Read Sumi Naga 1 KORINTHIAMI 13 Bible Online

1 KORINTHIAMI 13 - Sumi Naga bible

1 KORINTHIAMI 13

¹Niye timi mili momu kungumi mili lono mu atsa pi aghiluvi, ikemu kimiyekini kuha aye isutsaye ayikihe ghugha paphi likhike momu ayi kugha kelo aghugha ipeghikeu paphi likhi ke.

²Niye tungkupu tsa pikulupu kuka aghiluvi eno muzamughaleyi keu jeli kumtsu eno akighithi jeli kumtsu ithikuto aghi luvi, ikupuluno naghutoqo tukiqhe kulupu kuka aghiluvi, ikemu kimiyekini kuha aye, niye kiumu kuhae.

³Ino aghikeu kumtsu pesu tsupuwu aghiluvi eno iphimpi pitivepeniye ikhiphetsu aghiluvi, ikemu kimiyekini kuha aye niye heshekulupu kiumu kuhae.

⁴Kimiyekiniye kusuqhikulu eno amlo ighiqhiyi keuke; kimiyekiniye aghichipo chemo, qhezalaki chemo, lahilaza xuchemoe;

⁵akuchhoma shichemo, aghukha shichemo, axuide chemo momu alhoksa hekutsu kiyipe puachemoe.

⁶Kimiyekiniye alhoksa shikeu jupesu alokiqishi chemoe, ikemu kuchou gholo alovikuqha cheni.

⁷Kimiyekiniye kumtsu kutuuluve cheni, kumtsu pulube cheni, kumtsu lajube cheni eno kumtsu theqhighi khea cheni.

⁸Kimiyekiniye khilemu ashekha shivemo nani. Tungkuputsa ghi kishekhave nani, amilino pikeu ghi hauve nani, akighithi ghi ashekha shive nani.

⁹Kughengu ningu kighithiye kupukulai mphike eno ningu tungkuputsa kipiye kupukulai mphike.

¹⁰Ikemu kughono kupukulaikeu ighini keno tileno kupukulaimo keu huye hauve nani.

¹¹Kughou ino itimi shiche keno, niye itimi toi piche, itimi toi kumsuche, itimi toi kuptsa kiqijuche; ikemu kughou ino kichimi shive keno niye itimi suqe ghili phekhavae.

¹²Kughengu itehi ninguno ithulu akeuye ahijukeu yinalo ajulho michimono ithuluakeu toike; ikemu hithiuye agino agi kinheqhe ninguno ithulu nani. Itehi ikighithiye kupukulai mphike, ikemu Alhou no no ithiakeu toi hithiuye ino kumtsu ithive nani.

¹³Tishiaye, hipano kuthu acheni: akupulu, lajupu eno kimiyekini; ikemu hipaqo gholo akiqheuye kimiyekini ke.