Read Sumi Naga ROMMI 8 Bible Online

ROMMI 8 - Sumi Naga bible

ROMMI 8

¹Tighenguno khunoqono Jisu Khristo gholo xuani keno itehi panonguye Alhou no levemoe.

²Kughengu Jisu Khristo gholo akuxupi Ghungu yezah huno axine ngo akithi kuma yezah lono ikuqhophevae.

³Timi lhoaye no tomo chhimo keghenguno Ayezah no shimlano achekeu hu, Alhou no shivetsuae. Axine shipuhavenike ghenguno Alhou no paNu kuchou, timi xine lhoaye kimihi lono pa puwu puzu timi lhoaye gholono axine kilevetsu.

⁴Alhou no hi shitsu keuye ningu pelo timi lhoaye kuxu kiqi lono kumono Aghungu papesu xupuzu achipiu shimayesakeu Ayezah lo pipuakeu shikupulu peniyeke.

⁵Kughengu khunoqono timi lhoaye pano lolo akeu papeghi xunikeno pano mlo kukumsuye timi lhoaye puloulo kumsupukupe acheni. Ikemu khunoqono Aghungu papeghi xuni keno pano mlokukumsuye Aghungu puloulo kumsupukupe acheni.

⁶Timi lhoaye puloulo amlo kumsupuku auve aye akithi ipeghive cheni, ikemu Aghungu puloulo amlokumsupuku aye akuxupu eno alokiqipue.

⁷Kughengu timi lhoaye puloulo kumsupukukemi mlo huye Alhou ghumi, eno tiye Alhou yezah gholumovae, eno kuchouno tiye Alhou yezah gholumlae.

⁸Khunoqono pano lolo timi lhoaye akeu gholuni keno Alhou lopu shimla nani.

⁹Kuchouno Alhou Ghungu nongu lolo ani aye, nonguye timi lhoaye nongu lolo akeuno pikeu toi xuamoe, nonguye Aghungu no pikeu toi xuanie. Khuu khumu Khristo Ghungu aghimo aye tipaqoye pawu kumoe.

¹⁰Ikemu Khristo no nongu lolo ani aye, axine ghenguno nongu phimpiye thi aghiepinamu Aghungu ye nongu ghenguno akuxupu, kughengu nonguye Alhou lau achipikape qhivae.

¹¹Akithi lono Jisu xuputhuvekeu Ghungu no nongu lolo acheni aye, khuno akithi lono Khristo xuputhuve keno, pa Ghungu nongu lolo achepe keu vechewo nongu thive nikuau phimpi loghi akuxupu tsu nani.

¹²Tishiaye, ithikuzumiqo, ninguye timi lhoaye pulou pape ghi xukepu pi-agha puamoe,

¹³kughengu nonguno timi lhoaye pape ghi xuaye nonguye thinia, ikemu Aghungu pesu nongu xine kumla kughutha pithive aye nonguye xunia.

¹⁴Alhou Ghungu no khunoqo sapheni keno tipaqoye Alhou nuliqoke.

¹⁵Kughengu Alhou no Aghungu nongu tsukeu huye nongu pelo aquaxemi lakhi shivepe eno nongu pelo msakitheve peniyeke kumoe, ikemu Aghungu no nongu pesu Alhou no saputhuluve keu nuliqo shitsu, eno Aghungu kuka lono ninguno “Apuo! Ipuo!” ipi igha cheni.

¹⁶Alhou Ghungu mpino ningu nguagha sasu kuqhalukeu lono ninguye Alhou nuliqo kepi ashepe tsu cheni.

¹⁷Ninguye pa nuli aye pano pawu timiqo ghenguno amheghi puakeu ninguno ighilu nani, eno Khristo sasu ningu ghi amheghi ighikemi shinia. Kughengu ninguno Khristo ghichhe ghimelo kusaje aye, ningu ghi pa kimthe jukuvulo kusaje nani.

¹⁸Ino kiqikutoju keuye itodolo ninguno kiu aghime sholu ani keno tipauye akimthe-jukuvu ningu lau pephe piyeniye akeu sasu kiu lonomu kimghikulupu kuhae.

¹⁹Kughengu Alhou no lhope puakeu jeli kumtsuno Alhou nuliqo pephe piyenikeu shishe huqhe khe ani.

²⁰Kughengu lhoqhipuakeu yeghiqhaye amekuapu shipemonike ghushove, tiye tipauno puloke ghenguno kumoe, ikemu tishipeni keushi Alhou no pulovetsu. Ikeghi lajupu hi qhipuatsua:

²¹Lhoqhipuakeu yeghiqha hu ghulo lakhiye tsumauveni keuno tsughape akeu lono kuqhopheve nani eno Alhou nuliqono akimthe-jukuvu shi ililayikeu kusaje nani.

