Read Sumi Naga ROMMI 14 Bible Online

ROMMI 14 - Sumi Naga bible

ROMMI 14

¹Nongu gholo timi khuuno akupululo miqemileyi anikeno pa ikhilulo, ikemu pa luthuno kumsupu akeulo kutsala kevilo.

²Milakhiye kiu kiumu chulu nani kepi pulu cheni, ikemu khuno akupululo miqemileyi keno ayetsuni likhi chuaghiluvi.

³Khuno thwokha chulu chenikeno paye thwokha chumokemi jukunatha kepu kumoe momu ayetsuni likhi chuchekeu huye thwokha chuchekeu shou kughathabe kepu kumoe; kughengu Alhou no pa ikhiluvae.

⁴No khuu keno kutami qemi shou kughabeni kya? Pa mipeu likhino paye ikulu ani keo iqive anikeno xatha nani, kughengu Ampeu no pa pelo ikuluve kepu shilu nani.

⁵Khami ghenguno atsala hamino kutau tsala nguno akhoto kutu shi cheni, ikemu kutamiye atsala kumtsu aphiphi shi kumsu acheni. Pututano alikhi akukumsulo mutotoi shiluve kepu.

⁶Khuuno atsala hamiye akhoto kepi tipa tsala ikhilu cheni keno Ampeu gihu ghi ti ikhilu ani. Thwokha chu chekeu timi ghi Ampeu gihu-ghi chu cheni, kughengu pano shikimthikeu Alhou lau tsue. Khuuno thwokha kumtsu chu chemo keno pa ghi Ampeu gihu ghi chu chemo, eno shikimthikeu Alhou lau tsue.

⁷Ningu khumu pututa ghengu likhi xu achemo eno ningu pututa shelo likhi thive chemoe.

⁸Ninguno xua napiaye ninguye Ampeu ghenguno xunie, eno ninguno thive aye Ampeu ghenguno thinie. Tishiaye ninguno xuna thinamu ninguye Ampeu wuke.

⁹Kughengu Khristo no thiveno xukithethu shikeuye kuxumi ngo kithimi Mpeu shini kehuke.

¹⁰Noye kushiye othikuzu-u shou kughathakeu becheni kya? Momu noye kushiye othikuzuu jukunatha cheni kya? Ningu kumtsu Alhou tsakugha lakhu zulo puthugho nani.

¹¹Kuchoyesulo ishi yepuani: “Ampeu no ishi pi, ino xuanikeke timi kumtsu izulo qhoqhunhe nani, eno niye Alhou kepi timi kumtsuno akishe tsu nani.”

¹²Ike ningu lakhikhino pututa shelo Alhou lau kihikulai tsukepu shi nani.

¹³Ikehu ningu lakhino lakhi shou kughathabekeu hu qhiveni nolo. Tipa zuqhulo, othikuzuu pelo shokukho kepu kiumu qhitsumoni momu axinelo ikiqipemoni.

¹⁴Ino Ampeu Jisu sasu kimepe akeu lono mutsuqhei ithilupe akeuno kiumu pa kutoshiye mithemokeu kumoe; ikemu timino kiukiu namu mithemoke ipi kumsu aye, tiye pa ghenguno mithemokeu shivae.

¹⁵Nono kiuala chukeu huno othikuzuu pelo kutusuvepe aye noye kimiyekeu lono chechemovae. Nono kiu chu cheni keno tipau pelo timi khuu ghenguno Khristo thivekeno tipau shipusavepe kevilo!

¹⁶Ikehu nono kiu pesu akivi pi cheni keno aje lhoksa thulupe kevilo.

¹⁷Kughengu Alhou kukaqhaye kuchu kusho vehuke kumoe ikemu Aghungu Kimthe no tsukeu mikucho ngo alakishi eno alokivi ishie.

¹⁸Khunono hipau ghola lono Khristo qenikeno Alhou no ikhi kulupu eno timi lopu shi ani.

¹⁹Tishiaye, kiu lono kulashilu eno lakhino lakhi shikumtolu cheni keno tipaqo hajuni nolo.

²⁰Achuqupu ghenguno Alhou no mla puakeu kutsave kevilo. Achuqupu thwokha chuluvike, ikemu kiuala chukeu lono kutamino axinelo ikiqivekepu shiaghiaye tiye achipi kumoe.

²¹Othikuzuu pelo shokukholu pemonike ashi chumo, aji shomo momu kiumu shokukholu kepu shimo keuno achipi.

²²Hipau vehulo nono kiu pulu cheni keno tipau Alhou ngo okujo dolo qhilo. Khunono pa pulou kiukeno pano shikeulo pa likhi pa shou kughathabe kepu shimokemi kumghae!

²³Ikemu khuuno amlo lo ichikeu apulaghi chuni keno Alhou no pa ghusho anie, kughengu paye akupulu shou bemono shipuanie. Kiukiu pimu akupulu shou bepemoaye tiye axine ke.