lida eno Sharon lo kuami kumtsuno pa ithulu eno panonguno Ampeu lau xaide ighikhave.

³⁶Jopa lo akukutsu papeluvekemi totimi lakhi ae, lije ye Tabitha. (Grik tsalo li jeye Dorka, tipau kiqiye “Ashe”). Lino akivi kumla eno kumlhomi kimiye-kinilo no ado peveche.

³⁷Tipa ghulokilo liye supuzu thive. Li kumo qhuveno akijolha kunguulo kuzupe pua.

³⁸Jopa ye Lida lono kushuwalo kumo kehu kutsukeulo papeluveke miqono chilukeuno Pitor ye Lida lo aniepi chiluno timi kini pa lau puwu puzu hipatsa pesu wupe, “Munukevino kei ningu lau ighitsulo.”

³⁹Ike Pitor no kuto puzu pama sasu wue. Pano ighikelo pa sasu aki jolha kunguulo saiku. Chimemi kumtsu li phivilono mlo-qah eno Dorka no panoqo gholo achekelo mlakeu aphimini pa piye.

⁴⁰Ikemu Pitor no panoqo kumtsu khalau pipeve eno qhoqhunhepe inikhu, tishieno pano akumo kudau tsughu ighino pi, “Tabitha, ithuvelo.” Lino anhethi tsukho Pitor ithuluno ithu iqave.

⁴¹Pitor no pa-u chhopuwuno li sunhe puthuve. Pano li puxupe kupulumi ngo chimemi tsue.

⁴²Hipau Jopa qha kumtsulo vekuphawove, eno kutomono Ampeu pululuve.

⁴³Pitor ye Jopa lo ado kushuwa ngoa, eno tile akelo ashiyiko kumlami Simon ipikeu gholo ngoae.