²²Ninguno ithiakeuno ishikutolo lhoqhipuakeu yeghiqha kumtsuno pununiaye su akeshi sukelauno igha ani.

²³Eno lhoqhipuakeu yeghiqha likhi kumono, ningu khunoqono Alhou no kumsagho amsu shi tsukeu Ghungu ani keno Alhou no ningu pesu chikamujolukeu nuliqo shipenike kheakelo ni-mpi kuchopu xachilelupe nike nilolo sukuchokiyi su acheni.

²⁴Kughengu hipau lajupulo ningu xalue. Ikemu ninguno laju akeu ithuluve aye tiye lajupu kumoae, kughengu kiu ithuluve akeno khuno tipau lajukepu ani kya?

²⁵Ikemu ninguno kiu ithumla aphikeno tipau laju ani aye, theqhi kulushi ninguno ti khe acheni.

²⁶Tipaphi lono Aghungu no ninguno tomo-chhimokeulo ningu kuphu cheni, kughengu ninguye kishi inikhukepu keno ninguno mthae, ikemu Aghungu ampino atsa shephemlakeu kusu ghugha lono ningu she-pe-ghi Alhou vilo qhuyiniju acheni.

²⁷Timi mlo lhejuchekeu, Alhou huno Aghungu kukumsu ithi ani, kughengu Aghungu no Alhou pulou kiqi lono kupulumiqo she-pe-ghi Alhou vilo qhuyiniju acheni.

²⁸Nino ithi akeuno Alhou kimiji kiqi lono pa kimiye chekemi khunoqo kuluvea keno tipaqo lau thwokha kumtsulo akivipu ghenguno mla kuqha acheni.

²⁹Alhou no khunoqo azuuno kisheve akeno panoqo ghenguye paNu kimihilo kusaje penike puuno kututashipe qhivae, tishianguno Anu pelo athikuzumi gholo atughiu shipeniyeke.

³⁰Ikehu Alhou no khunoqo kutashi qhipe puani keno tipaqo pano kuluve cheni, eno panoqo kuluveke likhi kumono panoqo pesu pa lau achipikaluve keu shi qhive cheni, eno panoqo pesu pa lau achipikaluve keu shi qhikeu likhi kumono, panoqo sasu pa kimthe- jukuvu ghi kusaje cheni.

³¹Tishi aye, ninguye hipaulo kiu pikulupu ani kya? Alhou no ni kudau ani aye khuno ningu shou kiu shikulupu kya?

³²Pano paNu ghi suchilevemono ningu kumtsu ghenguno pephetsuveke! PaNu tsukeu gholono thwokha kumsa ningu tsumoni kesha?

³³Alhou no kisheluvekemiqo shou khuno akipimi tsukulupu kya? Alhou ampino panoqo pesu, “Achipishivae” ipivetsua!

³⁴Khualano panoqo ghushokulupu kesha? Jisu Khristo thivekeu huno keo? Tikekumono, paye akithi lono xaputhuve puzu Alhou u-ajeu ngono ningu ghenguno qhuinijutsu ani.

³⁵Tishiaye khuno Khristo wu kikimiye lono ningu kughuxalu nani kya? Shiluksa-kitikhino keo, akijikusano keo, shikimighi keuno keo, akhu-amzuno keo, aqu-aghano keo, akuyighupu kiualano keo, momu ghiqhi-pithikeuno kya?

³⁶Kuchoyesulo pipuakeu toi, “Oghenguno atsala kupuju ningu kukumsu pithive acheni. Bheri ghiqhiniye sawo puakeqo toi ningu peitha acheni.”

³⁷Moe, hipaqo kumtsulo khuno ningu kimiye chenikeno pa vechewo ninguye tokulupu shishe ani!

³⁸Kughengu ino mtsuqheyi ithi keuno kiu nomu pa kikimiye lono ningu kughuxa mlae, akithi na, akuxu na, kungumi na, atsutsulo ayehpemi na, itehi thwokha akeu na thwokha ighinikeu shiaghina, momu akuka jeli na,

³⁹ayeghiqha shou akeu na ayeghiqha qhou akeu namu, momu, lhoqhipuakeu yeghiqha kumtsulo kiunomu ningu Mpeu Jisu Khristo gholono Alhou kikimiye ningu wu shiakeu launo khilemu nikughuxavetsu mla nani.