Read Sumi Naga 2 KORINTHIAMI 10 Bible Online

2 KORINTHIAMI 10 - Sumi Naga bible

2 KORINTHIAMI 10

¹Khristo kumtsha akughuvu pesu ni Paul ampino nongu qhuyiniju ani. Kughou nongu sasu kinheqhe kusholuni keno niye ivunheyi cheni ikemu kughono nongu launo putosuveni keno niye mghachhoyi cheni ipichekeu hu ni Paul ke.

²Kughou ino ighini keno ipelo nongu lau mghachhoyi pekevilo; kughengu khunono ninguye ayeghilo kuxu ghola lono mlaitha ani kepi ni pulupusa cheni keno niye tipanoqo lau mghachhoyi keu piyelu nani.

³Kughengu ninguye ayeghilo xu anamu ayeghilo ghushi nanu xapusu aghu shichemoe.

⁴Kughengu ningu ghushi nanuye ayeghilomi ghushi nanu kumoe ikemu Alhou launo ighikeu kuka ghunanu pesu aliwo kuptu leluniyeke. Akimiki lono kula-kide kudayikeu hu ninguno kutsa cheni;

⁵Alhou kighithi lakhakeu ghuthu ninguno tula cheni; akukumsu thwokha ninguno tshusawo Khristo gholupe cheni.

⁶Nonguno thwokhalo aghokulu shikethiuno kiu kiu lomu agholumokeu shikighime nike ninguye kutope ani.

⁷Nongu zulo kiu ani keno julo. Nongu gholo khualano paye Khristo timi kepi mutsuqheyi shilu aghi aye pa likhi pano highi kumsukutojulo: pano Khristo timi kehutoi ningu ghike.

⁸Kughengu Ampeu no akuka khikhi ningu tsukeno tiye nongu shipsa peniyeke kumono nongu xaqhepuku peniyeke eno ino tipau kuka akeulo alaushi qheza namu niye kujokepu kuhae.

⁹Niye yesu yepesu nongu shikumsa niye kekumoe.

¹⁰Timi khamino ishi piaghiluvi, “Paul yesuqoye mishishei eno mukamughaike ikemu pa ampino ningu gholo akelo paye qeinayi eno pa tsaqoye kiumu kihikepu kuhae!”

¹¹Timi tishi pichekeqo pelo hi ithi pelo: ninguno putou akelo yesu lono kiu yepuwu keno ningu ampino ighikelo tipau shi chenike.

¹²Kuchouno ninguye alikhi ampi sheqhe chekemi khami sasu jokumtsaju momu kimghiju akepu kuhake. Ikemu kughono panongu likhi panongu mighijukile eno panongu likhi panongu xathakilejuni keno panonguye mubomzumi qoke.

¹³Ikemu ninguye kihithapuakeu nguno alauye qhezani chemoe; tiye Alhou no kihitha pesu ningu kophepuatsu keu kumlapu kuto dolo likhi ananike, eno tiye nongu Korinthiami gholo mlakeu ghi kihikuqha anike.

¹⁴Ningu paghino Khristo tsakiviu pesu ala kushuwa lono nongu lau ighikehu nongu ghenguno ninguno akijivilo akeulo ninguye kihithatsukeu bocho nguno alau wuve amoe.

¹⁵Ike Alhou no ningu ghenguno kothapuatsu keu kumla bocho nguno kutamino mlakeulo ninguno qheza amoke. Ikemu ninguno lakuju shiakeuno nongu kupulu kighishelu keulo nongu gholo ningu pelo Alhou no kihitha tsukeu kuto lono alaushi akumla kije shilupekepuke.

¹⁶Tishikeulo kutamino mlachekeu alo mlapuani kepi qheza kepu kuhano nongu hechesu ayeghi kutau ghi atsakiviu pikulhawu penike.

¹⁷Kuchoyesulo piketoi, “Khuno qhezani keno Ampeu no kiu mlakeno tipaulo qheza pelo.” 6

¹⁸Kughengu timi lakhino pa likhi pa sheqhekeuye adouke ikemu Ampeu no sheqhekeu timi huye amekuapu ke.