Read Sumi Naga 1 KORINTHIAMI 1 Bible Online

1 KORINTHIAMI 1 - Sumi Naga bible

1 KORINTHIAMI 1

¹Alhou pulou vechewo Jisu Khristo wu apostolmi shipenike kuluvekeu Paul, eno ningu thikuzuu Sosthene pamano Korinthia lo Alhou kukuhou akemi lau ye ani.

²Aqha kumtsulo ningu Mipeu Jisu Khristo gholono nonguye shikimtheluve kemi eno Alhou timiqo shipenike kuluvekemike.

³Ningu paPuh Alhou eno Ampeu Jisu Khristo kudauno kupukini ngo alokiqipu nongu shou apeniu.

⁴Jisu Khristo vechewo Alhou kupukini nongu tsukeu ghenguno, niye pulhapuju shikimthikeu Alhou tsu acheni.

⁵Kughengu Khristo gholo kimepe akeu vechewo nonguye thwokhalo kinimi shilupeke, atsapi kumtsulo eno akighithi kumtsulo,

⁶tiye Khristo ghili pesu ashepe shikeu nongu gholo mutotoi alupekehuke.

⁷Tighenguno ningu Mipeu Jisu Khristo pephe piyenichekeu nonguno khe-a kelo, nonguye angu-agha akumghagho lakhimu ithulukhamokeu shiamoe.

⁸Pano ashekha kutolo nongu pelo mutotoi penani, tishianguno ningu Mipeu Jisu Khristo Tsala ighikelo nonguye kuqu mono aghi penani.

⁹Alhou ye pukhubekuluke, pa Nu Jisu Khristo, ningu Mipeu gholo kuposhulukeu apenike pano nongu kulukeu Lhou huke.

¹⁰Athikuzumiqo niMpeu Jisu Khristo kuka akeu vechewo ino nongu qhuiniju anike, nongu kumtsuno kuptsa kuqhalulo eno nongu gholo kijethakile keu apekevilo; ikemu akukumsulo eno kughathalu keulo aphiphishi kuqhakulu shilo.

¹¹Kughengu Khloyis no-sholokumi khamino ivilo mutsuqheyi piveake, nongu ithikuzumiqo gholo mutomushu keu aniepike.

¹²Ike ino hi piakeuye kutau kumo puzu nongu gholo pututa shelo ishi pikeu ani: “Niye Paul laumike,” “Niye Apollo laumike” “Niye Pitor laumike,” momu “Niye Khristo laumi ke” ipikeu akhani.

¹³Khristo ye kijethapiniyive akesha? Paul no nongu ghenguno kros lo thi kesha? Nonguye Paul je lono baptiz shikesha?

¹⁴Ino Alhou shikimthi anike Krispa ngo Gayia pama nguno alauye niye nongu milakhimu baptiz shitsu puamoe.

¹⁵Ikehu timi khunomu ino ijelo nongu baptiz shitsu kepi pipemoke.

¹⁶(Kumchomaghi, niye Stefana ngo pa kibolomi ghi baptiz shitsu kena; ikemu tinguno alauye kutami khumu ino baptiz shitsukemo keno mthavae.)

¹⁷Kughengu Khristo ye ipelo timi baptiz shipenike ipuwuke kumoe ikemu lokivipu sutsa pikulha penike ipuwuke, eno timi suqekithi tsa peitha puzu pikulhalo pimoe, kughengu tishinikeloye Khristo no kros lo thikeu lono akuka ipeghikeu pukhulevetsu nosakehue.

¹⁸Kughengu puhave nichekemi ghenguye Khristo no kros lo thikeu ghili pikulhakeuye mbomzu tsake; ikemu ningu khunoqomi xaluve akeno tiye Alhou kuka ke.

¹⁹Tighenguno kuchoyesulo ishi yepepuani: “Ino asuqekithimi suqekithi shipuhavetsu nani, Ino akighithimi muqu lutsumove nani.”

²⁰Tishiaye asuqekithiu khile ani kya? Momu akighithiu khile ani kya? Momu hipa yeghilomi gholo kighe kithiu khile ani kya? Alhou no hipa yeghilomi suqekighithi pesu mbomzu shivetsuke kumo kesha?

²¹Tighenguno Alhou no pa suqekighithi lono ayeghilo timiqo pelo panoqo suqekighithi vechewo Alhou ithikepu shitsumove. Tishinike zuqhulo ninguno mbomzu sutsa pesu asheshu keu vechewo khunoqomino ti pulukeno tipanoqo xalupe nikeuno Alhou pulou shiaghive.

²²Judamino amchipu khucheni eno Grikmino asuqekighithi phucheni,

²³ikemu ninguno Khristo kros lo yedavekeu pesu asheshu cheni. Judami ghenguno tiye shokukho kepushive eno Judakumomi ghenguno tiye anikha tsa shive;

²⁴ikemu Alhou no khunoqomi kuluve akeno, Judami na Grikmi pinamu, atsapeye Khristo ke, pano Alhou kuka eno Alhou suqekithi ke.

²⁵Kughengu Alhou wu mbomzu kepi chekeu huye timi suqekighithi nguno akighithiuke, eno Alhou wu mutomokeuye timi kukakumto nguno akumtou ke.

²⁶Tighenguno athikuzumiqo, Alhou no nongu kulukeu kumsukuto julo. Ayeghilo kuxu kiqiloye nongu gholo kutomono ithishekemi kumoe, nongu gholo kutomono timi ghusukulumi kumoe, momu kutomono kijemi kumoe.

²⁷Ikemu asuqekighithimi shikukujo nikehu ayeghilomino aghuzu nikha kepi pichekeqo Alhou no puthaputsano kishelue; eno akumtomi shikukujo nikehu Alhou no puthaputsano ayeghilomino tomo-chhimo kepi pichekeqo kishelue.

²⁸Ayeghilomino khipaqo jukunatha eno jumthi chekeno eno kiumu kuha kepi pichekemi qou Alhou no kisheluke, tishikeuno ayeghilo akhotokepi pichekeqo shipuhave niyeke.

²⁹Tighenguno Alhou zulo timi khumu qhezamla penike.

³⁰Alhou no nongu pelo Jisu Khristo sasu kimelupe, eno Alhou no Khristo pesu ningu wu suqekighithi shitsue; pa vechewo Alhou sasu achipi shiaghilupe, eno Alhou timiqo shilupe, eno ningu xaphetsuke.

³¹Tighenguno kuchoyesulo yepuakeu toi, “Khunono qhezani keno Ampeu no kiu mlavetsu keno tipaulo qheza pelo.”