Read Sumi Naga 1 KORINTHIAMI 15 Bible Online

1 KORINTHIAMI 15 - Sumi Naga bible

1 KORINTHIAMI 15

¹Athikuzumiqo, ino atsakiviu khikhi nongu vilo pikulhache keno, eno khikhi nonguno ikhiluvea keno eno khipau shou nongu kupulu bepe ani keno

²eno khipau vechewo nongu xalukeno tipau nongu vilo piputo nishi ani. Nonguye abokumsa lono pulumo puzu nongu vilo kishekulu pivekeu tsa mutotoi tsuqupe aghiaye tipau vechewo nongu xalu nanike.

³Kughengu ino kiu ithulukeno ighono akhotou kepi nongu lau ino ikhiphe pesu tsuke: ike kuchoyesu kiqi loye Khristo no ningu xine ghenguno thivetsu,

⁴ike kuchoyesu kiqi loye paye qhove eno akuthunino xuputhuve;

⁵ike paye Pitor zulo ipeghipiye; eno tithiuno apostolmi chighikini zulo ipeghipiye.

⁶Tithiu ghuthu lakhi loye athikuzumi 500 shou zulo ghi ipeghi piyeke, panongu khamiye thivea kemu panongu kutomono itehi ghi xuaphike.

⁷Tithiu paye Jems zulo ipeghipiye eno tipathiuno apostolmi kumtsu zulo ipeghi piye.

⁸Kumtsu shekhashi ni lhonima nga toikeu lau ghi ipeghi piye.

⁹Kughengu niye apostolmi gholo anipau ke eno apostolmi kepi ku kuzupu ghi kumoe, kughengu niye Alhou kukuhou shikighime cheke.

¹⁰Ikemu Alhou kupukini lono niye kiukeno tike, eno pa kupukini ilau tsukeu huye adou shivepemoe, tike kumo puzu, niye apostolmi kutami nguno alau ghichhe ghime kumla shi cheni, kuchouno ino shilu anike kumo puzu Alhou kupukini igholo akeu huno shilu anipeke.

¹¹Tighenguno ilauno ighikeu pina panongu launo ighikeu pinamu, ninguno asheshu eno puluchekeuye hike.

¹²Khristo akithi lono xuputhuvekeu sutsa pesu asheshu cheni aye, nongu gholo khamiye kishino kithimi xuputhu mla kepi picheni kya?

¹³Ikemu kithimi xuputhu mlake piaye Khristo ye xuputhupe puamovae;

¹⁴eno akithi lono Khristo xuputhu puamo aye ninguye kiumu asheshu akepu kuha eno nongu ghi kiumu puluakepu kuhae.

¹⁵Tinguno alauno, ninguye Alhou ghili akumo akukuhau pesu piakeu shivae, kughengu pano akithi lono Khristo xuputhu kepi ninguno pichenike, ikemu kithimiye xuputhu chemo pikeuno kuchou shi aghi aye Alhou ye Khristo xuputhumoe.

¹⁶Kughengu kithimi xuputhu chemo aye Khristo pinamu xuputhumoke.

¹⁷Khristo xuputhumonapi aye nonguno puluche keu adouke eno nonguye no xinelo achephike.

¹⁸Tishinikeloye Khristo kupulumi thivekeqoye puhavae.

¹⁹Khristo lono ninguno lajupu achekeuye hipa yeghilo kuxu kivipu ghengu likhino kenapi aye, ninguye timi kumtsu nguno alau ahakusapu shiauvae.

²⁰Ikemu mutsuqheyino Khristo ye akithi lono xuputhuvae, thiveno zuakemi ghi xuputhuve nikeu shi pano axathi amsuu hutoike.

²¹Kughengu timi lakhi vechewo akithi ighike toi, timi lakhi vechewono akithi lono xuputhuvekeu ighike.

²²Kughengu Adam gholo kimepe akeu lono timi kumtsu thiveke toi, Khristo gholo kimepe akeu lono kumtsu puxuve nani.

²³Khristo no axathi amsuu hutoi kumtsu nguno atughiu shi ideghike lo pa kupulumi qono pa shelo kithikiyi kupasu ighi nani;

²⁴Khristo no ayehkipe jeli, akuka pepimhekeu jeli, akuka jeli kumtsu shipuhaveno akukaqha pesu Apu Alhou lau tsuve kethino ashekha tsala ighi nani.

²⁵Kughengu Alhou no aghumi kumtsu leluveno pa pukhu qholo qhitsumoke kutolo Khristo no ayehpe masae.

²⁶Aghumi lelu kepushi akeu ashekhauye akithike.

²⁷Kughengu kuchoyesu kiqi loye, “Alhou no thwokha pa pukhu qholo qhitsu.” Ikemu khileno tipaulo “Thwokha pa pukhu qholo qhitsu” ipi keno mutsuqheyino tipauye Alhou kihisuamoe, kughengu tiye Alhou no thwokha Khristo qholo qhitsuke.

²⁸Ikemu kughono thwokha Khristo qholo qhivetsu nikeno, tileno Anu ampi ghi thwokha pa qholo qhitsukeu Lhou qholo ngove nani, tishianguno Alhou no kumtsu shou ayehpe nani.

²⁹Tishimo aye, khunoqono kithimi ghenguno baptiz lupuani keno tipaqoye kiu shiniye kya? Kithimi khilemu xuputhu chemo aye timiqoye kushiye kithimi ghenguno panonguno baptiz lucheni kya?

