Read Sumi Naga 1 KORINTHIAMI 8 Bible Online

1 KORINTHIAMI 8 - Sumi Naga bible

1 KORINTHIAMI 8

¹Itehiye achuqupu pesu Alhou nguno ajulho kutau mllavekeu vehu: “Ningu kumtsu akighithi anike” ipi chekeu ninguno ithiakeu toi tiye kuchou ke. Titoikeu kighithiye timi pelo lahilaza qheza chenipe, ikemu kimiyekeuno xaqhe cheni.

²Timi khuno paye kiukiumu ithianie pini keno kuchouno paye kiu ithimasa keno tipau mtha aphike.

³Ikemu khuuno Alhou kimiye cheni keno pano ithi auvae.

⁴Tishiaye, Alhou nguno ajulho kutau mllavekeu chuqupu chukeu ninguno ithi akeuno Alhou nguno ajulho kutau shipe qhikeqo hu kuchouno achenike kumoke, Alhou ye lakhi likhi kethono kutau kuhae.

⁵Atsutsulo momu ayeghi shou, “alhouqo” ipicheke jeli aghiepinamu eno le kuchouno “alhouqo” ngo “ampemiqo” kutomo akhanie,

⁶tishimu ningu ghenguye Alhou lakhi likhi ani, paye Apu ke, thwokha pa launo ighi eno pa ghenguno ninguye xuaghiluke; eno Ampeu lakhi likhi akeuye Jisu Khristo ke, pa vechewo thwokha ighi eno pa ghenguno ninguye xuaghiluke.

⁷Tishiepimu, timi kumtsuno akighithi hipau ithiamoe. Ikemu khamiye ishikutolo Alhou nguno ajulho kutau mllakeu gholo aheluqhuve kehu achuqupu chukelo Alhou nguno ajulho kutau mllavekeu chuqupu kepi kumsu acheni; panongu kivikusa lokutsuye mutomo kehu achuqupu huno panongu kitiqevea kepi amlo susu shive cheni.

⁸Achuqupuno ningu pelo Alhou punukhoyi lupeni chemoe; ninguno chumove pinamu ninguye kiumu adou shiveni chemo, eno ninguno chuke ghenguno kiumu alla shiluni chemoe.

⁹Tishiepinamu, nono kiu shinishi keno shiluakeu kughutha pelo akupululo tomo chhimono akeqo axinelo ikiqive pemonike ghenguno kutokupuyi luvelo.

¹⁰No “akighithi” akeu huno Alhou nguno ajulho kutau mllakeu chineki lakhilo achuqu chu akelo hikithipu vehulo kivikusa lokutsu tomo chhimokemi lakhino no ithulu aye, nono pa pelo Alhou nguno ajulho kutau mllavekeu chuqupu chunikeu amlo shikumtotsu auveake kumo kesha?

¹¹Ikelo tomo chhimokeu timi, othikuzuu khuu ghenguno Khristo thivekeno, tipau huye okighithino shipusavae.

¹²Kughou nono hitoi shipuzu othikuzumi shou axine shi eno panongu kivikusa lokutsu tomo chhimono akeu ghuzani keno, noye Khristo shou axine shi ani.

¹³Tighenguno achuqupuno ithikuzuu pelo axinelo ikiqivepe kepushive aye, ni ampiye khilemu ashi chumove nani. tishianguno ithikuzuu pelo axinelo ikiqive pemonike.