Read Sumi Naga ROMMI 4 Bible Online

ROMMI 4 - Sumi Naga bible

ROMMI 4

¹Tishiaye nishiayeh iko ighikeulo nisu Abraham ghili hu kishiepi nani kya? Pa kuxulo kiu phulu kya?

²Kughengu Abraham ye pano mlaithakeu lono Alhou lau achipi kalupeke aye, paye qheza kulupu kiuana aghini cheke. Ikemu paye Alhou zulo qheza mlae.

³Kughengu kuchoyesulo pikeuno, “Abraham no Alhou pulu, eno pa kupulu ghenguno paye achipiu kepi Alhou no kihie.”

⁴Timi khuno mlani keno pa jumeye kumsagho lakhi kepi kihi chemoe, ikemu pano qelukeu kepi kihi cheni.

⁵Ikemu timi khuno akumla shimo kemu pa kupulu Alhou lau beni keno, Alhou ye hekupusami pa lau achipi kaluvepe chekeu kehu, Alhou no pa kupulu kihilutsuno pa lau achipikaluvepe cheni.

⁶Tihutoi timi khuu akumla sumo kemu Alhou no timi tipau pelo pa lau achipikaluvepe keno timi tipau shou alokivi betsukeu shi- ghi David no ishi pipuani:

⁷“Alhou no khunoqo hekupusa pevetsuni keno, khunoqo xine jonhavetsuni keno tipanoqo kumghae!

⁸Ampeu no khunoqo xine kihikulatsumoni keno timi tipano kumghae!”

⁹Alokivipu hi David no piakeuye aphighu yiko ghavekeqo sala likhi kesha? Ikeo, aphighu yiko ghamokeqo sala ghi kya? Ninguno pivekeu toi “Abraham no Alhou lau akupulu akeu huno paye Alhou lau achipikaluve akepi kihiluveke.”

¹⁰Kughono Abraham lau ti kihivetsu kya? Hiye pano aphighu yiko ghamphi lono keo tipa thiuno kya? Pano aphighu yiko ghamphi lono tishi kethono tipathiuno kumoe.

¹¹Abraham no aphighu yiko gha mphi lonomu pa kupulu Alhou lau akeu lono Alhou lau achipikaluve keu michi momu chishidapuku keu michi lakhi shighi aphighu yiko ghae. Tipau kimjiye Abraham pelo aphighu yiko ghamokemi pinamu pulu aghikemiqo eno tishi keu lono Alhou lau achipikalukeu panoqo lau kihipukuve kemiqo papuh shipeniye ke.

¹²Titoi Abraham ye aphighu yiko ghavekeqo papuh ghi ke, panonguno aphighu yiko ghaveke ghenguno kumo puzu panonguno nisu Abraham no aphighu yiko ghamphilo kishi akupulu kuxu xukeno panonguno titoi xukeu ghengunoke.

¹³Alhou no Abraham ngo pa laghaqo vilo ayeghiqhaye panongu wu shinikeu piqhi. Hi piqhikeuye Abraham no Ayezah papeluke ghenguno kumoe ikemu pano akupulu akeu vechewo Alhou no achipikaluvae pi ikhilukeu lono ke.

¹⁴Tsala Ayezah xaqhekeqono amheghi ighikemi shikepu shike aye, akupuluye xaveno piqhikeu kumsa shiveni cheke.

¹⁵Kughengu Ayezahno Alhou loghu saiqighi, ikemu khile ayezah kuha keno tile ayezah hebidekeu kuhae.

¹⁶Highenguno Alhou no piqhipuakeu huye akupulu shou bepe anie, hipa ghola lono piqhipuakeu huye Alhou wu kupukini shikeu shou bepeniyeke eno pa laghami kumtsu lau mutsuqhei tishini putsa ipi niyeke. Tiye Ayezah papelukemiqo likhi kumono Abraham toi pulukemiqo lau ghike. Kughengu Abraham ye akupulu lalo ningu kumtsu papuhke.

¹⁷Kuchoyesulo pikeu hutoi, “Ino opelo ashiayeh kutomo papuh shiveapeke.” Ikehu Abraham no puluchekeu Lhou zuloye piqhipuakeu huye tishini putsae. Alhou hipauye kithimi puxuve cheni eno kiumu kuha namu pano piaye aghive cheni.

¹⁸Lakujupu kuhamitheve mu Abraham ye puluqhiyi eno lajuqhiyi ache, eno tishi keu lono paye ashiayeh qo papuh shikulupu shi pa vilo pipuakeu toi: “Olaghano hijejehi shinani.”

¹⁹Paye ampe 100 shive eno kughou pano pa phimpi jukelo tiye thiveke kumlho shive, momu Sara ye anuha shive aghikeu ithive ikemu tishike ghenguno li kupulu kughuchoveke kumoe.

²⁰Pulukupsa kiunomu li pelo Alhou no piqhipuakeu lono iqeve pemoe. Ikemu pano akishe Alhou tsukehu pa kupulu mutotoi thuwuve.

²¹Alhou ye pano kiu piqhive akeno shive nani kepi Abraham no kuchouno mtsuqhei shi.

²²Tishike ghenguno Abraham ye akupulu vechewo Alhou lau achipikaluve keu shi kihitsue.

²³Ikemu “Achipikaluve keu shi kihitsue” ipi ke tsa huye pa ghengu likhi kumoe,

²⁴ikemu ni ghengu ghi ke. Ningu khunoqono ni Mipeu Jisu akithi lono xuputhuvekeu Lhou puluni keno, achipikaluve keu hu ningu lau ghi kihipukutsu nani.

²⁵Ningu xineqo ghenguno pa pithivepe eno Alhou lau ningu achipikaluve keulo qhiniaye pa xuputhuveke.