³⁰Tishimoaye, kushiye ninguye atuqhudo kumtsulo akumsapu sasu kusho ani kya?

³¹Athikuzumiqo, tsalakipetsu niye akithi sasu kusho acheni, ningu Mipeu Jisu Khristo gholono ino nongu jupesu ikijivilo achekeu huno ipelo hipau pilu anipeke!

³²Tsala timi kuxu kiqi lono, hila Efesia lo tughashi sasu kichighike aye niye kiu alla shiluniche kya? Kithimi xuputhu chemo aye, pichekeu toi, “Ningu kuchukusho shi ani nolo, kughengu thoghiu ninguye thini ake.”

³³Nongu sakughuzupe kevilo: “Akusami alhoksano ghushoghili kivi shipusa cheni.”

³⁴Nongu kukumsu achipiulo ighivelo eno axine shikithe akevelo. Kughengu nongu khamiye Alhou mthake, nongu shikukujo nike niye hipau piani.

³⁵Ikemu timi khamino ishi inijuluvi, “Kithimiye kishi xuputhu cheni kya? Panonguye kiu toi keu phimpi pua nani kya?”

³⁶Oghuzu anikha! Nono kiu yisu keno tipau thimphi loye akuxu akeu bo lhoipeghi chemoe.

³⁷Nono alothi yisu chekeu huye athiuno anipa amzu pupuzu ipeghi chekeu bo kumoe, ikemu aghi lothi momu kutau jeli pimu alothi likhi yisu chenike.

³⁸Ikemu Alhou no pa pulou lono alothi tipau pesu abo ipeghipe cheni; pano pututa lothi shelo pututa bo pepipe cheni.

³⁹Lhoxu kumtsu ashi ahji aphiphike kumoe. Timi shiahjiye pakutae, tughashi shiahji kuta, aghauqo shiahji kuta, eno akhaqo shiahji kutake.

⁴⁰Atsutsulo akeqo phimpino ajuvi akeu kuta eno ayeghilo akeqo phimpino ajuvi akeu kutake.

⁴¹Tsukinheno ajuvi akeu kuta, aqhino ajuvi akeu kuta, ayepuqono ajuvi akeu kuta ishike; eno ayepuqo dolo ghi ajukivi ajeli kutuqukeu anike.

⁴²Kithimi xuchileputhu kelo ghi titoi nani. Alothi toi, ashikumoye tsumavekepushi qhove cheni, kughono ti xuputhuveni keno tsumave moae.

⁴³Aphimpi ye jukusapu shi qhove cheni, eno tipau xuputhuve keloye jukighilepu shive nani. Hiye tomochhimo keushi qhove cheni, eno tipau xuputhuve keloye akuka kumto shive nani.

⁴⁴Hiye ashikumo aphimpi shino qhove cheni, tipau xuputhuve keloye angugha phimpi shive nani. Ashikumo phimpi ani aye angugha phimpi ghi aniputsake.

⁴⁵Tighenguno kuchoyesulo ishi pipuani: “Timi atughiu Adam ye akuxu kua lhoxu shi lhopheke.” Ikemu ashekhau Adam ye akuxu tsuchekeu ngughapuke.

⁴⁶Angugha akeu huno atughiuke kumoe, ikemu ashi ahji shikumo paghi ke eno tipathiuno angugha akeu ke.

⁴⁷Timi atughiuye ayeghimukhuno lhoke; timi akiniuye kungugha launo ighike.

⁴⁸Khunoqono ayeghi laumi keno panonguye ayeghi mukhuno lhokeu timi toike; khunoqono kungugha laumi keno panonguye kungugha launo ighikeu timi toike.

⁴⁹Ninguye ayeghi mukhuno shikeu timi juhi pepu ake toi ninguye kungugha launo ighikeu timi juhi pepu ani.

⁵⁰Athikuzumiqo, ino piakeu kiqiye hike: ashi eno ahjiye Alhou yehkipe kusaje mla nani, momu tsu- mavekepuye tsu-mavemla kepu kusaje mlae.

⁵¹Ino muzamughaleyi kepu tuqhou lakhi nongu vilo pinike inijulo: ningu kumtsu thimo nani, ikemu kughou afuko ashekhau igha nikeno pai anhekutsu khavino ningu kumtsu kilive aghi nani. Kughengu afuko igha nani, eno kithimiqoye tsu-mavemokepu shi xuputhuve nani eno ninguye kilive nani.

⁵²

⁵³Kughengu hi tsu-mavekepu lhoaye huye tsu-mave mlakepu pepuve masa, eno thivenikuau huye thivemla kepu pepuve masae.

⁵⁴Kughou tsu-mavekepu huno tsu-mave mlakepu pepuve eno thivenikuau huno thivemla kepu pepuve nikeno, tilehino kuchoyesulo ishi pipuakeu tsa kupu nani: “Tokuluno akithi munovae!”

⁵⁵“O akithio, noye tokulupu khile ani kya?” “ O akithio, noye ghuzakulupu sahu khile ani kya?”

⁵⁶Akithi ghuzakepu sahuye axine ke, eno axine kukaye Ayezahke.

⁵⁷Ikemu Alhou shikimthi ani, kughengu ningu Mipeu Jisu Khristo vechewo pano tokulupu ningu tsuke!

⁵⁸Tighenguno ino kimiye chekemi athikuzumiqo, mutotoi puthugholo, ithakevilo, kihikutha kuhano pulhapuju Ampeu kumla shialo, nonguno ithianike Ampeu kumla kiu shiani keno khilemu adou shivemoe.