Read Sumi Naga 1 KORINTHIAMI 10 Bible Online

1 KORINTHIAMI 10 - Sumi Naga bible

1 KORINTHIAMI 10

¹Athikuzumiqo, niye nongu pelo nipu-asu qoye kishivekeno ithi penishi ani. Panongu kumtsu akimhino khesasu checheke, panongu kumtsu Azughi vechesu wulukhake.

²Panongu kumtsu Muse papemiqo kepi akimhi ngo Azughi gholono baptiz shiluke,

³panongu kumtsuno angu-agha kuxupu sho chuke,

⁴kumtsuno angu-agha kuxupu zu yeke. Kughengu panonguno panoqo gholo chechekeu angu-gha kuxupu tuqu lono ipeghikeu zu yeke eno atuqu tipauye Khristo ke.

⁵Ikeghi, panongu kutomo shou Alhou ye amlo qimoveke, ikehu asayeqhalo panongu sukumo apanagha pevetsuke.

⁶Itehiye hipaqo thime huno ningu kutughukeu shianike, ningu pelo panongu toi alhoksa thime kumsu mine pemoniyeke.

⁷Panoqo khami toi nonguye alhoaye julho mllakemi shikevilo. Kuchoyesulo pipuake toi, “Timiqono chuniye shoniye iqa eno ilheniye ithuke.”

⁸Panoqo khami toi ninguye kipti toti dolo mithemokeu shikepu kumoe, ghulo lakhi lono panoqo 23,000 ikiqi thivekehu.

⁹Panongu khami toi ninguye Ampeu ghukeju kepu kumoe, apighino panongu mighiqhive kehu.

¹⁰Momu panongu khami toi muchho kepu kumoe, Akithi ghahwuno panongu pithivekehu.

¹¹Hipaqo kumtsu panongu shou ikughi keu huye kichekipiyeke, ikemu hipaqo yepe qhipuaghikeuye ningu kutughuakeu ke, kughengu ninguye kishekha wochekeu ghulokilo xuayae.

¹²Tighenguno timi khuuno paye mutotoi puthugho ani kepi kumsu anikeno paye veqhimo kepushi jukutolo.

¹³Ghukuju khijehi nongu zulo ighi keno tipa tho lono timi kutami zulo ighi cheni. Alhou ye pukhubekuluke eno pano okumto qhemi nguno alauye oghujupemo nani; ikemu oghuju ake ghulokilo opelo ti pulu pekepu shi pano alaghi phuphetsu nani.

¹⁴Tighenguno, ino kimiye chekemiqo, alhoaye julho mllakeu phevelo.

¹⁵Niye alokutsumi vilo toi pianike; ino kiu piani keno nongu likhi nonguno kughathajulo.

¹⁶Kumghakeu jukhu khikhi ninguno kumghakeu khukeno, Jisu Khristo ji gholo kuposhu anike kumokesha? Asho khikhi ninguno supho ani keno, Khristo phimpi gholo kuposhu anike kumo kesha?

¹⁷Kughengu ashono lakhi kehutoi, ningu kutomo kemu aphimpi lakhi ke, kughengu ningu kumtsu asho lakhi kusajeke.

¹⁸Israilmi ghili kumsukutojulo; khunoqono mllakeugho chuni keno panonguye akumllagho kiptialo kuposhu anike kumo kesha?

¹⁹Tishiaye niye kiu piani kya? Alhoaye julho lakhi lau achuqu pesu mllakeuye achuqupu nguno tikutave akesha? Momu alhoaye julho lakhiye alhoaye julho kumoveno tikutave akesha?

²⁰Tikutamoe. Ino piakeuye Alhou kumthamino akumllagho shikeuye tughami mlla ani kethono Alhou mlla amoe. Niye nongu pelo tughami sasu kuposhu penishimoe.

²¹Nonguye Ampeu jukhulo shopuzu tughami jukhulo ghi shomlae; nonguye Ampeu ghulhu alo chupuzu tughami ghulhu alo ghi chumlae.

²²Momu ninguye Ampeu nhekushupu xukuthoni kesha? Ninguye panguno akumtou kepi nonguye kumsu ani kesha?

²³“Thwokha kumtsu shilu nani thono” ipi picheni, ikemu thwokha kumtsu akivike kumoe. “Thwokha shilu nani thono ikemu thwokha kumtsuno xaqhelu chemoe.”

²⁴Timi khumu pa kivipu phukepu kumoe, ikemu kutami kivipu phukepue.

²⁵Ashi kije alo je aghikeu kiukiumu chulo eno kivikusa lokutsu shipusamo nike ghenguno kiumu inijukevilo.

²⁶“Kughengu ayeghi eno tile akeu thwokha kumtsu Ampeu wuke,” ipivae.

²⁷Pulumokemi lakhino alibe chupeniye oku aye eno noye wukepu shive aye, ti kivikusa lokutsu shipusamo nike ghenguno ozulo kiu qhitsuni keno kiumu inijukevi puzu chulo.

²⁸Ikemu timi khualano ovilo, “Hiye alhoaye julho mllavekeu ke,” ipi aye timi khuno ovilo, tipau pikeno timi tipau kivikusa lokutsu shipusamo nike ghenguno, tiye owu kivikusa lokutsu kumo puzu kutami wu kivikusa lokutsu ghenguno, alibe tipau chukevilo. Ikelo ishi piluvi, “Kushiye kutami wu kivikusa lokutsu pelo ino kiu shikulupu shiani keno lakha apeni kya?

³⁰Ino Alhou shikimthiveno ichuqupu chuaye, kushiye ino Alhou shikimthivekeu chuqupu ghenguno kutamiye ipipusa kepu ani kya?”

³¹Tighenguno, nonguno chuna, shona momu kiu kiu shiepinamu kumtsulo Alhou jukuvupu ghenguno shilo.

³²Judami, Judakumomi momu Alhou kukuhou pelo shokukhomo kepushi xulo.

³³Nighi ilikhi ikivipu phumo puzu ino thwokha shikeu kumtsulo kutami lokiqipu shinike pukaputsa cheni eno kutami kivipu shicheni, tishianguno panongu xalu penikehue.