Read Sumi Naga 1 KORINTHIAMI 11 Bible Online

1 KORINTHIAMI 11 - Sumi Naga bible

1 KORINTHIAMI 11

¹Ino Khristo kimihi shike toi nongu ghi pa kimihi shilo.

²Niye nongu akishe tsuani, kughengu nonguno pulhapuju ikumsulu acheni eno ino nongu lau pekishe suwo tsukeu kukutsuqo nonguno papeluke.

³Ikemu ino nongu pelo ithipenishi akeuno Khristo ye kiptimi lakhi shou akutsuke, totimi shou li kimino akutsuke titoi Khristo shou Alhou no akutsuke.

⁴Ike kiptimi lakhino aqo-hoholo akelo pa kutsu kuzupuno inikhu momu Alhou tsape shiaye Khristo shipunha ani.

⁵Ikemu totimi khuno aqo-hoholo li kutsu shonhapumono inikhu momu Alhou tsape shini keno liye likimi shipunha ani; liye totimi akutsusa miyeve tsukemi sasu aphiphi ake.

⁶Totimino akutsu shonhapumo aye, liye akutsusa tsavekepue, ikemu totimino akutsusa tsavekeu momu miyevekeuye kujokepuke ghenguno liye akutsu shonhapu kepue.

⁷Kiptimiye pa kutsu kuzupu kepu kumo, kughengu pano Alhou ngulho eno Alhou jukuvupu yebidetsu ani, ikemu totimino kiptimi jukuvupu yebide ani.

⁸Kughengu kiptimiye totimi launo lhopheke kumoe, ikemu totimiye kiptimi launo lhopheke.

⁹Momu totimi ghenguno kiptimi lhopheke kumoe ikemu kiptimi ghenguno totimi lhopheke.

¹⁰Tishiaye, kungumi akeu ghenguno sake totimiye li kimi qholo akeu piyekeushi li kutsu shonhapu kepue.

¹¹Ikemu Ampeu gholo xukuqhape akeulo totimiye kiptimi launo kututakeu kumoe momu kiptimiye totimi launo kututakeu kumoe.

¹²Kughengu totimiye kiptimi launo mlapheke toi kiptimi ye totimi vechewo punu cheni; eno thwokha Alhou launo ighike.

¹³Nonguno kughatha julo: Totimino aqo-hoholo li kutsu shonha pumo puzu Alhou vilo inikhukeu achipi kesha?

¹⁴Alhoaye lonomu nongu shikakeuno kiptimino asa kushuwa pukeuye pa shipunha anike kumokesha?

¹⁵Ikemu totimino asa kushuwa pukeuye li kijivilopuke, kughengu li- sa kushuwa shipekeuye tino shonhapukepu shipeniye tsupuanike.

¹⁶Ikemu hipaulo khualano kutsala kepushiaye, ningu na Alhou kukuhouqo namu kutau pepimhe chekeu gholo kuhake.

¹⁷Ikemu hi kishi shikepu keno piniye akeqolo niye nongu sheqhekepu kuhae, kughengu nonguno akukuho kuhokelo akivipu kumo puzu alhoksapu shi acheni.

¹⁸Atughushi pikepushi akeuno, kughou nonguno kuhoni keno nongu gholo lethakilekeu akeu ino chiluvae; eno tiye kuchou shiaghi nani kepi niye puluvae.

¹⁹Kughengu nongu dolo alaxa kututa shi aghi mayesake tishianguno nongu gholo khunoqono achipishi ani keno tipaqo mutsuqheyi michilupeniyeke.

²⁰Kughou nonguno kuhokumuqoni keno, nonguye Ampeu Ghulhu chu chenike kumoe.

²¹Kughengu nonguno pututa shelo pututa libe chuthuve cheni, ikehu khamiye muzuthi acheni eno khamiye shomzu acheni.

²²Nonguye chuni shonikeu pututa ki kuha kesha? Ikeo, Alhou kukuhou thaigha nike eno kumlhomi shikukujoniye kya? Niye nongu vilo kiu pilo pikya? Niye nongu sheqhelo pikesha? Hipaulo niye nongu sheqhe mla thono!

²³Kughengu Ampeu launo ino pekishelukeu kukutsu nongu lau pekishe pesu tsuvekeuno, Ampeu kughapesu atheshivenike ji Ampeu Jisu no asho ikhilu,

²⁴eno Alhou shikimthi puzu tipau supho, eno ishipi, “Hiye iphi- mpi, nongu ghenguno tsuvekeuke.[2] Ikumsuchilelu ghi hi shichelo!”

²⁵Tipaphi lono, aghulhu thiu pano ajukhu ikhilu, eno ishipi, “Hiye Alhou wu puloshoqhi akitheu ihji pesu shikeu ke. Nonguno kughou hi sho nikeno tijehilo ikumsuchilelu ghi hi sho chelo.”

²⁶Kughengu kughou nonguno asho hipau chuni eno ajukhu hipau ikhilu nikeno tijehi Ampeu ighimoke kutolo nonguye pano thikeu pikulhatsu anike.

²⁷Ikehu khunono tsaqutsaleyi mokeu ghola lono Ampeu sho chuni momu Ampeu jukhu ikhiluni keno paye Ampeu phimpi eno Ampeu jih shou akipimi shivae.

²⁸Tighenguno timi lakhi khino paye kiutoi anikeno kumsukutoju puzu asho eno ajukhu ikhilulo.

²⁹Kughengu khunono Ampeu phimpi kiqi michimla puzu asho chuni momu ajukhu ikhiluni keno pa likhi pa shou kughakuthapu sughikepu chu sho anike.

³⁰Hitoi shikeu vechewo nongu kutomono qeyi-nai eno kusukini shicheni eno nongu gholo khamiye thivae.

³¹Ninguno pututano kiutoi anikeno achipishi kumsukutoju aye, ninguye Alhou wu kughakuthapulo ilomonicheke.

³²Ikemu Ampeu no ningu shou kughathabe kehu aghime ningu tsuke, tishianguno ayeghiqha gholo kughathabe kuqhamoniye ke.

³³Ithikuzumiqo, kughou nonguno Ampeu Ghulhu chuniye kuhokumqoni keno, kikhekile lo.

³⁴Khualano muzuthi aye paye aki lono chukepue tishianguno nonguno kuhokumqo kelo Alhou no nongu shou kughathabemo nani. Kutau vehuqo ghenguye ino ighike lono tipaqo xathatsu nani.