Read Sumi Naga 1 KORINTHIAMI 9 Bible Online

1 KORINTHIAMI 9 - Sumi Naga bible

1 KORINTHIAMI 9

¹Niye kiu shinikeno tipau shichekemi kekumo kesha? Niye apostolmi lakhike kumo kesha? Niye niMpeu Jisu ithuluke kumo kesha? Nonguye ino Ampeu ghenguno mlakeu lono ipeghilukemi kekumo kesha?

²Kutamino apostolmi kepi ni ikhilumo namu nongu lau likhimu niye apostolmi ke. Nonguno Ampeu lau xukimepe akeu huno niye apostolmi lakhi kepi mtsuqheyi shitsu ani.

³Timi kutamino ipeju kelo ino hitoi ishokha cheni:

⁴Ninguye achuqupu akushopu ithulukeu achipi kumo kesha?

⁵Apostolmi kutami ngo Ampeu thikuzumi eno Pitor ishino shichekeu toi ninguye anipu sasu izuwuni keu akuzupu kumo kesha?

⁶Ikeo Barnaba ikujo likhino akumla shipuzu xumasa kya?

⁷Timi khuno pa likhi pa chuqu kusho peitha puzu ghushimi shicheni kya? Timi khuno pa tsayilu chi puzu tipaulo ipekighi xathi chumove cheni kya? Momu timi khuno pawu bheriqo kheu shipuzu tipaqo launo akichhizu lumove cheni kya?

⁸Niye timino picheghikeu kiqi likhi lono pianike kumo puzu Ayezahlo ghi tishi pipuani kekumo kesha?

⁹Muse no tsukeu yezahlo ishi yepuani: “Kughou amshitsuno athi qophe ani keno noye amishi kichi khavetsu kevilo.” Alhou ye amshitsu ghenguno kumsujutsu ani kesha?

¹⁰Pano hipau pikeuye ningu ghenguno pipuani kekumo kesha? Hiye ningu ghenguno yepuatsu ake. Timi khuno hokide ani keno eno khuno athi qophe ani keno panonguye pututa saje lunike ghenguno lajuqhiyi akumla mla kepue.

¹¹Ninguno anguaghapu piti nongu lau xusue. ikelo ninguno nongu launo aphi-ashi tuchokepu nhemgha lukeu tiye ihulo kesha?

¹²Kutamino hikithipu nongu launo kusaje kepu akuzupu shi aghi aye ninguye tinguno alaushi akuzupu shianike kumo kesha? Ikeghi ninguye ti akuzupu hu peithaju mphiake. Tishinike zuqhu, ninguye thwokha kutuu luvetsu acheni, tishianguno Khristo lokivipu tsa laghilo ninguye kiumu lakukhapu qhitsumoniyeke.

¹³Nongu ghi ithi aghinanike khunono achinekilo chini chenikeno achineki lono panoqo chuqupu ithulu cheni, eno khunono akumllagho pesu akiptia lono mlla cheni keno panonguye akumllagho lono asaje lucheni.

¹⁴Tihutoi Ampeu no ahza tsukeu ghi khunoqono lokivipu tsa asheshu cheni keno panonguye lokivipu tsa sheshu vechewo xulupe masake.

¹⁵Ikemu ni amipiye hi akuzupuqo kiumu peithaju mphike momu ino itehi hi yeakeuye isala tipau pukhaniye shianike kumoe. Tishinike zuqhu niye thivekeu pavike. Timi khuu pelomu ino akijivilo akeu tsa pesu abokumsa tsa shivetsu pemo nani!

¹⁶Kughengu ino lokivipu tsa asheshuke ghenguno ikijivilopu kiumu akuzupu kuhae, kughengu tishi penike ahza itsu puanike. Ino lokivipu tsa pesu asheshumo aye ighenguno tiye kiutoi akuighupukela!

¹⁷Ino igho ipulou lono ikumlla mla aye, tile ijume itsupenike khe anicheke, ikemu ipulou kumono shimasakeu lono mla aghi aye tiye Alhou no ivilo mlalo pikeu kumlapu sajeke.

¹⁸Tishiaye ijumeye kiu kya? Hike: ame lumono lokivipu tsa pesu asheshulukeu ke; tiye lokivipu tsa pesu asheshu keu kumlalo ino ajume ithulukuzupu shiakeu lumokeu huke.

¹⁹Kughengu niye khuu qeumu kumo kemu, ino ilikhi ikughape kumtsu qeu shive, tishianguno Khristo lau timi kutomo saghilu niyeke.

²⁰Judami gholo mla akelo niye Judami toi xue tishianguno Khristo lau panoqo saghilu niyeke; niye Muse yezah qholo achemo kemu tipau qholo kuami gholo mla akelo niye tipau yezah qholo kuami toi xucheni, tishianguno Khristo lau panoqo saghilu niyeke.

²¹Muse yezah kuhakemi Judakumomi gholo niye panongu lakhi toi xucheni, tishianguno Khristo lau panoqo saghiluni kehu. Tishiepimu niye Khristo yezah bocholo anike ghenguno Alhou wu ayezah pemokeu shimoe.

²²Akupululo tomo chhimokemi gholo niye panoqo lakhi paphi shicheni, tishianguno tomo chhimokemi Khristo lau saghilu niyeke. Niye kishialashi puzu khami likhimu xakulupu shilunimalaye timi kumtsu gholo thwokha kumtsu shi cheni.

²³Niye lokivipu tsa ghenguno hipaqo kumtsu shi cheni,tishianguno tipau wu kukumgha gholo nighi kusajeni kehuke.

²⁴Nonguno ithi anike, kohakive pokelo akupomi kumtsu kuxu cheni ikemu panoqo gholo milakhino asaxu ithulu cheni. Tishiaye, asaxu ithulu kepushi polo.

²⁵Pepushumo nikeu kutsukuqho ithulu nike thotsu kuxukelo ilokemi lakhi khino thwokhalo alikhi ampi kusuqhiluve cheni aye ninguno tishi shiakeuye shipusamlakeu saxu ithulu niyeke.

²⁶Ike niye akimji kuha puzu azukututu pochemoe, niye abokumsa chishi jupuhakemi toi kichishi chemoe.

²⁷Ino kutami vilo asheshu acheni puzu ni ampiye kuxu nikeu lono kideqhivenosa kehu niye iphimpi chishikushughi acheni eno mghachhoyi tipau ghasupe qhicheni.