Read Sumi Naga ROMMI 6 Bible Online

ROMMI 6 - Sumi Naga bible

ROMMI 6

¹Tishiaye ninguye kiu pikepu ani kya? Alhou wu kupukini alau shipeni kehu ninguye axine shikithe akepukesha?

²Tiye khilemu kumoe! Ningu axine launo thivekemiqoye kishi puzu itaghi tipaulo xuani kya?

³Ningu khunoqomi Jisu Khristo gholo baptiz shisuluve akeno tipaqoye pa kithilo baptiz shisuluvaepi mtha kesha?

⁴Ningu ye baptiz lukeu lono akithilo pa gholo qhovae, tishikehu Apu kimthe jukuvu kuka huno akithi lono Khristo xuputhuve, tishikeuno ningu pelo akuxu kithelo xuchepeniyeke.

⁵Kughengu pa kithi kimihi shipuzu ninguno pa gholo kuqhalu aye, pano xuchilethughiveke toi ningu ghi mtsuqheino pa sasu lakhi shi nani.

⁶Ninguno ithi akeuno, nilhoaye aqauye Khristo kros gholono pithivae, tishino axine shichekeu lhoaye hu kutsaqhive eno hinguno hilauye ningu pelo axine quaxemi shipemoni yeke.

⁷Kughengu khunono thiveakeno panoye axine kuka launo phepuwuvae.

⁸Nino pulu akeuno ninguno Khristo gholono thive aye, pa gholo ningu ghi xu ani.

⁹Kughengu nino ithi akeuno Khristo akithi lono xuputhuvea kehu khilemu thikithe moae, akithi ye pa shou akuka kuhavae.

¹⁰Pano thikeu kithiye axine kudau ghuthu khavi ghengu thiveke ikemu pano xu akeu kuxuye Alhou kudau xuanie.

¹¹Ike tihutoi nonguye axine kudauye akithi shivea ikemu Jisu Khristo gholono Alhou kudauye xuanie pi kumsuluve kepue.

¹²Tighenguno axine pelo nongu thiveni kuau phimpi qhasupe nongu lhoaye gho apulou gholu apekevilo.

¹³Momu nongu phia-u axine kudau ikhipe tsughi kusakugha laghi lono peitha pekevilo. Ikemu akithi lono akuxulo saghivekemi kehu Alhou lau nongu kuxu ikhiphepe tsulo, eno nongu phia-u amikucho vehupu shi peitha penike ikhiphepe tsulo.

¹⁴Nonguye Ayezah qholo kumono Alhou wu kupukini qholo xuani kehu axineye nongu qhasuve pekevilo.

¹⁵Tishi aye ninguye kiu pini kya? Ayezah qholo kumono Alhou wu kupukini qholo anike ghenguno axine shiani kesha? Tishimo thono!

¹⁶Nonguno Ampeu khuu qeno gholu ani keno pa qemiake; ikemu nonguno axine qeu shiaye akithilo sailove nani eno aghokulu qeu shiaye tino nongu sasu achipiulo ilove nani kepi nonguno ithi ani.

¹⁷Alhou shikimthi akeuno nonguye ghuthu lakhiye axine quaxemi kemu itehiye nongu lau apasushi akukutsu tsukeulo nongu mlo kuchopu tsuno agholue.

¹⁸Nonguye axine launo kuqhopheveno achipikalu keu quaxemi shiluvae.

¹⁹Timi lhoaye lono nonguno tomo-chhimokeu akeu ghenguno niye inapugha tsa peitha-ghi piani. Ghuthu lakhilo nongu phi-mpi ikhipe tsupuzu mithekumo jeli eno kusakugha qeu shichepeke toi itehiye akimthe vehupu shipenike nongu phi-mpi achipikalu kepushi ikhipe tsulo.

²⁰Kughou nonguno axine quaxemi shiche keno, nonguye Alhou lau achipikalu kepushi akeu lono nongu gho shi xuwuve.

²¹Momu thime khipaqo ghenguno itehiye nonguye kujo ani keno tipaqo launo kiu kivipu sughitsu kya? Thime tipaqoye ashekhalo akithike.

²²Itehi nonguye axine launo kuqhopheveno Alhou quaxemi shiluva, eno nonguye shikimtheve keu ithuluno tipau ashekhaloye lhokta kuxu ithulu nani.

²³Kughengu axine jumeye akithi ke, ikemu Alhou no niMpeu Jisu Khristo vechewo agho tsukeuye lhokta kuxu ani.