Read Sumi Naga 1 KORINTHIAMI 14 Bible Online

1 KORINTHIAMI 14 - Sumi Naga bible

1 KORINTHIAMI 14

¹Tishiaye, kimiyekinino nongu kimji shilo, eno Aghungu no agho tsukeulo akhotono tungkuputsa pi keulo nongu mlo tsuqhiyilo.

²Timi khuno amili jeli kutauno picheni keno paye timi putsa anike kumono Alhou putsa anike, kughengu pano pikeu khunomu mthake, ikemu Aghungu kuka lono paye tuqhou mili jeli akeu lono pianike.

³Ikemu khuno tungkuputsa pi anikeno paye timi vilo pianike, tipaqo xaqhepuku cheni tipaqo mlo shikumto eno alokughunotsu cheni.

⁴Timi khuuno vethakumla tsa piani keno pa likhi pa xaqhepuku ani, timi khuuno tungkuputsa pi ani keno paye akukuhou xaqhepuku anike.

⁵Niye nongu kumtsu amilikithe tsa kutauno pipenishi achenike, ikemu tinguno alauno tungkuputsa pi penishike. Atsa kutauno pikeuhu khualano pikidesutsu puzu akukuhou xaqhepuku lupenike kumoaye, timi khuno tungkuputsa pinikeno pano amilikithe tsa kutauno pikeu nguno akiqheuke.

⁶Tishiaye athikuzumiqo, ino nongu lau ighikelo amilikithe tsa kutauno nongu putsa aye niye nongu vehupu kiu shiluni kya? Niye Alhou no ikhiphe piyevekeu hami, akighithi hami, tungkuputsa hami momu kutsukepu hami ishi nongu lau sughinike kumoaye, kutauye kiumu nongu vehupu shimla nanike.

⁷Akuxu kuhakeu tshamugha, fulili ngo akighilebo toikeu ghi mutsumisheyi kuyigha moaye kishi puzu kiu kuyigha anikeno kutamino tipau sutsa michiluni kya?

⁸Timi khuno afuko kuyigha anikeno tipauno mutsumisheyi keu sutsa tsumoaye, aghu shinike ghenguno khuno kutoni kya?

⁹Nongu ghi tihutoike, nongu mili pesu mutsuqheyikeu tsapi pimoaye nonguno kiu pianikeno kishi puzu ithikutoluni kya? Nonguye amulhulo pisu auvae!

¹⁰Ayeghiqhalo atsa jeli kutomo ani, ikeghi tipaqo lakhimu akiqi kuhakeu shichemoe.

¹¹Ikehu atsa pikeu tsa ino mtha aye khuno tipau piani keno ighenguno paye inami shiauve nani eno nighi pa ghenguno ghi inami shiauve nani.

¹²Nongu ghi tihutoike, nonguye Aghungu gho pepimhe nike minemigheyi anike, ikemu tinguno alauno akukuhou tuchomujo pukunikeuno akiqheu shinikeu pukaputsalo.

¹³Tighenguno khuno amilikithe tsa kutau picheni keno paye pikidesulu kepu kuka khuini masae.

¹⁴Kughengu ino amilikithe tsa kutauno inikhuaye ighughaye inikhu ani ikemu ikukumsuye tipaulo kiumu avehupu shilu amoe.

¹⁵Tishiaye kishi kepu kya? Niye ilokutsu ghi sukuqhano angu agha lono vethakulu shi inikhu eno akishele phe mayesae.

¹⁶Kughengu nono angu-ghalo likhino Alhou shikimithi aye, kuho kuami inapughami lakhiye nono kiu pianikeno mthakeloye kishino “Amen” ipi nono shikimthi akeulo pikuqhaluni kya?

¹⁷Nono Alhou shikimthi akeu kighiniye akiqheu shiaghiluvi, ikemu kutami xaqhepukumovae.

¹⁸Ino Alhou shikimthi akeuno nongu kumtsu nguno alaushi ino atsa kutau lono picheni.

¹⁹Tishi namu, akukuholo niye kutami shika puthu kepushi, ikukumsu su puzu atsa lothi pungu pikeuno atsa kutauno atsa 10,000 kutolo pikeu nguno akiviuke.

