Read Sumi Naga ROMMI 16 Bible Online

ROMMI 16 - Sumi Naga bible

ROMMI 16

¹Ino nongu lau ni-chepukishiu Foibe kilethisuvetsu ani, liye Kenkhria kukuhoulo dikon limi lakhi.

²Ike nonguno Alhou timi sasulu ketoi Ampeu lono li sasutsulo, eno lino nongu launo kiu avehupushi aghini keno li kuphutsulo, kughengu liye timi kutomo kuphuchekemi eno tihutoi ikuphu chenie.

³Priskila ngo Akuila pama lau petha tsu ani. Pamaye Jisu Khristo lono kumtsa mla chekemi ikusamike.

⁴Ikuxu ghenguno pama kutsu luvetsu nicheghi. Ilikhino kumo puzu Judakumomi kukuhou kumtsuno pama shikimthi ani.

⁵Pama kilo akukuho shichekemi ghi petha tsu ani. Ino kimiyechekeu Epaneita, Asia yeghi kokutha bocholo Khristo pululukemi atughiuke pa ghi petha tsu ani.

⁶Nongu gholo aka-aveshi mla achekeu Maria lau petha tsu ani.

⁷Andronika ngo Junia pamaye akusami Judami, igholo kumtsa akughulo acheke, pama lau petha tsu ani. Pamaye Apostolmi no akivishi ithiakemi, eno pamaye izuuno Khristomi shiluvekemi.

⁸Ampeu lono ino kimiyechekeu Amfiata lau petha tsu ani.

⁹Khristo lono kumtsa mlachekemi ikusau Urbana lau petha tsu ani, eno ino kimiyechekeu Stakhu petha tsu ani.

¹⁰Ino kimiyechekeu Apelle lau petha tsu ani pano Khristo qhoqhuchekeu hu ikhikulupu shivae. Aristobolu kibolo akeqo vilo petha tsu ani.

¹¹Nikusau Judami Herodion lau petha tsu ani, eno Narkisa nobolomi khije Khristo lo athikuzumi akhani keno petha tsu ani.

¹²Ampeu kumla kishimi Trofina ngo Trofosa pama lau petha tsu ani. Kimiyechekeu Persi lau petha tsu ani, paye Ampeu ghenguno aka aveshi mlacheke.

¹³Ampeu kumlalo atsukupushi achekeu Rufa lau petha tsu ani, eno pa za lau ghi tsu ani. Lino panu toi ituchoheju cheke.

¹⁴Asunkrita, Flegon, Herme, Patroba, Herma eno panoqo gholo athikuzumi akeqo lau petha tsu ani.

¹⁵Filologo, Julia, Nereu eno pa chepu Olimpa eno kupulumi panoqo gholo akeqo lau petha tsu ani.

¹⁶Akimthe lono mumakeu pesu lakhino lakhi petha tsukilelo. Khristo kukuhou kumtsuno nongu lau petha tsu anie.

¹⁷Athikuzumiqo, ino nongu qhuiniju anike, khunoqono kijethakile eno timi kupulu kutakihi acheni, eno khunoqono nonguno akukutsu ithuluvekeu hu mujochile ishi cheni keno jukutolo, eno panoqo launo putosuvelo.

¹⁸Kughengu timi tishi chekemiqoye ningu Mpeu Khristo qe amoe, ikemu panongu kive likhi qe ani. Panonguno ghaghu tsa kuju pesu akukumsu ilaleikemiqo pishiqhi cheni.

¹⁹Nonguno atsa kiviu gholukeu kumtsuno ithi ani, tishikehu nongu shou ilovi ani. Niye nongu pelo kiuno tiche-tighe kuhakeu akivi keno tipaulo alotsu penishi, ikemu kiuno alhoksa keno tipau kumomthakeu shipenishi.

²⁰Tishiaye, alokughuno tsuchekeu Lhou no Satan pesu itheno nongu pukhu qholo nedaqhilu nani. Ampeu Jisu wu kupukini nongu gholo apelo.

²¹Isasu kumtsa mlachekeu ikusau Timothi no nongu petha tsu ani, tihutoi Judami ikusami Lukia, Jason, Sasipeter ishi ghi petha nongu tsu ani.

²²Yesu hipau yeakeu ni, Tertia no Khristomi no petha tsukilekeu pesu nongu tsu ani.

²³Ino wuakeu kiampiu Gayia, khuu kilono akukuho shicheni keno, pano petha nongu tsu ani. Aphughilo akinipighiu Erasta ngo ni thikuzuu Kuarta pama ghi petha nongu tsu ani.

²⁴(Ampeu Jisu Khristo wu kupukini nongu kumtsu gholo alupelo.Amen.)

²⁵Itehiye ino Atsakiviu eno Jisu Khristo ghili pikulhache keu kiqi lono nongu shikumtolu chekeu lau eno mzamghaleyi pephepiyekeu khikhi tiqheli kushuwa kutolo kusupe acheke,

²⁶ikemu itehiye lhapheveake, eno Alhou launo tungkuptsa yepuakeqo vechewo ashiayeh kumtsu lau pithiveake, ti lhokta Lhou no ahzakutsu shikeu kiqi lono, akupulu shi aghokulushi ighi penikeu ghili,

²⁷khuu likhino Alhou eno khuu likhino alokutsu keno, Jisu Khristo vechewo pulhapuju ajukuvu-jekipi shitsulo! Amen.