Read Sumi Naga 1 KORINTHIAMI 5 Bible Online

1 KORINTHIAMI 5 - Sumi Naga bible

1 KORINTHIAMI 5

¹Mtsuqheyino nongu gholo kipti toti dolo mithemovekeu pi-ighivae, eno tikithipuye Alhou mthakemi gholo ghi khilemu shichemokeu ghilike: tiye timi lakhino papuh nipu sasu kughuna akeu ivilo pivae!

²Ikeghi nonguye kishi puzu amlo ghimeshi kepu suwo akuchhomashi ani kya? Timi khuno hikithipu kumla shipuani keno nonguqo gholono hapheve kepue.

³Kughengu iphimpiye nongu gholo kuha kemu imloye nongu gholo ani, eno nongu sasu aghi keaye, Ampeu Jisu je lono timi khuno hikithipu kumla shipuani keno tipau shou niye kughathabeve aghini cheke.

⁴Kughou nonguno kuhokumqo keno imloye tilau nongu sasu ani tiye ningu Mipeu Jisu no ningu sasu akeu kuka lono,

⁵ike timi tipau huye aphi-ashi kutsavepe nike nonguye pa ikhiphepe Satan tsuvelo, tishianguno Ampeu Tsalani pa ghungu xalutsu penike.

⁶Nonguye qheza kuzupu kumoe. Kholaqhi kitilano asho kunupe puakeu kuchopu ingughuyivetsu chekeu nonguye mtha kesha?

⁷Nonguye asho kukunu akitheu tsughukhuyi shinike ghenguno axine shipe chekeu kholaqhi aqau huye ikhi kimthevelo. Kuchouno nonguye kholaqhi sumokeu tsughukhuyi kepi ino ithi ani, kughengu ningu Hechekulu Ghulhu bheriye Khristo ke, paye ningu ghenguno heqhi pesu mllavae.

⁸Tighenguno ninguye kholaqhi aqau, ti axine eno mithemokeu pesu hipau ghulhu shimoni, ikemu kholaqhi kuhakeu sho, ti mutsumishei eno kuchou pesu hipau ghulhu shinie!

⁹Ino nongu lau yesu yekeu lono piveake, mithemokemi sasu kuposhu kevilo.

¹⁰Niye ayeghiqhalo mithemokemiqo piamoe, momu aghukha shikemi momu pukaqhi chekemi momu Alhou nguno ajulho kutau mllachekemi piamoe. Tishinikelo nonguye ayeghiqha hipau launo chevemasa kepu shive nani.

¹¹Tikumoe, ikemu ino nongu lau yekeuye hike: timi khuuno paye athikuzumi lakhi kepi picheni ikemu kiptitoti dolo mithemokeu shicheni, aghukha shicheni, Alhou nguno ajulho kutau mlla cheni momu kutami thaigha cheni, shomzu cheni, pukaqhi cheni ishi keno nonguye timi tipau sasu kuposhu kevilo. Tikithipu timiye sasu kuchu-kusho ghi kumtsa shikevilo.

¹²Kughengu niye kushiniye ashoumiqo shou kughathabe ani kya? Ashoumiqoye Alhou no kughathabe nani, ikemu nonguye akukuho alou akemiqo shouye kughathabe moni kesha? “Lhoksa-kughau timi huye nongu gholono haphevelo.”