²⁰Athikuzumiqo, nongu kukumsulo itimi toi shikevilo. Alhoksa shinikeu loye itimi toive masa ikemu akukumsu loye tekhoyi vemasae.

²¹Ayezah kakulo ishi yepuani: “Kutami tsa kipimi vechewono eno inami tsauno ino timi hipaqo putsa nani. Tishikeghi iwu timiqoye itsa initsumo nani, ipi Ampeu no pike.”

²²Tishiaye amilikithe tsa kutauno pikeuye akupulu kuhakemi ghenguno amchipu lakhi kethono kupulumi ghenguno kumoe.

²³Akukuhomi kumtsu kumqokelo kumtsuno amilikithe kutauno piake lono inapughami khami momu pulumokemi khami iloghiaye, nonguye kumtsu izupho kicheyivea kepi panonguno pimoni kesha?

²⁴Ikemu nongu kumtsuno Alhou tsape shiaye pulumokemi momu inapughami lakhino iloghi kelo, pano kiu chilukeno tipaqono pa kichepheve nani eno tipaqono pa vilo kiu pikepu keno pi nani.

²⁵eno pa mlolo tuqho tughou akeu lhapheve nani, eno pa gi pishiqhope Alhou mllano ishi piphe nani, “Kuchouno Alhou ye nongu gholo anie!”

²⁶Athikuzumiqo, tishiaye kishi kepu kya? Kughou nongu kuhoni keno khuu khunomu alekiphepu lakhi sughiluvi, kutsukepu lakhi sughiluvi, piyekusu lakhi sughiluvi, atsa kutau momu tipau pekidesukeu sughiluvi. Ikemu kumtsu akukuhou xaqhepuku kepu shimasake.

²⁷Tsala timi khamino amilikithe tsa kutauno pikepu shiaye, mikini momu akichiuno mikuthu likhino shipelo eno kivetsughu pipelo, eno milakhi pelo pekidesutsu pelo.

²⁸Ikemu pekidesutsu nikemi tilehi kuha aye, khuu pelomu akukuholo, pi ipeghipe kevilo, ikemu pa likhi pa putsa eno Alhou vilo pive pelo.

²⁹Tungkupmi kini momu kuthu pelono pipelo, eno kutami pelo panonguno pikeu tsalo kughathaju pelo.

³⁰Ikemu tilehi iqa akemi kutami lau Alhou launo piyekusu lakhi ithuluaye atughulo piakeuye ngove pelo.

³¹Kughengu nongu lakhi khino apasushi Alhou tsape shilu nani, tishianguno kumtsuno phukide kudajulu nani eno kumtsu shikumtolu nani.

³²Alhou tsape shinikemi nguaghaye akipiuno alikhi aghasu kulupu shikepuke;

³³kughengu Alhou ye ningu pelo kubangu peniyeke kumoe, ikemu iquneyi shipeniyeke. Alhou kukuhou kumtsulo

³⁴totimiqoye kuhokelo iquneyi kepue. Kughengu panonguye akukuholo pinikeu lakha puani. Judami yezah lo pipuake toi panonguye aqhokigheu shikepue.

³⁵Panonguno kiuana ithinishi kutu aghiaye, aki lono pututa kimi vilo inijukepu. Kughengu totimi lakhino akukuholo atsakipiu shikeuye kujokepu lakhike.

³⁶Alhou tsaye nongu launo huthuphe kesha? Ikeo, nongu lau likhi tipau ighi kepu shikya?

³⁷Timi khunono paye Alhou tsapemi kepi kumsu ani momu paye Aghungu no sakichemi kepi kumsu ani keno timi tipauno ino nongu lau kiu yepuwu anikeno tiye Ampeu no ahza tsukeu kepi ithi kepue.

³⁸Ikemu timi khunono hipatsa phimoni keno timi tipau phimove kepue.

³⁹Tishiaye, athikuzumiqo, Alhou tsape shinike amlo tsuqhiyilo, ikemu amili kithe lono pikeu lakha kevilo.

⁴⁰Thwokha kumtsu kithikiyi eno agholauno shimasae.