Read Sumi Naga 1 KORINTHIAMI 6 Bible Online

1 KORINTHIAMI 6 - Sumi Naga bible

1 KORINTHIAMI 6

¹Nongu milakhino athikuzumi lakhi shou atsakughakepu aghiaye, Alhou kukuhomiqo pelo tipau xathatsupe nike zuqhulo paye ighumo kesheno amikucho kumomi kughakuthami zulo pewu cheni kya?

²Alhou wu akukuhomiqono ayeghiqha shou kughakutha shi nani kepi nonguye mtha kesha? Tishiaye nonguye ayeghiqha shou kughathabe nikeu shiani aye, nonguye avehu kitila ghi kughathamlave kesha?

³Ninguno kungumi shou ghi kughathabe nani kepi nonguye mtha kesha? Tishiaye, tiye hipa kuxulo thimeqo nguno shishe alauke kumo kesha?

⁴Ike hikithipu ipeghi kelo kushiye nonguye akukuhoulo kihisumomithe kemiqo pelo xathatsu penike pewu cheni kya?

⁵Niye nongu shikukujonike hi piani. Kuchouno athikuzumiqo dolo atsakugha xathave tsulukepu nongu gholo asuqekighithimi milakhimu kuhave kesha?

⁶Kuchouno athikuzumi lakhino lakhi shou kughaki lono atsakugha eno tihuye Alhou pulumokemi zulono kugha cheni kesha?

⁷Nongu dolo milakhino lakhi sasu atsa-kugha akeu kiqiye nonguye tomo kuchou shiauvae. Nono achipikumou kepi auvepe keumu shimo kesha? Oghesuqhive pekeu mu pavi mo kesha?

⁸Ikemu le athikuzumi dolo thotsu nonguye lakhino lakhi shou achipikumou shike eno lakhino lakhi ghesuqhike.

⁹Amikucho kumomiye Alhou Yehkipe mheghi ighilumo nani kepi nonguye mtha kesha? Nongu likhi nongu shikughuzu akevilo: kipti toti dolo mithemokemi na, Alhou nguno ajulho kutau mllakemi na, kusalhami na, kipti toti michimono xuwuvekemi na,

¹⁰kupkami na, aghukha shichekemi na, shokumzumi na, kutami thaighachekemi na, suxakulumi namu hipaqo shichekemiye lakhimu Alhou yehkipe mheghi ighilumo nani.

¹¹Nongu khamiye tipaqo shichekemi ke; ikemu Ampeu Jisu Khristo je lono eno ningu Lhou Ghungu no nongu qhukimthevae; nonguye Alhou lau akimthe shipenikeu shivae; nonguye Alhou lau achipikaluke.

¹²Ighenguye thwokha shikulupu shi anike; ikemu kumtsu pesu avehupu shiluni chemoe. Ighenguye thwokha shikulupu shi anike, ikemu kiu pelomu ikugha pesu tipau qeu shivepemo nani.

¹³“Achuqupuye akive ghengunoke eno akiveye achuqupu ghenguno ke.” Tishike, ikemu Alhou no tikuma kinikujo shipusave tsunani. Aphimpiye kipti toti dolo mithemokeu shipenike ghenguno puani kekumoe, ikemu Ampeu ghenguno ke eno Ampeu ye aphimpi ghengunoke.

¹⁴Alhou no akithi lono Ampeu xuputhuke eno pa kuka pesu ningu ghi xuputhu nani.

¹⁵Nongu phimpiye Khristo phi-au kepi mtha kesha? Tishiaye, niye Khristo phi a-u pesu kusalhami phi a-u shive peni kesha? Khilemu tishipemlae!

¹⁶Timi khuno kusalhami sasu ashi-aji kuqhani keno paye li sasu aphi-ashi lakhi shivea kepi nonguye mtha kesha? Kuchoyesulo mtsuqheyi ishi yevae, “Pamaye aphi-ashi lakhi shi nani.”

¹⁷Ikemu timi khuuno Ampeu sasu kimepe ani keno paye Ampeu sasu amlo lakhi shi anike.

¹⁸Kipti toti dolo mithemokeu lono tsughuvelo. Timi lakhino axine kutau kiu shini keno tiye pa phimpi nguno khalauke; ikemu khuuno kipti toti dolo mithemokeu shini keno paye pa phimpi shou axine shipuku ani.

¹⁹Nongu phimpiye Aghungu Kimthe chineki ke, Alhou no nongu tsukeu, paye nongu lolo akeu kepi nonguye mtha kesha? Nonguye nolikhi nongu wuke kumoe ikemu Alhou wuke.

²⁰Pano ameno nongu qhuvae. Tishiaye nongu phimpi lono Alhou jukuvupu shitsulo.