Read Sumi Naga 1 KORINTHIAMI 12 Bible Online

1 KORINTHIAMI 12 - Sumi Naga bible

1 KORINTHIAMI 12

¹Athikuzumiqo, itehiye Aghungu no agho tsukeu ghili kuchouno kiu keno niye nongu pelo ithive penishi ani.

²Nongu ampino ithi ani, ike nonguno ayekumthami shiache keloye, khila khila nomu nongu hakutho aye atsa piphekumla alhoaye julho lau nongu sakughuzu sawuvepe che.

³Tighenguno ino nongu pelo hi ithipenishi akeuno timi khumu Alhou Ghungu no sache puzu, “Jisu ye musuiniveake!” ipi khilemu pimo nani eno khunomu Aghungu Kimthe no sachemo aye, “Jisu ye Ampeu ke,” ipi piphetsumo nani.

⁴Ike, Aghungu gho ajeli kututa ani, ikemu agho tipaqo tsuakeu Ghungu ye lakhike.

⁵Ala ajeli kututa lono peithatsu kulupu ani, ikemu peithapekeu Mipeu ye lakhike.

⁶Peitha tsupekepu kuka ajeli kututa ani, ikemu peitha lupenike akuka tsuakeu Lhou ye lakhike.

⁷Aqokivipu ghenguno milakhikhi lau Aghungu akeu pephepiye lupenikeu tsu cheni.

⁸Milakhi lauye Aghungu vechewo asuqekighithi pikulupu tsu cheni, kutami lakhiuye Aghungu tipau huno akighithitsa pikulupu tsu cheni.

⁹Aghungu tipauno kutami lakhiye akupulu tsu cheni, kutami lakhiuye shikipivi gho tsu cheni.

¹⁰Aghungu no milakhi pelo akumzapu kumla shilukepu kuka tsu cheni; kutami lakhiuye Alhou tsape pilukepu gho tsu cheni, kutami lakhiuye Aghungu launo ighikeu gho kemo keno michilu kepu kuka tsu cheni. Milakhi lauye amilikithe sutsa jeli lono pilukepu kuka tsu cheni; kutami lauye amilikithe sutsa pekidetsu kulupu tsu cheni.

¹¹Ikemu Aghungu no khuno tsukuzu keno tipano tsu cheni.

¹²Kughengu aphimpiye lakhi puzu aphiau kutomoke, eno aphiau jeli kutomo shianamu aphimpiye lakhike, ike Khristo gholoye tihutoike.

¹³Tikithipu lono ningu Judami na, Judakumomi na, aquaxemi na, kutami qholo ngomokemi pimu kumtsu Aghungu lakhino aphimpi lakhilo baptiz shike eno ningu kumtsu pelo tipau Ghungu yelu peke.

¹⁴Kughengu aphiau lakhi likhino aphimpi shipe puamoe, ikemu aphiau kutomo pesu shipuanike.

¹⁵Tsala apukhuno, “Niye a-u kumoke ghenguno aphimpi gholo kumoe” ipi aye tiye aphimpi aphiau kumoveake kumoe.

¹⁶Momu akinino, “Niye anhethi kumoke ghenguno aphimpi gholo kumoe” ipi aye tiye aphimpi aphiau kumoveake kumoe.

¹⁷Aphimpi kuchopu anhethi shiveke aye khileno chiluni kya? Aphimpi kuchopu akini shiveke aye khileno tsunguluni kya?

¹⁸Alhou no pa pulou lono aphimpilo aphiauqo agholauno kithikiyipe puatsuke.

¹⁹Hipaqo kumtsu aphiau lakhi likhi shi aghike aye aphimpi khile aniche kya?

²⁰Aphiau kutomo apinamu aphimpiye lakhike.

²¹Ikehu, anhethiye a-u vilo ishi pimlae, “Niye no avehupu shiamoe!” Momu akutsuye apukhu vilo, “Niye no avehupu shiamoe,” ipi pimlae.

²²Tishike kumo puzu, aphimpilo aphiau khikhi miqemileyi kepi cheni keno tipaqo sumokelo kiumu shimla keu ani,

²³eno aphimpilo aphiau khipaqo akhoto kumo kepi ninguno kumsu cheni keno tipaqoye ninguno akikhishi tuchomujo cheni. Ningu phimpilo aphiau khikhino jusakeno tipaqo hejukuto masakeu auvecheni,

²⁴ikemu ningu philo aphiau jukivi khikhi anikeno tipaqoye tishi moepimu kiumu kumoe. Alhou no ningu phimpi sukumqo tsukeu lono tipaulo miqemileyi keu hejukuto masakeu alau shipeniyeke.

²⁵Ike tishianguno aphimpilo kidikumla shipemoniyeke ikemu aphiauqo pelo lakhino lakhi ghenguno aphiphi shi hejukile peniyeke.

²⁶Aphiau gholo lakhino ime aye, kumtsuno tipau gholo imekuqha cheni; aphiau gholo lakhino sheqhekepu shiaye kutau kumtsuno tipau gholo alovikuqha cheni.

²⁷Tishiaye, nongu kumtsu Khristo phimpike, eno milakhikhino tipau phiauqoke.

²⁸Ike Alhou no akukuholo hitoi qhipuatsua: atughushi apostolmi, akiniuno tungkupmi, akuthuuno akukutsumi; tithiuno akumzapu kumlami, tithiuno shikipivi kuka tsupuakemi, kuphukulumi, saphe kulumi, amili jeli lono pikemi.

²⁹Panongu kumtsu apostolmike kumoe, kumtsuno tungkupmi kekumoe momu akukutsumi kekumoe. Kumtsuno akumzapu kumla shichemoe.

³⁰Shikipivi kuka kumtsu tsupuanike kumoe, momu kumtsuno amili jeli lono pikemike kumoe, momu kumtsuno muzamghaleyikeu mili jeli lono pikeu kiqi pikidesulu chenike kumoe.

³¹Tishiaye, agho kumtsu nguno akhotouqo lau amlo tsulo. Tinguno alau alaghi akiqheu lakhi ino nongu kichepiyeni.