Read Sumi Naga 1 KORINTHIAMI 16 Bible Online

1 KORINTHIAMI 16 - Sumi Naga bible

1 KORINTHIAMI 16

¹Itehiye Judia lo Alhou timiqo ghenguno asuqha qhakepu shi akeulo, Galatia qhalo akukuhou akeqo vilo ino pivekeu toi nongu ghi titoi shimasake.

²Apinedo lakhilo atsala atughini nongu lakhikhino pututano aghikeu qhemi ikhithape qhakutsupe puaghilo, tishianguno ino ighi keloye asuqha qhamokepu shilo.

³Ino ighi kethiuno, nonguno timi kishe puaghikeqo gholo kilethisukeu yesu tsuno puwuni eno panongu pelo Jerusalem lo nongu gho puwu penike.

⁴Tsala nighi wukepu shive aghiaye panonguye igholono wulu nani.

⁵Niye Makedonia vechesu wunikeu kukughu shi anike ghenguno tipau vechesu nongu lau ighi nani.

⁶Kumsuju kelo niye nongu gholo ado ta ngo nanike, kutomu susu tsala kupuju kutolo ngove nanike, eno tithiuno ino khila wuni keno tilehiye nonguno ighuzulalo kuphu puwulu kepuke.

⁷Kughengu ino wuche kelo chokilhe shi nongu sasu kushonishi amoe, Ampeu pulou shi aghiaye niye nongu gholo ado ta ngonikeu pulo ani.

⁸Pentikost tsala kutolo niye Efesia lo ngo aghinikeu akupughu shi ani.

⁹kughengu hilehi amekuapu kumla kije shikulupu ado kivi khaqhitsu anike, eno mujochileni kemi qhe akhanike.

¹⁰Tsala Timothi no nongu lau ighiaye, pa pelo nongu gholo ighumono ngo pelo, kughengu pa ghi itoi Ampeu ghenguno mla acheni.

¹¹Khuu pelomu pa thaigha pekevilo, ikemu nonguye pa ghuzulalo amlo kiqipushi kuphu puwulo, tishianguno paye ilau ideighi penike, kughengu niye athikuzumi gholo pa laju anike.

¹²Ningu thikuzuu Apollo vehu ghenguno niye athikuzumi kutami gholono nongu xujuwu lopi pa shikumto achenike, ikemu paye itodolo tilau ighinikeu kumsumono aphike. Tishimu pano adokivi ithulu kemtsa ighi nani.

¹³Tsukhuyi alo, nongu kupululo mutotoi puthugho alo, amlo kuloghi shi, mutotoi alo.

¹⁴Nonguno mla ithakeu kumtsulo kimiyekeu lono shilo.

¹⁵Athikuzumiqo, nonguye Stefana ngo pa kibolomi ithi anike; Akhaiya qhalo panongu paghino Khristomi laghilo xuluvekemi ke, panonguye Alhou timiqo kumla shinike akuxu ikhiphepe tsuveke.

¹⁶Ino nongu choha anike, nonguye timi hitoikeqono saphekeu papelo, eno khunoqono panongu gholo mla ani eno aghimeshi mlakuqha chenikeno tipaqo papelo.

¹⁷Niye Stefana,Fartunata eno Akhaiko noqono ighikeulo alokivishi ani, nongu zuqhulo panonguno ighitsu kehu,

¹⁸kughengu panonguno nongu ghuthi puxu tsucheke toi ighuthi puxu tsuke. Timi hitoikeqo gihu kuzupuke.

¹⁹Asia yeghi bocholo akukuhou qono petha nongu tsu ani. Akuila ngo Priskila pama eno pano kilo akukuho kuhochekemi kumtsuno Ampeu gholo alokivi petha nongu tsu ani.

²⁰Athikuzumi hila akeqono petha tsu ani. Akimthe lono mumakeu pesu lakhino lakhi petha tsukilelo.

²¹Ni, Paul ampino i-u pesu petha hipau yepuku ani.

²²Timi khuno Ampeu kimiyekeu kuhani keno, angusu pa shou apeni. Ningu Mipeu cheae![3]

²³Ampeu Jisu kupukini nongu gholo apelo.

²⁴Khristo Jisu je lono ikikimiye nongu kumtsu gholo apelo. Amen.